၇. ဒုတိယဩဝါဒသုတ္တံ

၁၅၀. ရာဇဂဟေ ဝိဟရတိ ဝေဠုဝနေ [သာဝတ္ထိ၊ တတြ-ဧတဒဝေါစ (သီ.)]. အထ ခေါ အာယသ္မာ မဟာကဿပေါ ယေန ဘဂဝါ တေနုပသင်္ကမိ။ပေ။ ဧကမန္တံ နိသိန္နံ ခေါ အာယသ္မန္တံ မဟာကဿပံ ဘဂဝါ ဧတဒဝေါစ – ‘‘ဩဝဒ၊ ကဿပ၊ ဘိက္ခူ၊ ကရောဟိ၊ ကဿပ၊ ဘိက္ခူနံ ဓမ္မိံ ကထံ. အဟံ ဝါ၊ ကဿပ၊ ဘိက္ခူ ဩဝဒေယျံ တွံ ဝါ၊ အဟံ ဝါ ဘိက္ခူနံ ဓမ္မိံ ကထံ ကရေယျံ တွံ ဝါ’’တိ.

‘‘ဒုဗ္ဗစာ ခေါ၊ ဘန္တေ၊ ဧတရဟိ ဘိက္ခူ၊ ဒေါဝစဿကရဏေဟိ ဓမ္မေဟိ သမန္နာဂတာ အက္ခမာ အပ္ပဒက္ခိဏဂ္ဂါဟိနော အနုသာသနိံ. ယဿ ကဿစိ၊ ဘန္တေ၊ သဒ္ဓါ နတ္ထိ ကုသလေသု ဓမ္မေသု၊ ဟိရီ [ဟိရိ (သဗ္ဗတ္ထ)] နတ္ထိ ကုသလေသု ဓမ္မေသု၊ ဩတ္တပ္ပံ နတ္ထိ ကုသလေသု ဓမ္မေသု၊ ဝီရိယံ နတ္ထိ ကုသလေသု ဓမ္မေသု၊ ပညာ နတ္ထိ ကုသလေသု ဓမ္မေသု၊ တဿ ယာ ရတ္တိ ဝါ ဒိဝသော ဝါ အာဂစ္ဆတိ [အာဂစ္ဆန္တိ (သီ.)]၊ ဟာနိယေဝ ပါဋိကင်္ခါ ကုသလေသု ဓမ္မေသု၊ နော ဝုဒ္ဓိ.

‘‘သေယျထာပိ၊ ဘန္တေ၊ ကာဠပက္ခေ စန္ဒဿ ယာ ရတ္တိ ဝါ ဒိဝသော ဝါ အာဂစ္ဆတိ၊ ဟာယတေဝ ဝဏ္ဏေန၊ ဟာယတိ မဏ္ဍလေန၊ ဟာယတိ အာဘာယ၊ ဟာယတိ အာရောဟပရိဏာဟေန. ဧဝမေဝ ခေါ၊ ဘန္တေ၊ ယဿ ကဿစိ သဒ္ဓါ နတ္ထိ ကုသလေသု ဓမ္မေသု။ပေ။ ဟိရီ နတ္ထိ။ ဩတ္တပ္ပံ နတ္ထိ ။ ဝီရိယံ နတ္ထိ။ ပညာ နတ္ထိ။ ကုသလေသု ဓမ္မေသု တဿ ယာ ရတ္တိ ဝါ ဒိဝသော ဝါ အာဂစ္ဆတိ၊ ဟာနိယေဝ ပါဋိကင်္ခါ ကုသလေသု ဓမ္မေသု၊ နော ဝုဒ္ဓိ.

‘‘‘အဿဒ္ဓေါ ပုရိသပုဂ္ဂလော’တိ၊ ဘန္တေ၊ ပရိဟာနမေတံ၊ ‘အဟိရိကော ပုရိသပုဂ္ဂလော’တိ၊ ဘန္တေ၊ ပရိဟာနမေတံ၊ ‘အနောတ္တပ္ပီ ပုရိသပုဂ္ဂလော’တိ၊ ဘန္တေ၊ ပရိဟာနမေတံ၊ ‘ကုသီတော ပုရိသပုဂ္ဂလော’တိ၊ ဘန္တေ၊ ပရိဟာနမေတံ၊ ‘ဒုပ္ပညော ပုရိသပုဂ္ဂလော’တိ၊ ဘန္တေ၊ ပရိဟာနမေတံ၊ ‘ကောဓနော ပုရိသပုဂ္ဂလော’တိ၊ ဘန္တေ၊ ပရိဟာနမေတံ၊ ‘ဥပနာဟီ ပုရိသပုဂ္ဂလော’တိ၊ ဘန္တေ၊ ပရိဟာနမေတံ၊ ‘န သန္တိ ဘိက္ခူ ဩဝါဒကာ’တိ၊ ဘန္တေ၊ ပရိဟာနမေတံ.

