၁၀. သဂါထကသုတ္တံ

၁၆၆. သာဝတ္ထိယံ ဝိဟရတိ။ပေ။ ‘‘ဒါရုဏော၊ ဘိက္ခဝေ၊ လာဘသက္ကာရသိလောကော။ပေ။ အဓိဂမာယ. ဣဓာဟံ၊ ဘိက္ခဝေ၊ ဧကစ္စံ ပုဂ္ဂလံ ပဿာမိ သက္ကာရေန အဘိဘူတံ ပရိယာဒိဏ္ဏစိတ္တံ၊ ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပန္နံ. ဣဓ ပနာဟံ၊ ဘိက္ခဝေ၊ ဧကစ္စံ ပုဂ္ဂလံ ပဿာမိ အသက္ကာရေန အဘိဘူတံ ပရိယာဒိဏ္ဏစိတ္တံ၊ ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပန္နံ. ဣဓ ပနာဟံ၊ ဘိက္ခဝေ၊ ဧကစ္စံ ပုဂ္ဂလံ ပဿာမိ သက္ကာရေန စ အသက္ကာရေန စ တဒုဘယေန အဘိဘူတံ ပရိယာဒိဏ္ဏစိတ္တံ၊ ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပန္နံ. ဧဝံ ဒါရုဏော ခေါ၊ ဘိက္ခဝေ၊ လာဘသက္ကာရသိလောကော။ပေ။ ဧဝဉှိ ဝေါ၊ ဘိက္ခဝေ၊ သိက္ခိတဗ္ဗ’’န္တိ.

ဣဒမဝေါစ ဘဂဝါ. ဣဒံ ဝတွာန သုဂတော အထာပရံ ဧတဒဝေါစ သတ္ထာ –

‘‘ယဿ သက္ကရိယမာနဿ၊ အသက္ကာရေန စူဘယံ၊

သမာဓိ န ဝိကမ္ပတိ၊ အပ္ပမာဏဝိဟာရိနော [အပ္ပမာဒဝိဟာရိနော (ပီ. က.) အပ္ပမာဏောတိ ဟေတ္ထ ဖလသမာဓိ၊ န သတိ].

‘‘တံ ဈာယိနံ သာတတိကံ၊ သုခုမံ ဒိဋ္ဌိဝိပဿကံ၊

ဥပါဒါနက္ခယာရာမံ၊ အာဟု သပ္ပုရိသော ဣတီ’’တိ. ဒသမံ၊

ပဌမော ဝဂ္ဂေါ.

တဿုဒ္ဒါနံ –

ဒါရုဏော ဗဠိသံ ကုမ္မံ၊ ဒီဃလောမိ စ မီဠှကံ၊

အသနိ ဒိဒ္ဓံ သိင်္ဂါလံ၊ ဝေရမ္ဘေန သဂါထကန္တိ.