၄. ကုလူပကသုတ္တံ

၁၄၇. သာဝတ္ထိယံ ဝိဟရတိ။ပေ။ ‘‘တံ ကိံ မညထ၊ ဘိက္ခဝေ၊ ကထံရူပေါ ဘိက္ခု အရဟတိ ကုလူပကော ဟောတုံ၊ ကထံရူပေါ ဘိက္ခု န အရဟတိ ကုလူပကော ဟောတု’’န္တိ? ဘဂဝံမူလကာ နော၊ ဘန္တေ၊ ဓမ္မာ။ပေ။ ဘဂဝါ ဧတဒဝေါစ –

‘‘ယော ဟိ ကောစိ၊ ဘိက္ခဝေ၊ ဘိက္ခု ဧဝံစိတ္တော ကုလာနိ ဥပသင်္ကမတိ – ‘ဒေန္တုယေဝ မေ၊ မာ နာဒံသု၊ ဗဟုကညေဝ မေ ဒေန္တု၊ မာ ထောကံ၊ ပဏီတညေဝ မေ ဒေန္တု၊ မာ လူခံ၊ သီဃညေဝ မေ ဒေန္တု၊ မာ ဒန္ဓံ၊ သက္ကစ္စညေဝ မေ ဒေန္တု၊ မာ အသက္ကစ္စ’န္တိ. တဿ စေ၊ ဘိက္ခဝေ၊ ဘိက္ခုနော ဧဝံစိတ္တဿ ကုလာနိ ဥပသင်္ကမတော န ဒေန္တိ၊ တေန ဘိက္ခု သန္ဒီယတိ၊ သော တတောနိဒါနံ ဒုက္ခံ ဒေါမနဿံ ပဋိသံဝေဒယတိ. ထောကံ ဒေန္တိ၊ နော ဗဟုကံ။ပေ။ လူခံ ဒေန္တိ၊ နော ပဏီတံ။ ဒန္ဓံ ဒေန္တိ၊ နော သီဃံ၊ တေန ဘိက္ခု သန္ဒီယတိ၊ သော တတောနိဒါနံ ဒုက္ခံ ဒေါမနဿံ ပဋိသံဝေဒယတိ. အသက္ကစ္စံ ဒေန္တိ၊ နော သက္ကစ္စံ၊ တေန ဘိက္ခု သန္ဒီယတိ၊ သော တတောနိဒါနံ ဒုက္ခံ ဒေါမနဿံ ပဋိသံဝေဒယတိ. ဧဝရူပေါ ခေါ၊ ဘိက္ခဝေ၊ ဘိက္ခု န အရဟတိ ကူလူပကော ဟောတုံ.

‘‘ယော စ ခေါ၊ ဘိက္ခဝေ၊ ဘိက္ခု ဧဝံစိတ္တော ကုလာနိ ဥပသင်္ကမတိ – ‘တံ ကုတေတ္ထ လဗ္ဘာ ပရကုလေသု – ဒေန္တုယေဝ မေ၊ မာ နာဒံသု၊ ဗဟုကညေဝ မေ ဒေန္တု၊ မာ ထောကံ၊ ပဏီတညေဝ မေ ဒေန္တု၊ မာ လူခံ၊ ဒီဃညေဝ မေ ဒေန္တု၊ မာ ဒန္ဓံ၊ သက္ကစ္စညေဝ မေ ဒေန္တု၊ မာ အသက္ကစ္စ’န္တိ. တဿ စေ၊ ဘိက္ခဝေ၊ ဘိက္ခုနော ဧဝံစိတ္တဿ ကုလာနိ ဥပသင်္ကမတော န ဒေန္တိ၊ တေန ဘိက္ခု န သန္ဒီယတိ၊ သော န တတောနိဒါနံ ဒုက္ခံ ဒေါမနဿံ ပဋိသံဝေဒယတိ. ထောကံ ဒေန္တိ၊ နော ဗဟုကံ၊ တေန ဘိက္ခု န သန္ဒီယတိ၊ သော န တတောနိဒါနံ ဒုက္ခံ ဒေါမနဿံ ပဋိသံဝေဒယတိ. လူခံ ဒေန္တိ၊ နော ပဏီတံ၊ တေန ဘိက္ခု န သန္ဒီယတိ၊ သော န တတောနိဒါနံ ဒုက္ခံ ဒေါမနဿံ ပဋိသံဝေဒယတိ. ဒန္ဓံ ဒေန္တိ၊ နော သီဃံ၊ တေန ဘိက္ခု န သန္ဒီယတိ၊ သော န တတောနိဒါနံ ဒုက္ခံ ဒေါမနဿံ ပဋိသံဝေဒယတိ. အသက္ကစ္စံ ဒေန္တိ၊ နော သက္ကစ္စံ၊ တေန ဘိက္ခု န သန္ဒီယတိ၊ သော န တတောနိဒါနံ ဒုက္ခံ ဒေါမနဿံ ပဋိသံဝေဒယတိ. ဧဝရူပေါ ခေါ၊ ဘိက္ခဝေ၊ ဘိက္ခု အရဟတိ ကုလူပကော ဟောတုံ.

