၈. သိင်္ဂါလသုတ္တံ

၁၆၄. သာဝတ္ထိယံ ဝိဟရတိ။ပေ။ ‘‘ဒါရုဏော၊ ဘိက္ခဝေ၊ လာဘသက္ကာရသိလောကော။ပေ။ အဓိဂမာယ. အဿုတ္ထ နော တုမှေ၊ ဘိက္ခဝေ၊ ရတ္တိယာ ပစ္စူသသမယံ ဇရသိင်္ဂါလဿ [သိင်္ဂါလဿ (က.)၊ ဇရသိဂါလဿ (သီ. သျာ. ကံ.)] ဝဿမာနဿာ’’တိ? ‘‘ဧဝံ၊ ဘန္တေ’’. ‘‘ဧသော ခေါ၊ ဘိက္ခဝေ၊ ဇရသိင်္ဂါလော ဥက္ကဏ္ဍကေန [ဥက္ကဏ္ဍကေန (သီ.)၊ ဥက္ကဏ္ဏကေန (သျာ. ကံ. ပီ.)] နာမ ရောဂဇာတေန ဖုဋ္ဌော နေဝ ဗိလဂတော ရမတိ၊ န ရုက္ခမူလဂတော ရမတိ၊ န အဇ္ဈောကာသဂတော ရမတိ၊ ယေန ယေန ဂစ္ဆတိ၊ ယတ္ထ ယတ္ထ တိဋ္ဌတိ၊ ယတ္ထ ယတ္ထ နိသီဒတိ၊ ယတ္ထ ယတ္ထ နိပဇ္ဇတိ၊ တတ္ထ တတ္ထ အနယဗျသနံ အာပဇ္ဇတိ. ဧဝမေဝ ခေါ၊ ဘိက္ခဝေ၊ ဣဓေကစ္စော ဘိက္ခု လာဘသက္ကာရသိလောကေန အဘိဘူတော ပရိယာဒိဏ္ဏစိတ္တော နေဝ သုညာဂါရဂတော ရမတိ၊ န ရုက္ခမူလဂတော ရမတိ၊ န အဇ္ဈောကာသဂတော ရမတိ၊ ယေန ယေန ဂစ္ဆတိ၊ ယတ္ထ ယတ္ထ တိဋ္ဌတိ၊ ယတ္ထ ယတ္ထ နိသီဒတိ၊ ယတ္ထ ယတ္ထ နိပဇ္ဇတိ၊ တတ္ထ တတ္ထ အနယဗျသနံ အာပဇ္ဇတိ. ဧဝံ ဒါရုဏော ခေါ၊ ဘိက္ခဝေ၊ လာဘသက္ကာရသိလောကော။ပေ။ ဧဝဉှိ ဝေါ၊ ဘိက္ခဝေ၊ သိက္ခိတဗ္ဗ’’န္တိ. အဋ္ဌမံ.