၁၁. နိဗ္ဗိဒါဗဟုလသုတ္တံ

၁၄၆. သာဝတ္ထိနိဒါနံ. ‘‘သဒ္ဓါပဗ္ဗဇိတဿ၊ ဘိက္ခဝေ၊ ကုလပုတ္တဿ အယမနုဓမ္မော ဟောတိ – ယံ ရူပေ နိဗ္ဗိဒါဗဟုလော [နိဗ္ဗိဒါဗဟုလံ (သျာ. ကံ. ပီ. က.)] ဝိဟရေယျ. ဝေဒနာယ။ပေ။ သညာယ။ သင်္ခါရေသု။ ဝိညာဏေ နိဗ္ဗိဒါဗဟုလော ဝိဟရေယျ. ယော ရူပေ နိဗ္ဗိဒါဗဟုလော ဝိဟရန္တော၊ ဝေဒနာယ။ သညာယ။ သင်္ခါရေသု။ ဝိညာဏေ နိဗ္ဗိဒါဗဟုလော ဝိဟရန္တော ရူပံ ပရိဇာနာတိ၊ ဝေဒနံ။ သညံ။ သင်္ခါရေ။ ဝိညာဏံ ပရိဇာနာတိ၊ သော ရူပံ ပရိဇာနံ ဝေဒနံ ပရိဇာနံ သညံ ပရိဇာနံ သင်္ခါရေ ပရိဇာနံ ဝိညာဏံ ပရိဇာနံ ပရိမုစ္စတိ ရူပမှာ၊ ပရိမုစ္စတိ ဝေဒနာယ၊ ပရိမုစ္စတိ သညာယ၊ ပရိမုစ္စတိ သင်္ခါရေဟိ၊ ပရိမုစ္စတိ ဝိညာဏမှာ၊ ပရိမုစ္စတိ ဇာတိယာ ဇရာယ မရဏေန သောကေဟိ ပရိဒေဝေဟိ ဒုက္ခေဟိ ဒေါမနဿေဟိ ဥပါယာသေဟိ၊ ‘ပရိမုစ္စတိ ဒုက္ခသ္မာ’တိ ဝဒါမီ’’တိ. ဧကာဒသမံ.