၁. ပဌမဝဂ္ဂေါ

၁. ဒါရုဏသုတ္တံ

၁၅၇. ဧဝံ မေ သုတံ – ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တတြ ခေါ ဘဂဝါ ဘိက္ခူ အာမန္တေသိ – ‘‘ဘိက္ခဝေါ’’တိ. ‘‘ဘဒန္တေ’’တိ တေ ဘိက္ခူ ဘဂဝတော ပစ္စဿောသုံ. ဘဂဝါ ဧတဒဝေါစ –

‘‘ဒါရုဏော၊ ဘိက္ခဝေ၊ လာဘသက္ကာရသိလောကော ကဋုကော ဖရုသော အန္တရာယိကော အနုတ္တရဿ ယောဂက္ခေမဿ အဓိဂမာယ. တသ္မာတိဟ၊ ဘိက္ခဝေ၊ ဧဝံ သိက္ခိတဗ္ဗံ – ‘ဥပ္ပန္နံ လာဘသက္ကာရသိလောကံ ပဇဟိဿာမ၊ န စ နော ဥပ္ပန္နော လာဘသက္ကာရသိလောကော စိတ္တံ ပရိယာဒါယ ဌဿတီ’တိ. ဧဝဉှိ ဝေါ၊ ဘိက္ခဝေ၊ သိက္ခိတဗ္ဗ’’န္တိ. ပဌမံ.

၂. ဗဠိသသုတ္တံ

၁၅၈. သာဝတ္ထိယံ ဝိဟရတိ။ပေ။ ‘‘ဒါရုဏော၊ ဘိက္ခဝေ၊ လာဘသက္ကာရသိလောကော ကဋုကော ဖရုသော အန္တရာယိကော အနုတ္တရဿ ယောဂက္ခေမဿ အဓိဂမာယ. သေယျထာပိ၊ ဘိက္ခဝေ၊ ဗာဠိသိကော အာမိသဂတံ ဗဠိသံ ဂမ္ဘီရေ ဥဒကရဟဒေ ပက္ခိပေယျ. တမေနံ အညတရော အာမိသစက္ခု မစ္ဆော ဂိလေယျ. ဧဝဉှိ သော၊ ဘိက္ခဝေ၊ မစ္ဆော ဂိလဗဠိသော ဗာဠိသိကဿ အနယံ အာပန္နော ဗျသနံ အာပန္နော ယထာကာမကရဏီယော ဗာဠိသိကဿ’’.

‘‘ဗာဠိသိကောတိ ခေါ၊ ဘိက္ခဝေ၊ မာရဿေတံ ပါပိမတော အဓိဝစနံ. ဗဠိသန္တိ ခေါ၊ ဘိက္ခဝေ၊ လာဘသက္ကာရသိလောကဿေတံ အဓိဝစနံ. ယော ဟိ ကောစိ၊ ဘိက္ခဝေ၊ ဘိက္ခု ဥပ္ပန္နံ လာဘသက္ကာရသိလောကံ အဿာဒေတိ နိကာမေတိ၊ အယံ ဝုစ္စတိ၊ ဘိက္ခဝေ၊ ဘိက္ခု ဂိလဗဠိသော မာရဿ အနယံ အာပန္နော ဗျသနံ အာပန္နော ယထာကာမကရဏီယော ပါပိမတော. ဧဝံ ဒါရုဏော ခေါ၊ ဘိက္ခဝေ၊ လာဘသက္ကာရသိလောကော ကဋုကော ဖရုသော အန္တရာယိကော အနုတ္တရဿ ယောဂက္ခေမဿ အဓိဂမာယ. တသ္မာတိဟ၊ ဘိက္ခဝေ၊ ဧဝံ သိက္ခိတဗ္ဗံ – ‘ဥပ္ပန္နံ လာဘသက္ကာရသိလောကံ ပဇဟိဿာမ၊ န စ နော ဥပ္ပန္နော လာဘသက္ကာရသိလောကော စိတ္တံ ပရိယာဒါယ ဌဿတီ’တိ. ဧဝဉှိ ဝေါ၊ ဘိက္ခဝေ၊ သိက္ခိတဗ္ဗ’’န္တိ. ဒုတိယံ.

