၁၁. ပဘင်္ဂုသုတ္တံ

၃၂. သာဝတ္ထိနိဒါနံ. ‘‘ပဘင်္ဂုဉ္စ၊ ဘိက္ခဝေ၊ ဒေသေဿာမိ အပ္ပဘင်္ဂုဉ္စ. တံ သုဏာထ. ကိဉ္စ၊ ဘိက္ခဝေ၊ ပဘင်္ဂု၊ ကိံ အပ္ပဘင်္ဂု? ရူပံ၊ ဘိက္ခဝေ၊ ပဘင်္ဂု. ယော တဿ နိရောဓော ဝူပသမော အတ္ထင်္ဂမော၊ ဣဒံ အပ္ပဘင်္ဂု. ဝေဒနာ ပဘင်္ဂု. ယော တဿာ နိရောဓော ဝူပသမော အတ္ထင်္ဂမော၊ ဣဒံ အပ္ပဘင်္ဂု. သညာ ပဘင်္ဂု။ သင်္ခါရာ ပဘင်္ဂု. ယော တေသံ နိရောဓော ဝူပသမော အတ္ထင်္ဂမော၊ ဣဒံ အပ္ပဘင်္ဂု. ဝိညာဏံ ပဘင်္ဂု. ယော တဿ နိရောဓော ဝူပသမော အတ္ထင်္ဂမော၊ ဣဒံ အပ္ပဘင်္ဂူ’’တိ. ဧကာဒသမံ.

ဘာရဝဂ္ဂေါ တတိယော.

တဿုဒ္ဒါနံ –

ဘာရံ ပရိညံ အဘိဇာနံ၊ ဆန္ဒရာဂံ စတုတ္ထကံ၊

အဿာဒါ စ တယော ဝုတ္တာ၊ အဘိနန္ဒနမဋ္ဌမံ၊

ဥပ္ပါဒံ အဃမူလဉ္စ၊ ဧကာဒသမော ပဘင်္ဂူတိ.