၄. ပရိညေယျသုတ္တံ

၁၀၆. သာဝတ္ထိနိဒါနံ. ‘‘ပရိညေယျေ စ၊ ဘိက္ခဝေ၊ ဓမ္မေ ဒေသေဿာမိ ပရိညဉ္စ ပရိညာတာဝိဉ္စ ပုဂ္ဂလံ. တံ သုဏာထ. ကတမေ စ၊ ဘိက္ခဝေ၊ ပရိညေယျာ ဓမ္မာ? ရူပံ၊ ဘိက္ခဝေ၊ ပရိညေယျော ဓမ္မော. ဝေဒနာ။ပေ။ သညာ။ သင်္ခါရာ။ ဝိညာဏံ ပရိညေယျော ဓမ္မော. ဣမေ ဝုစ္စန္တိ၊ ဘိက္ခဝေ၊ ပရိညေယျာ ဓမ္မာ. ကတမာ စ၊ ဘိက္ခဝေ၊ ပရိညာ? ရာဂက္ခယော၊ ဒေါသက္ခယော၊ မောဟက္ခယော – အယံ ဝုစ္စတိ၊ ဘိက္ခဝေ၊ ပရိညာ. ကတမော စ၊ ဘိက္ခဝေ၊ ပရိညာတာဝီ ပုဂ္ဂလော? အရဟာတိဿ ဝစနီယံ. ယွာယံ အာယသ္မာ ဧဝံနာမော ဧဝံဂေါတ္တော – အယံ ဝုစ္စတိ၊ ဘိက္ခဝေ၊ ပရိညာတာဝီ ပုဂ္ဂလော’’တိ. စတုတ္ထံ.