၃. ကုမ္မသုတ္တံ

၁၅၉. သာဝတ္ထိယံ ဝိဟရတိ။ပေ။ ‘‘ဒါရုဏော၊ ဘိက္ခဝေ၊ လာဘသက္ကာရသိလောကော။ပေ။ အဓိဂမာယ. ဘူတပုဗ္ဗံ၊ ဘိက္ခဝေ၊ အညတရသ္မိံ ဥဒကရဟဒေ မဟာကုမ္မကုလံ စိရနိဝါသိ အဟောသိ. အထ ခေါ၊ ဘိက္ခဝေ၊ အညတရော ကုမ္မော အညတရံ ကုမ္မံ ဧတဒဝေါစ – ‘မာ ခေါ တွံ၊ တာတ ကုမ္မ၊ ဧတံ ပဒေသံ အဂမာသီ’တိ. အဂမာသိ ခေါ၊ ဘိက္ခဝေ၊ သော ကုမ္မော တံ ပဒေသံ. တမေနံ လုဒ္ဒေါ ပပတာယ ဝိဇ္ဈိ. အထ ခေါ၊ ဘိက္ခဝေ၊ သော ကုမ္မော ယေန သော ကုမ္မော တေနုပသင်္ကမိ. အဒ္ဒသာ ခေါ၊ ဘိက္ခဝေ၊ သော ကုမ္မော တံ ကုမ္မံ ဒူရတောဝ အာဂစ္ဆန္တံ. ဒိသွာန တံ ကုမ္မံ ဧတဒဝေါစ – ‘ကစ္စိ တွံ၊ တာတ ကုမ္မ၊ န တံ ပဒေသံ အဂမာသီ’တိ? ‘အဂမာသိံ ခွာဟံ၊ တာတ ကုမ္မ၊ တံ ပဒေသ’န္တိ. ‘ကစ္စိ ပနာသိ၊ တာတ ကုမ္မ၊ အက္ခတော အနုပဟတော’တိ? ‘အက္ခတော ခေါမှိ၊ တာတ ကုမ္မ၊ အနုပဟတော၊ အတ္ထိ စ မေ ဣဒံ သုတ္တကံ ပိဋ္ဌိတော ပိဋ္ဌိတော အနုဗန္ဓ’န္တိ. ‘တဂ္ဃသိ၊ တာတ ကုမ္မ၊ ခတော၊ တဂ္ဃ ဥပဟတော. ဧတေန ဟိ တေ၊ တာတ ကုမ္မ၊ သုတ္တကေန ပိတရော စ ပိတာမဟာ စ အနယံ အာပန္နာ ဗျသနံ အာပန္နာ. ဂစ္ဆ ဒါနိ တွံ၊ တာတ ကုမ္မ၊ န ဒါနိ တွံ အမှာက’’’န္တိ.

‘‘လုဒ္ဒေါတိ ခေါ၊ ဘိက္ခဝေ၊ မာရဿေတံ ပါပိမတော အဓိဝစနံ. ပပတာတိ ခေါ၊ ဘိက္ခဝေ၊ လာဘသက္ကာရသိလောကဿေတံ အဓိဝစနံ. သုတ္တကန္တိ ခေါ၊ ဘိက္ခဝေ၊ နန္ဒိရာဂဿေတံ အဓိဝစနံ. ယော ဟိ ကောစိ၊ ဘိက္ခဝေ၊ ဘိက္ခု ဥပ္ပန္နံ လာဘသက္ကာရသိလောကံ အဿာဒေတိ နိကာမေတိ – အယံ ဝုစ္စတိ၊ ဘိက္ခဝေ၊ ဘိက္ခု ဂိဒ္ဓေါ ပပတာယ [ဘိက္ခု ပပတာယ (သျာ. ကံ.)၊ ဘိက္ခု ဝိဒ္ဓေါ ပပတာယ (?)] အနယံ အာပန္နော ဗျသနံ အာပန္နော ယထာကာမကရဏီယော ပါပိမတော. ဧဝံ ဒါရုဏော ခေါ၊ ဘိက္ခဝေ၊ လာဘသက္ကာရသိလောကော။ပေ။ ဧဝဉှိ ဝေါ၊ ဘိက္ခဝေ၊ သိက္ခိတဗ္ဗ’’န္တိ. တတိယံ.