‘‘ယဿ ကဿစိ၊ ဘန္တေ၊ သဒ္ဓါ အတ္ထိ ကုသလေသု ဓမ္မေသု၊ ဟိရီ အတ္ထိ ကုသလေသု ဓမ္မေသု၊ ဩတ္တပ္ပံ အတ္ထိ ကုသလေသု ဓမ္မေသု၊ ဝီရိယံ အတ္ထိ ကုသလေသု ဓမ္မေသု၊ ပညာ အတ္ထိ ကုသလေသု ဓမ္မေသု၊ တဿ ယာ ရတ္တိ ဝါ ဒိဝသော ဝါ အာဂစ္ဆတိ၊ ဝုဒ္ဓိယေဝ ပါဋိကင်္ခါ ကုသလေသု ဓမ္မေသု၊ နော ပရိဟာနိ.

‘‘သေယျထာပိ၊ ဘန္တေ၊ ဇုဏှပက္ခေ စန္ဒဿ ယာ ရတ္တိ ဝါ ဒိဝသော ဝါ အာဂစ္ဆတိ၊ ဝဍ္ဎတေဝ ဝဏ္ဏေန၊ ဝဍ္ဎတိ မဏ္ဍလေန၊ ဝဍ္ဎတိ အာဘာယ၊ ဝဍ္ဎတိ အာရောဟပရိဏာဟေန. ဧဝမေဝ ခေါ၊ ဘန္တေ၊ ယဿ ကဿစိ သဒ္ဓါ အတ္ထိ ကုသလေသု ဓမ္မေသု။ ဟိရီ အတ္ထိ။ပေ။ ဩတ္တပ္ပံ အတ္ထိ။ ဝီရိယံ အတ္ထိ။ ပညာ အတ္ထိ ကုသလေသု ဓမ္မေသု တဿ ယာ ရတ္တိ ဝါ ဒိဝသော ဝါ အာဂစ္ဆတိ၊ ဝုဒ္ဓိယေဝ ပါဋိကင်္ခါ ကုသလေသု ဓမ္မေသု၊ နော ပရိဟာနိ.

‘‘‘သဒ္ဓေါ ပုရိသပုဂ္ဂလော’တိ၊ ဘန္တေ၊ အပရိဟာနမေတံ၊ ‘ဟိရိမာ ပုရိသပုဂ္ဂလော’တိ၊ ဘန္တေ၊ အပရိဟာနမေတံ၊ ‘ဩတ္တပ္ပီ ပုရိသပုဂ္ဂလော’တိ၊ ဘန္တေ၊ အပရိဟာနမေတံ၊ ‘အာရဒ္ဓဝီရိယော ပုရိသပုဂ္ဂလော’တိ၊ ဘန္တေ၊ အပရိဟာနမေတံ၊ ‘ပညဝါ ပုရိသပုဂ္ဂလော’တိ၊ ဘန္တေ၊ အပရိဟာနမေတံ၊ ‘အက္ကောဓနော ပုရိသပုဂ္ဂလော’တိ၊ ဘန္တေ၊ အပရိဟာနမေတံ၊ ‘အနုပနာဟီ ပုရိသပုဂ္ဂလော’တိ၊ ဘန္တေ၊ အပရိဟာနမေတံ၊ ‘သန္တိ ဘိက္ခူ ဩဝါဒကာ’တိ၊ ဘန္တေ၊ အပရိဟာနမေတ’’န္တိ.

‘‘သာဓု သာဓု၊ ကဿပ. ယဿ ကဿစိ၊ ကဿပ၊ သဒ္ဓါ နတ္ထိ ကုသလေသု ဓမ္မေသု။ပေ။ ဟိရီ နတ္ထိ။ ဩတ္တပ္ပံ နတ္ထိ။ ဝီရိယံ နတ္ထိ။ ပညာ နတ္ထိ ကုသလေသု ဓမ္မေသု တဿ ယာ ရတ္တိ ဝါ ဒိဝသော ဝါ အာဂစ္ဆတိ၊ ဟာနိယေဝ ပါဋိကင်္ခါ ကုသလေသု ဓမ္မေသု၊ နော ဝုဒ္ဓိ.