‘‘ကဿပေါ၊ ဘိက္ခဝေ၊ ဧဝံစိတ္တော ကုလာနိ ဥပသင်္ကမတိ – ‘တံ ကုတေတ္ထ လဗ္ဘာ ပရကုလေသု – ဒေန္တုယေဝ မေ၊ မာ နာဒံသု၊ ဗဟုကညေဝ မေ ဒေန္တု၊ မာ ထောကံ၊ ပဏီတညေဝ မေ ဒေန္တု၊ မာ လူခံ၊ သီဃညေဝ မေ ဒေန္တု၊ မာ ဒန္ဓံ၊ သက္ကစ္စညေဝ မေ ဒေန္တု၊ မာ အသက္ကစ္စ’န္တိ. တဿ စေ၊ ဘိက္ခဝေ၊ ကဿပဿ ဧဝံစိတ္တဿ ကုလာနိ ဥပသင်္ကမတော န ဒေန္တိ၊ တေန ကဿပေါ န သန္ဒီယတိ၊ သော န တတောနိဒါနံ ဒုက္ခံ ဒေါမနဿံ ပဋိသံဝေဒယတိ. ထောကံ ဒေန္တိ၊ နော ဗဟုကံ၊ တေန ကဿပေါ န သန္ဒီယတိ၊ သော န တတောနိဒါနံ ဒုက္ခံ ဒေါမနဿံ ပဋိသံဝေဒယတိ. လူခံ ဒေန္တိ၊ နော ပဏီတံ၊ တေန ကဿပေါ န သန္ဒီယတိ၊ သော န တတောနိဒါနံ ဒုက္ခံ ဒေါမနဿံ ပဋိသံဝေဒယတိ. ဒန္ဓံ ဒေန္တိ၊ နော သီဃံ၊ တေန ကဿပေါ န သန္ဒီယတိ၊ သော န တတောနိဒါနံ ဒုက္ခံ ဒေါမနဿံ ပဋိသံဝေဒယတိ. အသက္ကစ္စံ ဒေန္တိ၊ နော သက္ကစ္စံ၊ တေန ကဿပေါ န သန္ဒီယတိ၊ သော န တတောနိဒါနံ ဒုက္ခံ ဒေါမနဿံ ပဋိသံဝေဒယတိ. ကဿပေန ဝါ ဟိ ဝေါ၊ ဘိက္ခဝေ၊ ဩဝဒိဿာမိ ယော ဝါ ပနဿ ကဿပသဒိသော. ဩဝဒိတေဟိ စ ပန ဝေါ တထတ္တာယ ပဋိပဇ္ဇိတဗ္ဗ’’န္တိ. စတုတ္ထံ.