၄. ဒီဃလောမိကသုတ္တံ

၁၆၀. သာဝတ္ထိယံ ဝိဟရတိ။ပေ။ ‘‘ဒါရုဏော၊ ဘိက္ခဝေ၊ လာဘသက္ကာရသိလောကော။ပေ။ အဓိဂမာယ. သေယျထာပိ၊ ဘိက္ခဝေ၊ ဒီဃလောမိကာ ဧဠကာ ကဏ္ဋကဂဟနံ ပဝိသေယျ. သာ တတြ တတြ သဇ္ဇေယျ၊ တတြ တတြ ဂယှေယျ [ဂစ္ဆေယျ (သီ.)၊ ဂဏှေယျ (သျာ. ကံ. ပီ. က.)]၊ တတြ တတြ ဗဇ္ဈေယျ၊ တတြ တတြ အနယဗျသနံ အာပဇ္ဇေယျ. ‘ဧဝမေဝ ခေါ၊ ဘိက္ခဝေ၊ ဣဓေကစ္စော ဘိက္ခု လာဘသက္ကာရသိလောကေန အဘိဘူတော ပရိယာဒိဏ္ဏစိတ္တော ပုဗ္ဗဏှသမယံ နိဝါသေတွာ ပတ္တစီဝရမာဒါယ ဂါမံ ဝါ နိဂမံ ဝါ ပိဏ္ဍာယ ပဝိသတိ. သော တတြ တတြ သဇ္ဇတိ၊ တတြ တတြ ဂယှတိ၊ တတြ တတြ ဗဇ္ဈတိ၊ တတြ တတြ အနယဗျသနံ အာပဇ္ဇတိ. ဧဝံ ဒါရုဏော ခေါ၊ ဘိက္ခဝေ၊ လာဘသက္ကာရသိလောကော။ပေ။ ဧဝဉှိ ဝေါ၊ ဘိက္ခဝေ၊ သိက္ခိတဗ္ဗ’’’န္တိ. စတုတ္ထံ.

