၄. သမ္ဖဿသုတ္တံ

၁၉၁. သာဝတ္ထိယံ ဝိဟရတိ။ပေ။ ‘‘တံ ကိံ မညသိ၊ ရာဟုလ၊ စက္ခုသမ္ဖဿော နိစ္စော ဝါ အနိစ္စော ဝါ’’တိ? ‘‘အနိစ္စော၊ ဘန္တေ’’။ပေ။ ‘‘သောတသမ္ဖဿော။ပေ။ ဃာနသမ္ဖဿော။ ဇိဝှါသမ္ဖဿော။ ကာယသမ္ဖဿော။ မနောသမ္ဖဿော နိစ္စော ဝါ အနိစ္စော ဝါ’’တိ? ‘‘အနိစ္စော၊ ဘန္တေ’’။ပေ။ ‘‘ဧဝံ ပဿံ၊ ရာဟုလ၊ သုတဝါ အရိယသာဝကော စက္ခုသမ္ဖဿသ္မိမ္ပိ နိဗ္ဗိန္ဒတိ။ပေ။ သောတသမ္ဖဿသ္မိမ္ပိ နိဗ္ဗိန္ဒတိ။ ဃာနသမ္ဖဿသ္မိမ္ပိ နိဗ္ဗိန္ဒတိ။ ဇိဝှါသမ္ဖဿသ္မိမ္ပိ နိဗ္ဗိန္ဒတိ။ ကာယသမ္ဖဿသ္မိမ္ပိ နိဗ္ဗိန္ဒတိ။ မနောသမ္ဖဿသ္မိမ္ပိ နိဗ္ဗိန္ဒတိ၊ နိဗ္ဗိန္ဒံ ဝိရဇ္ဇတိ။ပေ။ ပဇာနာတီ’’တိ. စတုတ္ထံ.