၁. သမာဓိမူလကသမာပတ္တိသုတ္တံ

၆၆၂. သာဝတ္ထိနိဒါနံ. ‘‘စတ္တာရောမေ၊ ဘိက္ခဝေ၊ ဈာယီ. ကတမေ စတ္တာရော? ဣဓ၊ ဘိက္ခဝေ၊ ဧကစ္စော ဈာယီ သမာဓိသ္မိံ သမာဓိကုသလော ဟောတိ၊ န သမာဓိသ္မိံ သမာပတ္တိကုသလော. ဣဓ ပန၊ ဘိက္ခဝေ၊ ဧကစ္စော ဈာယီ သမာဓိသ္မိံ သမာပတ္တိကုသလော ဟောတိ၊ န သမာဓိသ္မိံ သမာဓိကုသလော. ဣဓ ပန၊ ဘိက္ခဝေ၊ ဧကစ္စော ဈာယီ နေဝ သမာဓိသ္မိံ သမာဓိကုသလော ဟောတိ၊ န စ သမာဓိသ္မိံ သမာပတ္တိကုသလော. ဣဓ ပန၊ ဘိက္ခဝေ၊ ဧကစ္စော ဈာယီ သမာဓိသ္မိံ သမာဓိကုသလော စ ဟောတိ၊ သမာဓိသ္မိံ သမာပတ္တိကုသလော စ. တတြ၊ ဘိက္ခဝေ၊ ယွာယံ ဈာယီ သမာဓိသ္မိံ သမာဓိကုသလော စ ဟောတိ သမာဓိသ္မိံ သမာပတ္တိကုသလော စ အယံ ဣမေသံ စတုန္နံ ဈာယီနံ အဂ္ဂေါ စ သေဋ္ဌော စ မောက္ခော [ပါမောက္ခော (သျာ. ကံ.) ဧဝမုပရိပိ] စ ဥတ္တမော စ ပဝရော စ. သေယျထာပိ၊ ဘိက္ခဝေ၊ ဂဝါ ခီရံ၊ ခီရမှာ ဒဓိ၊ ဒဓိမှာ နဝနီတံ၊ နဝနီတမှာ သပ္ပိ၊ သပ္ပိမှာ သပ္ပိမဏ္ဍော တတြ အဂ္ဂမက္ခာယတိ၊ ဧဝမေဝ ခေါ၊ ဘိက္ခဝေ၊ ယွာယံ ဈာယီ သမာဓိသ္မိံ သမာဓိကုသလော စ ဟောတိ သမာဓိသ္မိံ သမာပတ္တိကုသလော စ အယံ ဣမေသံ စတုန္နံ ဈာယီနံ အဂ္ဂေါ စ သေဋ္ဌော စ မောက္ခော စ ဥတ္တမော စ ပဝရော စာ’’တိ. ပဌမံ.