၅. ဇိဏ္ဏသုတ္တံ

၁၄၈. ဧဝံ မေ သုတံ။ပေ။ ရာဇဂဟေ ဝေဠုဝနေ. အထ ခေါ အာယသ္မာ မဟာကဿပေါ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နံ ခေါ အာယသ္မန္တံ မဟာကဿပံ ဘဂဝါ ဧတဒဝေါစ – ‘‘ဇိဏ္ဏောသိ ဒါနိ တွံ၊ ကဿပ၊ ဂရုကာနိ စ တေ ဣမာနိ သာဏာနိ ပံသုကူလာနိ နိဗ္ဗသနာနိ. တသ္မာတိဟ တွံ၊ ကဿပ၊ ဂဟပတာနိ [ဂဟပတိကာနိ (သီ.)] စေဝ စီဝရာနိ ဓာရေဟိ၊ နိမန္တနာနိ စ ဘုဉ္ဇာဟိ၊ မမ စ သန္တိကေ ဝိဟရာဟီ’’တိ.

‘‘အဟံ ခေါ၊ ဘန္တေ၊ ဒီဃရတ္တံ အာရညိကော စေဝ အာရညိကတ္တဿ စ ဝဏ္ဏဝါဒီ၊ ပိဏ္ဍပါတိကော စေဝ ပိဏ္ဍပါတိကတ္တဿ စ ဝဏ္ဏဝါဒီ၊ ပံသုကူလိကော စေဝ ပံသုကူလိကတ္တဿ စ ဝဏ္ဏဝါဒီ၊ တေစီဝရိကော စေဝ တေစီဝရိကတ္တဿ စ ဝဏ္ဏဝါဒီ၊ အပ္ပိစ္ဆော စေဝ အပ္ပိစ္ဆတာယ စ ဝဏ္ဏဝါဒီ၊ သန္တုဋ္ဌော စေဝ သန္တုဋ္ဌိယာ စ ဝဏ္ဏဝါဒီ၊ ပဝိဝိတ္တော စေဝ ပဝိဝေကဿ စ ဝဏ္ဏဝါဒီ၊ အသံသဋ္ဌော စေဝ အသံသဂ္ဂဿ စ ဝဏ္ဏဝါဒီ၊ အာရဒ္ဓဝီရိယော စေဝ ဝီရိယာရမ္ဘဿ [ဝီရိယာရဗ္ဘဿ (က.)] စ ဝဏ္ဏဝါဒီ’’တိ.

‘‘ကိံ [ကံ (က.)] ပန တွံ၊ ကဿပ၊ အတ္ထဝသံ သမ္ပဿမာနော ဒီဃရတ္တံ အာရညိကော စေဝ အာရညိကတ္တဿ စ ဝဏ္ဏဝါဒီ၊ ပိဏ္ဍပါတိကော စေဝ။ပေ။ ပံသုကူလိကော စေဝ။ တေစီဝရိကော စေဝ။ အပ္ပိစ္ဆော စေဝ။ သန္တုဋ္ဌော စေဝ။ ပဝိဝိတ္တော စေဝ။ အသံသဋ္ဌော စေဝ။ အာရဒ္ဓဝီရိယော စေဝ ဝီရိယာရမ္ဘဿ စ ဝဏ္ဏဝါဒီ’’တိ?

‘‘ဒွေ ခွာဟံ၊ ဘန္တေ၊ အတ္ထဝသေ သမ္ပဿမာနော ဒီဃရတ္တံ အာရညိကော စေဝ အာရညိကတ္တဿ စ ဝဏ္ဏဝါဒီ၊ ပိဏ္ဍပါတိကော စေဝ။ပေ။ ပံသုကူလိကော စေဝ။ တေစီဝရိကော စေဝ။ အပ္ပိစ္ဆော စေဝ။ သန္တုဋ္ဌော စေဝ။ ပဝိဝိတ္တော စေဝ။ အသံသဋ္ဌော စေဝ။ အာရဒ္ဓဝီရိယော စေဝ ဝီရိယာရမ္ဘဿ စ ဝဏ္ဏဝါဒီ. အတ္တနော စ ဒိဋ္ဌဓမ္မသုခဝိဟာရံ သမ္ပဿမာနော၊ ပစ္ဆိမဉ္စ ဇနတံ အနုကမ္ပမာနော – ‘အပ္ပေဝ နာမ ပစ္ဆိမာ ဇနတာ ဒိဋ္ဌာနုဂတိံ အာပဇ္ဇေယျုံ’ [အာပဇ္ဇေယျ (သီ. သျာ. ကံ.)]. ‘ယေ ကိရ တေ အဟေသုံ ဗုဒ္ဓါနုဗုဒ္ဓသာဝကာ တေ ဒီဃရတ္တံ အာရညိကာ စေဝ အဟေသုံ အာရညိကတ္တဿ စ ဝဏ္ဏဝါဒိနော။ပေ။ ပိဏ္ဍပါတိကာ စေဝ အဟေသုံ ။ပေ။ ပံသုကူလိကာ စေဝ အဟေသုံ။ တေစီဝရိကာ စေဝ အဟေသုံ။ အပ္ပိစ္ဆာ စေဝ အဟေသုံ။ သန္တုဋ္ဌာ စေဝ အဟေသုံ။ ပဝိဝိတ္တာ စေဝ အဟေသုံ။ အသံသဋ္ဌာ စေဝ အဟေသုံ။ အာရဒ္ဓဝီရိယာ စေဝ အဟေသုံ ဝီရိယာရမ္ဘဿ စ ဝဏ္ဏဝါဒိနော’တိ. တေ တထတ္တာယ ပဋိပဇ္ဇိဿန္တိ၊ တေသံ တံ ဘဝိဿတိ ဒီဃရတ္တံ ဟိတာယ သုခါယ.

‘‘ဣမေ ခွာဟံ၊ ဘန္တေ၊ ဒွေ အတ္ထဝသေ သမ္ပဿမာနော ဒီဃရတ္တံ အာရညိကော စေဝ အာရညိကတ္တဿ စ ဝဏ္ဏဝါဒီ၊ ပိဏ္ဍပါတိကော စေဝ။ပေ။ ပံသုကူလိကော စေဝ။ တေစီဝရိကော စေဝ။ အပ္ပိစ္ဆော စေဝ။ သန္တုဋ္ဌော စေဝ။ ပဝိဝိတ္တော စေဝ။ အသံသဋ္ဌော စေဝ။ အာရဒ္ဓဝီရိယော စေဝ ဝီရိယာရမ္ဘဿ စ ဝဏ္ဏဝါဒီ’’တိ.

‘‘သာဓု သာဓု၊ ကဿပ. ဗဟုဇနဟိတာယ ကိရ တွံ၊ ကဿပ၊ ပဋိပန္နော ဗဟုဇနသုခါယ လောကာနုကမ္ပာယ အတ္ထာယ ဟိတာယ သုခါယ ဒေဝမနုဿာနံ. တသ္မာတိဟ တွံ၊ ကဿပ၊ သာဏာနိ စေဝ ပံသုကူလာနိ ဓာရေဟိ နိဗ္ဗသနာနိ၊ ပိဏ္ဍာယ စ စရာဟိ၊ အရညေ စ ဝိဟရာဟီ’’တိ. ပဉ္စမံ.