၁၁. သမာပတ္တိမူလကဌိတိသုတ္တံ

၆၇၂. သာဝတ္ထိနိဒါနံ. ‘‘စတ္တာရောမေ၊ ဘိက္ခဝေ၊ ဈာယီ. ကတမေ စတ္တာရော? ဣဓ၊ ဘိက္ခဝေ၊ ဧကစ္စော ဈာယီ သမာဓိသ္မိံ သမာပတ္တိကုသလော ဟောတိ၊ န သမာဓိသ္မိံ ဌိတိကုသလော. ဣဓ ပန၊ ဘိက္ခဝေ၊ ဧကစ္စော ဈာယီ သမာဓိသ္မိံ ဌိတိကုသလော ဟောတိ၊ န သမာဓိသ္မိံ သမာပတ္တိကုသလော. ဣဓ ပန၊ ဘိက္ခဝေ၊ ဧကစ္စော ဈာယီ နေဝ သမာဓိသ္မိံ သမာပတ္တိကုသလော ဟောတိ၊ န စ သမာဓိသ္မိံ ဌိတိကုသလော. ဣဓ ပန၊ ဘိက္ခဝေ၊ ဧကစ္စော ဈာယီ သမာဓိသ္မိံ သမာပတ္တိကုသလော စ ဟောတိ၊ သမာဓိသ္မိံ ဌိတိကုသလော စ. တတြ၊ ဘိက္ခဝေ၊ ယွာယံ ဈာယီ သမာဓိသ္မိံ သမာပတ္တိကုသလော စ ဟောတိ၊ သမာဓိသ္မိံ ဌိတိကုသလော စ အယံ ဣမေသံ စတုန္နံ ဈာယီနံ အဂ္ဂေါ စ သေဋ္ဌော စ မောက္ခော စ ဥတ္တမော စ ပဝရော စ. သေယျထာပိ၊ ဘိက္ခဝေ၊ ဂဝါ ခီရံ။ပေ။ ပဝရော စာ’’တိ. ဧကာဒသမံ.