‘‘သေယျထာပိ၊ ကဿပ၊ ကာဠပက္ခေ စန္ဒဿ ယာ ရတ္တိ ဝါ ဒိဝသော ဝါ အာဂစ္ဆတိ၊ ဟာယတေဝ ဝဏ္ဏေန။ပေ။ ဟာယတိ အာရောဟပရိဏာဟေန. ဧဝမေဝ ခေါ၊ ကဿပ၊ ယဿ ကဿစိ သဒ္ဓါ နတ္ထိ ကုသလေသု ဓမ္မေသု။ပေ။ ဟိရီ နတ္ထိ။ ဩတ္တပ္ပံ နတ္ထိ။ ဝီရိယံ နတ္ထိ။ ပညာ နတ္ထိ ကုသလေသု ဓမ္မေသု တဿ ယာ ရတ္တိ ဝါ ဒိဝသော ဝါ အာဂစ္ဆတိ၊ ဟာနိယေဝ ပါဋိကင်္ခါ ကုသလေသု ဓမ္မေသု၊ နော ဝုဒ္ဓိ. ‘အဿဒ္ဓေါ ပုရိသပုဂ္ဂလော’တိ၊ ကဿပ၊ ပရိဟာနမေတံ၊ အဟိရိကော။ပေ။ အနောတ္တပ္ပီ။ ကုသီတော။ ဒုပ္ပညော။ ကောဓနော။ ‘ဥပနာဟီ ပုရိသပုဂ္ဂလော’တိ၊ ကဿပ၊ ပရိဟာနမေတံ၊ ‘န သန္တိ ဘိက္ခူ ဩဝါဒကာ’တိ၊ ကဿပ၊ ပရိဟာနမေတံ.

‘‘ယဿ ကဿစိ၊ ကဿပ၊ သဒ္ဓါ အတ္ထိ ကုသလေသု ဓမ္မေသု။ပေ။ ဟိရီ အတ္ထိ။ ဩတ္တပ္ပံ အတ္ထိ။ ဝီရိယံ အတ္ထိ။ ပညာ အတ္ထိ ကုသလေသု ဓမ္မေသု တဿ ယာ ရတ္တိ ဝါ ဒိဝသော ဝါ အာဂစ္ဆတိ၊ ဝုဒ္ဓိယေဝ ပါဋိကင်္ခါ ကုသလေသု ဓမ္မေသု၊ နော ပရိဟာနိ.

‘‘သေယျထာပိ၊ ကဿပ၊ ဇုဏှပက္ခေ စန္ဒဿ ယာ ရတ္တိ ဝါ ဒိဝသော ဝါ အာဂစ္ဆတိ၊ ဝဍ္ဎတေဝ ဝဏ္ဏေန၊ ဝဍ္ဎတိ မဏ္ဍလေန၊ ဝဍ္ဎတိ အာဘာယ၊ ဝဍ္ဎတိ အာရောဟပရိဏာဟေန. ဧဝမေဝ ခေါ၊ ကဿပ၊ ယဿ ကဿစိ သဒ္ဓါ အတ္ထိ ကုသလေသု ဓမ္မေသု ဟိရီ အတ္ထိ။ ဩတ္တပ္ပံ အတ္ထိ။ ဝီရိယံ အတ္ထိ။ ပညာ အတ္ထိ ကုသလေသု ဓမ္မေသု တဿ ယာ ရတ္တိ ဝါ ဒိဝသော ဝါ အာဂစ္ဆတိ၊ ဝုဒ္ဓိယေဝ ပါဋိကင်္ခါ ကုသလေသု ဓမ္မေသု၊ နော ပရိဟာနိ.

‘‘‘သဒ္ဓေါ ပုရိသပုဂ္ဂလော’တိ၊ ကဿပ၊ အပရိဟာနမေတံ၊ ဟိရိမာ။ပေ။ ဩတ္တပ္ပီ။ အာရဒ္ဓဝီရိယော။ ပညဝါ။ အက္ကောဓနော။ ‘အနုပနာဟီ ပုရိသပုဂ္ဂလော’တိ၊ ကဿပ၊ အပရိဟာနမေတံ၊ ‘သန္တိ ဘိက္ခူ ဩဝါဒကာ’တိ၊ ကဿပ၊ အပရိဟာနမေတ’’န္တိ. သတ္တမံ.