၆. ဩဝါဒသုတ္တံ

၁၄၉. ရာဇဂဟေ ဝေဠုဝနေ. အထ ခေါ အာယသ္မာ မဟာကဿပေါ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နံ ခေါ အာယသ္မန္တံ မဟာကဿပံ ဘဂဝါ ဧတဒဝေါစ – ‘‘ဩဝဒ၊ ကဿပ၊ ဘိက္ခူ၊ ကရောဟိ၊ ကဿပ၊ ဘိက္ခူနံ ဓမ္မိံ ကထံ. အဟံ ဝါ၊ ကဿပ၊ ဘိက္ခူ ဩဝဒေယျံ တွံ ဝါ၊ အဟံ ဝါ ဘိက္ခူနံ ဓမ္မိံ ကထံ ကရေယျံ တွံ ဝါ’’တိ.

‘‘ဒုဗ္ဗစာ ခေါ၊ ဘန္တေ၊ ဧတရဟိ ဘိက္ခူ၊ ဒေါဝစဿကရဏေဟိ ဓမ္မေဟိ သမန္နာဂတာ၊ အက္ခမာ၊ အပ္ပဒက္ခိဏဂ္ဂါဟိနော အနုသာသနိံ. ဣဓာဟံ၊ ဘန္တေ၊ အဒ္ဒသံ ဘဏ္ဍဉ္စ [ဘဏ္ဍုဉ္စ (သီ.)] နာမ ဘိက္ခုံ အာနန္ဒဿ သဒ္ဓိဝိဟာရိံ အဘိဇိကဉ္စ [အာဘိဉ္ဇိကဉ္စ (သီ. က.)၊ အာဘိဇ္ဇိကဉ္စ (သျာ. ကံ.)] နာမ ဘိက္ခုံ အနုရုဒ္ဓဿ သဒ္ဓိဝိဟာရိံ အညမညံ သုတေန အစ္စာဝဒန္တေ – ‘ဧဟိ၊ ဘိက္ခု၊ ကော ဗဟုတရံ ဘာသိဿတိ၊ ကော သုန္ဒရတရံ ဘာသိဿတိ၊ ကော စိရတရံ ဘာသိဿတီ’’’တိ.

အထ ခေါ ဘဂဝါ အညတရံ ဘိက္ခုံ အာမန္တေသိ – ‘‘ဧဟိ တွံ၊ ဘိက္ခု၊ မမ ဝစနေန ဘဏ္ဍဉ္စ ဘိက္ခုံ အာနန္ဒဿ သဒ္ဓိဝိဟာရိံ အဘိဇိကဉ္စ ဘိက္ခုံ အနုရုဒ္ဓဿ သဒ္ဓိဝိဟာရိံ အာမန္တေဟိ – ‘သတ္ထာ အာယသ္မန္တေ အာမန္တေတီ’’’တိ. ‘‘ဧဝံ၊ ဘန္တေ’’တိ ခေါ သော ဘိက္ခု ဘဂဝတော ပဋိဿုတွာ ယေန တေ ဘိက္ခူ တေနုပသင်္ကမိ၊ ဥပသင်္ကမိတွာ တေ ဘိက္ခူ ဧတဒဝေါစ – ‘‘သတ္ထာ အာယသ္မန္တေ အာမန္တေတီ’’တိ.

