၄-၁၂. သာရဂန္ဓာဒိဒါတာသုတ္တနဝကံ

၄၄၁-၄၄၉. သာဝတ္ထိနိဒါနံ. ဧကမန္တံ နိသိန္နော ခေါ သော ဘိက္ခု ဘဂဝန္တံ ဧတဒဝေါစ – ‘‘ကော နု ခေါ၊ ဘန္တေ၊ ဟေတု၊ ကော ပစ္စယော၊ ယေန မိဓေကစ္စော ကာယဿ ဘေဒါ ပရံ မရဏာ သာရဂန္ဓေ အဓိဝတ္ထာနံ ဒေဝါနံ။ပေ။ ဖေဂ္ဂုဂန္ဓေ အဓိဝတ္ထာနံ ဒေဝါနံ။ တစဂန္ဓေ အဓိဝတ္ထာနံ ဒေဝါနံ။ ပပဋိကဂန္ဓေ အဓိဝတ္ထာနံ ဒေဝါနံ။ ပတ္တဂန္ဓေ အဓိဝတ္ထာနံ ဒေဝါနံ။ ပုပ္ဖဂန္ဓေ အဓိဝတ္ထာနံ ဒေဝါနံ။ ဖလဂန္ဓေ အဓိဝတ္ထာနံ ဒေဝါနံ။ ရသဂန္ဓေ အဓိဝတ္ထာနံ ဒေဝါနံ။ ဂန္ဓဂန္ဓေ အဓိဝတ္ထာနံ ဒေဝါနံ သဟဗျတံ ဥပပဇ္ဇတီ’’တိ? ‘‘ဣဓ၊ ဘိက္ခု၊ ဧကစ္စော ကာယေန သုစရိတံ စရတိ၊ ဝါစာယ သုစရိတံ စရတိ၊ မနသာ သုစရိတံ စရတိ. တဿ သုတံ ဟောတိ – ‘သာရဂန္ဓေ အဓိဝတ္ထာ ဒေဝါ ဒီဃာယုကာ ဝဏ္ဏဝန္တော သုခဗဟုလာ’တိ. တဿ ဧဝံ ဟောတိ – ‘အဟော ဝတာဟံ ကာယဿ ဘေဒါ ပရံ မရဏာ သာရဂန္ဓေ အဓိဝတ္ထာနံ ဒေဝါနံ။ပေ။ ဖေဂ္ဂုဂန္ဓေ အဓိဝတ္ထာနံ ဒေဝါနံ။ တစဂန္ဓေ အဓိဝတ္ထာနံ ဒေဝါနံ။ ပပဋိကဂန္ဓေ အဓိဝတ္ထာနံ ဒေဝါနံ။ ပတ္တဂန္ဓေ အဓိဝတ္ထာနံ ဒေဝါနံ။ ပုပ္ဖဂန္ဓေ အဓိဝတ္ထာနံ ဒေဝါနံ။ ဖလဂန္ဓေ အဓိဝတ္ထာနံ ဒေဝါနံ။ ရသဂန္ဓေ အဓိဝတ္ထာနံ ဒေဝါနံ။ ဂန္ဓဂန္ဓေ အဓိဝတ္ထာနံ ဒေဝါနံ သဟဗျတံ ဥပပဇ္ဇေယျ’န္တိ. သော ဒါတာ ဟောတိ သာရဂန္ဓာနံ။ပေ။ သော ဒါတာ ဟောတိ ဖေဂ္ဂုဂန္ဓာနံ။ သော ဒါတာ ဟောတိ တစဂန္ဓာနံ။ သော ဒါတာ ဟောတိ ပပဋိကဂန္ဓာနံ။ သော ဒါတာ ဟောတိ ပတ္တဂန္ဓာနံ။ သော ဒါတာ ဟောတိ ပုပ္ဖဂန္ဓာနံ။ သော ဒါတာ ဟောတိ ဖလဂန္ဓာနံ။ သော ဒါတာ ဟောတိ ရသဂန္ဓာနံ။ သော ဒါတာ ဟောတိ ဂန္ဓဂန္ဓာနံ. သော ကာယဿ ဘေဒါ ပရံ မရဏာ ဂန္ဓဂန္ဓေ အဓိဝတ္ထာနံ ဒေဝါနံ သဟဗျတံ ဥပပဇ္ဇတိ. အယံ ခေါ၊ ဘိက္ခု၊ ဟေတု၊ အယံ ပစ္စယော၊ ယေန မိဓေကစ္စော ကာယဿ ဘေဒါ ပရံ မရဏာ ဂန္ဓဂန္ဓေ အဓိဝတ္ထာနံ ဒေဝါနံ သဟဗျတံ ဥပပဇ္ဇတီ’’တိ. ဒွါဒသမံ.