၁. အန္တသုတ္တံ

၁၀၃. သာဝတ္ထိနိဒါနံ. ‘‘စတ္တာရောမေ၊ ဘိက္ခဝေ၊ အန္တာ. ကတမေ စတ္တာရော? သက္ကာယန္တော၊ သက္ကာယသမုဒယန္တော၊ သက္ကာယနိရောဓန္တော၊ သက္ကာယနိရောဓဂါမိနိပ္ပဋိပဒန္တော. ကတမော စ၊ ဘိက္ခဝေ၊ သက္ကာယန္တော? ပဉ္စုပါဒါနက္ခန္ဓာတိဿ ဝစနီယံ. ကတမေ ပဉ္စ? သေယျထိဒံ – ရူပုပါဒါနက္ခန္ဓော၊ ဝေဒနုပါဒါနက္ခန္ဓော၊ သညုပါဒါနက္ခန္ဓော၊ သင်္ခါရုပါဒါနက္ခန္ဓော၊ ဝိညာဏုပါဒါနက္ခန္ဓော – အယံ ဝုစ္စတိ၊ ဘိက္ခဝေ၊ သက္ကာယန္တော’’.

‘‘ကတမော စ၊ ဘိက္ခဝေ၊ သက္ကာယသမုဒယန္တော? ယာယံ တဏှာ ပေါနောဘဝိကာ နန္ဒိရာဂသဟဂတာ တတြတတြာဘိနန္ဒိနီ၊ သေယျထိဒံ – ကာမတဏှာ၊ ဘဝတဏှာ၊ ဝိဘဝတဏှာ. အယံ ဝုစ္စတိ၊ ဘိက္ခဝေ၊ သက္ကာယသမုဒယန္တော.

‘‘ကတမော စ၊ ဘိက္ခဝေ၊ သက္ကာယနိရောဓန္တော? ယော တဿာယေဝ တဏှာယ အသေသဝိရာဂနိရောဓော စာဂေါ ပဋိနိဿဂ္ဂေါ မုတ္တိ အနာလယော – အယံ ဝုစ္စတိ၊ ဘိက္ခဝေ၊ သက္ကာယနိရောဓန္တော.

‘‘ကတမော စ၊ ဘိက္ခဝေ၊ သက္ကာယနိရောဓဂါမိနိပ္ပဋိပဒန္တော? အယမေဝ အရိယော အဋ္ဌင်္ဂိကော မဂ္ဂေါ. သေယျထိဒံ – သမ္မာဒိဋ္ဌိ၊ သမ္မာသင်္ကပ္ပေါ၊ သမ္မာဝါစာ၊ သမ္မာကမ္မန္တော၊ သမ္မာအာဇီဝေါ၊ သမ္မာဝါယာမော၊ သမ္မာသတိ၊ သမ္မာသမာဓိ. အယံ ဝုစ္စတိ၊ ဘိက္ခဝေ၊ သက္ကာယနိရောဓဂါမိနိပ္ပဋိပဒန္တော. ဣမေ ခေါ၊ ဘိက္ခဝေ၊ စတ္တာရော အန္တာ’’တိ. ပဌမံ.