‘‘ဧဝမာဝုသော’’တိ ခေါ တေ ဘိက္ခူ တဿ ဘိက္ခုနော ပဋိဿုတွာ ယေန ဘဂဝါ တေနုပသင်္ကမိံသု၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိံသု. ဧကမန္တံ နိသိန္နေ ခေါ တေ ဘိက္ခူ ဘဂဝါ ဧတဒဝေါစ – ‘‘သစ္စံ ကိရ တုမှေ၊ ဘိက္ခဝေ၊ အညမညံ သုတေန အစ္စာဝဒထ – ‘ဧဟိ၊ ဘိက္ခု၊ ကော ဗဟုတရံ ဘာသိဿတိ၊ ကော သုန္ဒရတရံ ဘာသိဿတိ၊ ကော စိရတရံ ဘာသိဿတီ’’’တိ? ‘‘ဧဝံ၊ ဘန္တေ’’. ‘‘ကိံ နု ခေါ မေ တုမှေ၊ ဘိက္ခဝေ၊ ဧဝံ ဓမ္မံ ဒေသိတံ အာဇာနာထ – ‘ဧထ တုမှေ၊ ဘိက္ခဝေ၊ အညမညံ သုတေန အစ္စာဝဒထ – ဧဟိ၊ ဘိက္ခု၊ ကော ဗဟုတရံ ဘာသိဿတိ၊ ကော သုန္ဒရတရံ ဘာသိဿတိ၊ ကော စိရတရံ ဘာသိဿတီ’’’တိ? ‘‘နော ဟေတံ၊ ဘန္တေ’’. ‘‘နော စေ ကိရ မေ တုမှေ၊ ဘိက္ခဝေ၊ ဧဝံ ဓမ္မံ ဒေသိတံ အာဇာနာထ၊ အထ ကိံ စရဟိ တုမှေ၊ မောဃပုရိသာ၊ ကိံ ဇာနန္တာ ကိံ ပဿန္တာ ဧဝံ သွာက္ခာတေ ဓမ္မဝိနယေ ပဗ္ဗဇိတာ သမာနာ အညမညံ သုတေန အစ္စာဝဒထ – ‘ဧဟိ၊ ဘိက္ခု၊ ကော ဗဟုတရံ ဘာသိဿတိ၊ ကော သုန္ဒရတရံ ဘာသိဿတိ၊ ကော စိရတရံ ဘာသိဿတီ’’’တိ.

အထ ခေါ တေ ဘိက္ခူ ဘဂဝတော ပါဒေသု သိရသာ နိပတိတွာ ဘဂဝန္တံ ဧတဒဝေါစုံ – ‘‘အစ္စယော နော၊ ဘန္တေ၊ အစ္စဂမာ၊ ယထာဗာလေ ယထာမူဠှေ ယထာအကုသလေ [ယထာ ဗာလေ ယထာ မူဠှေ ယထာ အကုသလေ (ပီ.)၊ ယထာဗာလံ ယထာမူဠှံ ယထာအကုသလံ (?)]၊ ယေ မယံ ဧဝံ သွာက္ခာတေ ဓမ္မဝိနယေ ပဗ္ဗဇိတာ သမာနာ အညမညံ သုတေန အစ္စာဝဒိမှ – ‘ဧဟိ၊ ဘိက္ခု၊ ကော ဗဟုတရံ ဘာသိဿတိ၊ ကော သုန္ဒရတရံ ဘာသိဿတိ၊ ကော စိရတရံ ဘာသိဿတီ’တိ. တေသံ နော၊ ဘန္တေ၊ ဘဂဝါ အစ္စယံ အစ္စယတော ပဋိဂ္ဂဏှာတု အာယတိံ သံဝရာယာ’’တိ.

‘‘တဂ္ဃ တုမှေ၊ ဘိက္ခဝေ၊ အစ္စယော အစ္စဂမာ ယထာဗာလေ ယထာမူဠှေ ယထာအကုသလေ၊ ယေ တုမှေ ဧဝံ သွာက္ခာတေ ဓမ္မဝိနယေ ပဗ္ဗဇိတာ သမာနာ အညမညံ သုတေန အစ္စာဝဒိတ္ထ – ‘ဧဟိ၊ ဘိက္ခု၊ ကော ဗဟုတရံ ဘာသိဿတိ၊ ကော သုန္ဒရတရံ ဘာသိဿတိ၊ ကော စိရတရံ ဘာသိဿတီ’တိ. ယတော စ ခေါ တုမှေ၊ ဘိက္ခဝေ၊ အစ္စယံ အစ္စယတော ဒိသွာ ယထာဓမ္မံ ပဋိကရောထ၊ တံ ဝေါ မယံ [မယံ အစ္စယံ (သီ.)] ပဋိဂ္ဂဏှာမ. ဝုဒ္ဓိ ဟေသာ၊ ဘိက္ခဝေ၊ အရိယဿ ဝိနယေ ယော အစ္စယံ အစ္စယတော ဒိသွာ ယထာဓမ္မံ ပဋိကရောတိ အာယတိဉ္စ သံဝရံ အာပဇ္ဇတီ’’တိ. ဆဋ္ဌံ.