၂. ပရိညသုတ္တံ

၂၃. သာဝတ္ထိနိဒါနံ. ‘‘ပရိညေယျေ စ၊ ဘိက္ခဝေ၊ ဓမ္မေ ဒေသေဿာမိ ပရိညဉ္စ. တံ သုဏာထ. ကတမေ စ၊ ဘိက္ခဝေ၊ ပရိညေယျာ ဓမ္မာ? ရူပံ၊ ဘိက္ခဝေ၊ ပရိညေယျော ဓမ္မော၊ ဝေဒနာ ပရိညေယျော ဓမ္မော၊ သညာ ပရိညေယျော ဓမ္မော၊ သင်္ခါရာ ပရိညေယျော ဓမ္မော၊ ဝိညာဏံ ပရိညေယျော ဓမ္မော. ဣမေ ဝုစ္စန္တိ၊ ဘိက္ခဝေ၊ ပရိညေယျာ ဓမ္မာ. ကတမာ စ၊ ဘိက္ခဝေ၊ ပရိညာ? ယော၊ ဘိက္ခဝေ၊ ရာဂက္ခယော ဒေါသက္ခယော မောဟက္ခယော. အယံ ဝုစ္စတိ၊ ဘိက္ခဝေ၊ ပရိညာ’’တိ. ဒုတိယံ.