၅. မီဠှကသုတ္တံ

၁၆၁. သာဝတ္ထိယံ ဝိဟရတိ။ပေ။ ‘‘ဒါရုဏော၊ ဘိက္ခဝေ၊ လာဘသက္ကာရသိလောကော။ပေ။ အဓိဂမာယ. သေယျထာပိ၊ ဘိက္ခဝေ၊ မီဠှကာ ဂူထာဒီ ဂူထပူရာ ပုဏ္ဏာ ဂူထဿ. ပုရတော စဿ မဟာဂူထပုဉ္ဇော. သာ တေန အညာ မီဠှကာ အတိမညေယျ – ‘အဟမှိ ဂူထာဒီ ဂူထပူရာ ပုဏ္ဏာ ဂူထဿ၊ ပုရတော စ မျာယံ မဟာဂူထပုဉ္ဇော’တိ. ဧဝမေဝ ခေါ၊ ဘိက္ခဝေ၊ ဣဓေကစ္စော ဘိက္ခု လာဘသက္ကာရသိလောကေန အဘိဘူတော ပရိယာဒိဏ္ဏစိတ္တော ပုဗ္ဗဏှသမယံ နိဝါသေတွာ ပတ္တစီဝရမာဒါယ ဂါမံ ဝါ နိဂမံ ဝါ ပိဏ္ဍာယ ပဝိသတိ. သော တတ္ထ ဘုတ္တာဝီ စ ဟောတိ ယာဝဒတ္ထော၊ နိမန္တိတော စ သွာတနာယ၊ ပိဏ္ဍပါတော စဿ ပူရော. သော အာရာမံ ဂန္တွာ ဘိက္ခုဂဏဿ မဇ္ဈေ ဝိကတ္ထတိ – ‘ဘုတ္တာဝီ စမှိ ယာဝဒတ္ထော၊ နိမန္တိတော စမှိ သွာတနာယ၊ ပိဏ္ဍပါတော စ မျာယံ ပူရော၊ လာဘီ စမှိ စီဝရ-ပိဏ္ဍပါတ-သေနာသန-ဂိလာနပ္ပစ္စယ-ဘေသဇ္ဇပရိက္ခာရာနံ၊ ဣမေ ပနညေ ဘိက္ခူ အပ္ပပုညာ အပ္ပေသက္ခာ န လာဘိနော စီဝရ-ပိဏ္ဍပါတသေနာသန-ဂိလာနပ္ပစ္စယ-ဘေသဇ္ဇ-ပရိက္ခာရာန’န္တိ. သော တေန လာဘသက္ကာရသိလောကေန အဘိဘူတော ပရိယာဒိဏ္ဏစိတ္တော အညေ ပေသလေ ဘိက္ခူ အတိမညတိ. တဉှိ တဿ၊ ဘိက္ခဝေ၊ မောဃပုရိသဿ ဟောတိ ဒီဃရတ္တံ အဟိတာယ ဒုက္ခာယ. ဧဝံ ဒါရုဏော ခေါ၊ ဘိက္ခဝေ၊ လာဘသက္ကာရသိလောကော။ပေ။ ဧဝဉှိ ဝေါ ဘိက္ခဝေ၊ သိက္ခိတဗ္ဗ’’န္တိ. ပဉ္စမံ.

၆. အသနိသုတ္တံ

၁၆၂. သာဝတ္ထိယံ ဝိဟရတိ။ပေ။ ‘‘ဒါရုဏော၊ ဘိက္ခဝေ၊ လာဘသက္ကာရသိလောကော။ပေ။ အဓိဂမာယ. [ဥပရိ တတိယဝဂ္ဂေ တတိယစတုတ္ထသုတ္တေသု ‘‘မာ စ ခေါ တွံ တာတ သေခံ။ အနုပါပုဏာတူ’’တိ အာဂတံ. တေန နယေန ဣဓာပိ အတ္ထော ဂဟေတဗ္ဗော. ဧတ္ထ ဟိ ကိံ သဒ္ဒေန ပဋိက္ခေပတ္ထောပိ သက္ကာ ဉာတုံ၊ ယထာ ‘‘သယံ အဘိညာယ ကမုဒ္ဒိသေယျ’’န္တိ. တသ္မာ ကံ။ အာဂစ္ဆတူတိ ဧတ္ထ ကမပိ။ မာ အာဂစ္ဆတူတိ စ၊ ကံ သေခံ။ အနုပါပုဏာတူတိ ဧတ္ထ ကမပိ သေခံ။ မာ ပါပုဏာတူတိ စ အတ္ထော ဝေဒိတဗ္ဗော. အဋ္ဌကထာဋီကာသု စ အယမေဝတ္ထော ဉာပိတော] ကံ၊ ဘိက္ခဝေ၊ အသနိဝိစက္ကံ အာဂစ္ဆတု [ဥပရိ တတိယဝဂ္ဂေ တရိယစတုတ္ထသုတ္တေသု ‘‘မာ စ ခေါ တွံ တာတ သေခံ။ အနုပါပုဏာတူ’’တိ အာဂတံ. တေန နယေန ဣဓာပိ အတ္ထော ဂဟေတဗ္ဗော. ဧတ္ထ ဟိ ကိံ သဒ္ဒေန ပဋိက္ခေပတ္ထောပိ သက္ကာ ဉာတုံ၊ ယထာ ‘‘သယံ အဘိညာယ ကမုဒ္ဒိသေယျ’’န္တိ. တသ္မာ ကံ။ အာဂစ္ဆတူတိ ဧတ္ထ ကမပိ။ မာ အာဂစ္ဆတူတိစ၊ တံ သေခံ။ အနုပါပုဏာတူတိ ဧတ္ထ ကမပိ သေခံ။ မာ ပါပုဏာတူတိ စ အတ္ထော ဝေဒိတဗ္ဗော. အဋ္ဌကထာဋီကာသု စ အယမေဝတ္ထော ဉာပိတော]၊ သေခံ [အသနိဝိစက္ကံ၊ တံ သေခံ (ပီ. က.)၊ အသနိဝိစက္ကံ၊ သေခံ (သျာ. ကံ.)၊ အသနိဝိစက္ကံ အာဂစ္ဆတု၊ ကံ သေခံ (?)] အပ္ပတ္တမာနသံ လာဘသက္ကာရသိလောကော အနုပါပုဏာတု’’ [အနုပါပုဏာတိ (ပီ. က.)].

