၅. ဝေဒနာသုတ္တံ

၁၉၂. သာဝတ္ထိယံ ဝိဟရတိ။ပေ။ ‘‘တံ ကိံ မညသိ၊ ရာဟုလ၊ စက္ခုသမ္ဖဿဇာ ဝေဒနာ နိစ္စာ ဝါ အနိစ္စာ ဝါ’’တိ? ‘‘အနိစ္စာ၊ ဘန္တေ’’။ပေ။ ‘‘သောတသမ္ဖဿဇာ ဝေဒနာ။ပေ။ ဃာနသမ္ဖဿဇာ ဝေဒနာ။ ဇိဝှါသမ္ဖဿဇာ ဝေဒနာ။ ကာယသမ္ဖဿဇာ ဝေဒနာ။ မနောသမ္ဖဿဇာ ဝေဒနာ နိစ္စာ ဝါ အနိစ္စာ ဝါ’’တိ? ‘‘အနိစ္စာ၊ ဘန္တေ’’။ပေ။ ‘‘ဧဝံ ပဿံ၊ ရာဟုလ၊ သုတဝါ အရိယသာဝကော စက္ခုသမ္ဖဿဇာယ ဝေဒနာယပိ နိဗ္ဗိန္ဒတိ။ပေ။ သောတ။ ဃာန။ ဇိဝှါ။ ကာယ။ မနောသမ္ဖဿဇာယ ဝေဒနာယပိ နိဗ္ဗိန္ဒတိ။ပေ။ ပဇာနာတီ’’တိ. ပဉ္စမံ.