၁. သုဒ္ဓိကသုတ္တံ

၄၃၈. ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ ။ပေ။ ဘဂဝါ ဧတဒဝေါစ – ‘‘ဂန္ဓဗ္ဗကာယိကေ ဝေါ၊ ဘိက္ခဝေ၊ ဒေဝေ ဒေသေဿာမိ. တံ သုဏာထ. ကတမာ စ၊ ဘိက္ခဝေ၊ ဂန္ဓဗ္ဗကာယိကာ ဒေဝါ? သန္တိ၊ ဘိက္ခဝေ၊ မူလဂန္ဓေ အဓိဝတ္ထာ ဒေဝါ. သန္တိ၊ ဘိက္ခဝေ၊ သာရဂန္ဓေ အဓိဝတ္ထာ ဒေဝါ. သန္တိ၊ ဘိက္ခဝေ၊ ဖေဂ္ဂုဂန္ဓေ အဓိဝတ္ထာ ဒေဝါ. သန္တိ၊ ဘိက္ခဝေ၊ တစဂန္ဓေ အဓိဝတ္ထာ ဒေဝါ. သန္တိ၊ ဘိက္ခဝေ၊ ပပဋိကဂန္ဓေ အဓိဝတ္ထာ ဒေဝါ. သန္တိ၊ ဘိက္ခဝေ၊ ပတ္တဂန္ဓေ အဓိဝတ္ထာ ဒေဝါ. သန္တိ၊ ဘိက္ခဝေ၊ ပုပ္ဖဂန္ဓေ အဓိဝတ္ထာ ဒေဝါ. သန္တိ၊ ဘိက္ခဝေ၊ ဖလဂန္ဓေ အဓိဝတ္ထာ ဒေဝါ. သန္တိ၊ ဘိက္ခဝေ၊ ရသဂန္ဓေ အဓိဝတ္ထာ ဒေဝါ. သန္တိ၊ ဘိက္ခဝေ၊ ဂန္ဓဂန္ဓေ အဓိဝတ္ထာ ဒေဝါ. ဣမေ ဝုစ္စန္တိ၊ ဘိက္ခဝေ၊ ဂန္ဓဗ္ဗကာယိကာ ဒေဝါ’’တိ. ပဌမံ.