‘‘အသနိဝိစက္ကန္တိ ခေါ၊ ဘိက္ခဝေ၊ လာဘသက္ကာရသိလောကဿေတံ အဓိဝစနံ. ဧဝံ ဒါရုဏော ခေါ၊ ဘိက္ခဝေ၊ လာဘသက္ကာရသိလောကော။ပေ။ ဧဝဉှိ ဝေါ၊ ဘိက္ခဝေ၊ သိက္ခိတဗ္ဗ’’န္တိ. ဆဋ္ဌံ.

၇. ဒိဒ္ဓသုတ္တံ

၁၆၃. သာဝတ္ထိယံ ဝိဟရတိ။ပေ။ ‘‘ဒါရုဏော၊ ဘိက္ခဝေ၊ လာဘသက္ကာရသိလောကော။ပေ။ အဓိဂမာယ. ကံ၊ ဘိက္ခဝေ၊ ဒိဒ္ဓဂတေန ဝိသလ္လေန သလ္လေန [ဒိဋ္ဌိဂတေန ဝိသလ္လေန (က. သီ.)၊ ဒိဋ္ဌိဂတေန သလ္လေန (သျာ. ကံ.)၊ ဒိဋ္ဌိဂတေန ဝိသလ္လေန သလ္လေန (က.)၊ ဒိဋ္ဌဂတေန ဝိသလ္လေန သလ္လေန (ပီ.)] ဝိဇ္ဈတု၊ သေခံ [ဝိဇ္ဈတု၊ တံ သေခံ (သီ.)၊ ဝိဇ္ဈတိ၊ တံ သေခံ (ပီ. က.)] အပ္ပတ္တမာနသံ လာဘသက္ကာရသိလောကော အနုပါပုဏာတု’’ [အနုပါပုဏာတိ (ပီ. က.)].

‘‘သလ္လန္တိ ခေါ၊ ဘိက္ခဝေ၊ လာဘသက္ကာရသိလောကဿေတံ အဓိဝစနံ. ဧဝံ ဒါရုဏော ခေါ၊ ဘိက္ခဝေ၊ လာဘသက္ကာရသိလောကော။ပေ။ ဧဝဉှိ ဝေါ၊ ဘိက္ခဝေ၊ သိက္ခိတဗ္ဗ’’န္တိ. သတ္တမံ.

၈. သိင်္ဂါလသုတ္တံ

၁၆၄. သာဝတ္ထိယံ ဝိဟရတိ။ပေ။ ‘‘ဒါရုဏော၊ ဘိက္ခဝေ၊ လာဘသက္ကာရသိလောကော။ပေ။ အဓိဂမာယ. အဿုတ္ထ နော တုမှေ၊ ဘိက္ခဝေ၊ ရတ္တိယာ ပစ္စူသသမယံ ဇရသိင်္ဂါလဿ [သိင်္ဂါလဿ (က.)၊ ဇရသိဂါလဿ (သီ. သျာ. ကံ.)] ဝဿမာနဿာ’’တိ? ‘‘ဧဝံ၊ ဘန္တေ’’. ‘‘ဧသော ခေါ၊ ဘိက္ခဝေ၊ ဇရသိင်္ဂါလော ဥက္ကဏ္ဍကေန [ဥက္ကဏ္ဍကေန (သီ.)၊ ဥက္ကဏ္ဏကေန (သျာ. ကံ. ပီ.)] နာမ ရောဂဇာတေန ဖုဋ္ဌော နေဝ ဗိလဂတော ရမတိ၊ န ရုက္ခမူလဂတော ရမတိ၊ န အဇ္ဈောကာသဂတော ရမတိ၊ ယေန ယေန ဂစ္ဆတိ၊ ယတ္ထ ယတ္ထ တိဋ္ဌတိ၊ ယတ္ထ ယတ္ထ နိသီဒတိ၊ ယတ္ထ ယတ္ထ နိပဇ္ဇတိ၊ တတ္ထ တတ္ထ အနယဗျသနံ အာပဇ္ဇတိ. ဧဝမေဝ ခေါ၊ ဘိက္ခဝေ၊ ဣဓေကစ္စော ဘိက္ခု လာဘသက္ကာရသိလောကေန အဘိဘူတော ပရိယာဒိဏ္ဏစိတ္တော နေဝ သုညာဂါရဂတော ရမတိ၊ န ရုက္ခမူလဂတော ရမတိ၊ န အဇ္ဈောကာသဂတော ရမတိ၊ ယေန ယေန ဂစ္ဆတိ၊ ယတ္ထ ယတ္ထ တိဋ္ဌတိ၊ ယတ္ထ ယတ္ထ နိသီဒတိ၊ ယတ္ထ ယတ္ထ နိပဇ္ဇတိ၊ တတ္ထ တတ္ထ အနယဗျသနံ အာပဇ္ဇတိ. ဧဝံ ဒါရုဏော ခေါ၊ ဘိက္ခဝေ၊ လာဘသက္ကာရသိလောကော။ပေ။ ဧဝဉှိ ဝေါ၊ ဘိက္ခဝေ၊ သိက္ခိတဗ္ဗ’’န္တိ. အဋ္ဌမံ.

၉. ဝေရမ္ဘသုတ္တံ

၁၆၅. သာဝတ္ထိယံ ဝိဟရတိ။ပေ။ ‘‘ဒါရုဏော၊ ဘိက္ခဝေ၊ လာဘသက္ကာရသိလောကော။ပေ။ အဓိဂမာယ. ဥပရိ၊ ဘိက္ခဝေ၊ အာကာသေ ဝေရမ္ဘာ [ဝေရမ္ဗာ (သီ. ပီ.)] နာမ ဝါတာ ဝါယန္တိ. တတ္ထ ယော ပက္ခီ ဂစ္ဆတိ တမေနံ ဝေရမ္ဘာ ဝါတာ ခိပန္တိ. တဿ ဝေရမ္ဘဝါတက္ခိတ္တဿ အညေနေဝ ပါဒါ ဂစ္ဆန္တိ၊ အညေန ပက္ခာ ဂစ္ဆန္တိ၊ အညေန သီသံ ဂစ္ဆတိ၊ အညေန ကာယော ဂစ္ဆတိ. ဧဝမေဝ ခေါ၊ ဘိက္ခဝေ၊ ဣဓေကစ္စော ဘိက္ခု လာဘသက္ကာရသိလောကေန အဘိဘူတော ပရိယာဒိဏ္ဏစိတ္တော ပုဗ္ဗဏှသမယံ နိဝါသေတွာ ပတ္တစီဝရမာဒါယ ဂါမံ ဝါ နိဂမံ ဝါ ပိဏ္ဍာယ ပဝိသတိ အရက္ခိတေနေဝ ကာယေန အရက္ခိတာယ ဝါစာယ အရက္ခိတေန စိတ္တေန၊ အနုပဋ္ဌိတာယ သတိယာ၊ အသံဝုတေဟိ ဣန္ဒြိယေဟိ. သော တတ္ထ ပဿတိ မာတုဂါမံ ဒုန္နိဝတ္ထံ ဝါ ဒုပ္ပါရုတံ ဝါ. တဿ မာတုဂါမံ ဒိသွာ ဒုန္နိဝတ္ထံ ဝါ ဒုပ္ပါရုတံ ဝါ ရာဂေါ စိတ္တံ အနုဒ္ဓံသေတိ. သော ရာဂါနုဒ္ဓံသိတေန စိတ္တေန သိက္ခံ ပစ္စက္ခာယ ဟီနာယာဝတ္တတိ. တဿ အညေ စီဝရံ ဟရန္တိ၊ အညေ ပတ္တံ ဟရန္တိ၊ အညေ နိသီဒနံ ဟရန္တိ၊ အညေ သူစိဃရံ ဟရန္တိ၊ ဝေရမ္ဘဝါတက္ခိတ္တဿေဝ သကုဏဿ. ဧဝံ ဒါရုဏော ခေါ၊ ဘိက္ခဝေ၊ လာဘသက္ကာရသိလောကော။ပေ။ ဧဝဉှိ ဝေါ၊ ဘိက္ခဝေ၊ သိက္ခိတဗ္ဗ’’န္တိ. နဝမံ.

၁၀. သဂါထကသုတ္တံ

၁၆၆. သာဝတ္ထိယံ ဝိဟရတိ။ပေ။ ‘‘ဒါရုဏော၊ ဘိက္ခဝေ၊ လာဘသက္ကာရသိလောကော။ပေ။ အဓိဂမာယ. ဣဓာဟံ၊ ဘိက္ခဝေ၊ ဧကစ္စံ ပုဂ္ဂလံ ပဿာမိ သက္ကာရေန အဘိဘူတံ ပရိယာဒိဏ္ဏစိတ္တံ၊ ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပန္နံ. ဣဓ ပနာဟံ၊ ဘိက္ခဝေ၊ ဧကစ္စံ ပုဂ္ဂလံ ပဿာမိ အသက္ကာရေန အဘိဘူတံ ပရိယာဒိဏ္ဏစိတ္တံ၊ ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပန္နံ. ဣဓ ပနာဟံ၊ ဘိက္ခဝေ၊ ဧကစ္စံ ပုဂ္ဂလံ ပဿာမိ သက္ကာရေန စ အသက္ကာရေန စ တဒုဘယေန အဘိဘူတံ ပရိယာဒိဏ္ဏစိတ္တံ၊ ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပန္နံ. ဧဝံ ဒါရုဏော ခေါ၊ ဘိက္ခဝေ၊ လာဘသက္ကာရသိလောကော။ပေ။ ဧဝဉှိ ဝေါ၊ ဘိက္ခဝေ၊ သိက္ခိတဗ္ဗ’’န္တိ.

ဣဒမဝေါစ ဘဂဝါ. ဣဒံ ဝတွာန သုဂတော အထာပရံ ဧတဒဝေါစ သတ္ထာ –

‘‘ယဿ သက္ကရိယမာနဿ၊ အသက္ကာရေန စူဘယံ၊

သမာဓိ န ဝိကမ္ပတိ၊ အပ္ပမာဏဝိဟာရိနော [အပ္ပမာဒဝိဟာရိနော (ပီ. က.) အပ္ပမာဏောတိ ဟေတ္ထ ဖလသမာဓိ၊ န သတိ].

‘‘တံ ဈာယိနံ သာတတိကံ၊ သုခုမံ ဒိဋ္ဌိဝိပဿကံ၊

ဥပါဒါနက္ခယာရာမံ၊ အာဟု သပ္ပုရိသော ဣတီ’’တိ. ဒသမံ၊

ပဌမော ဝဂ္ဂေါ.

တဿုဒ္ဒါနံ –

ဒါရုဏော ဗဠိသံ ကုမ္မံ၊ ဒီဃလောမိ စ မီဠှကံ၊

အသနိ ဒိဒ္ဓံ သိင်္ဂါလံ၊ ဝေရမ္ဘေန သဂါထကန္တိ.