၉. ဒဏ္ဍသုတ္တံ

၁၃၂. သာဝတ္ထိယံ ဝိဟရတိ။ပေ။ ‘‘အနမတဂ္ဂေါယံ၊ ဘိက္ခဝေ၊ သံသာရော. ပုဗ္ဗာ ကောဋိ န ပညာယတိ အဝိဇ္ဇာနီဝရဏာနံ သတ္တာနံ တဏှာသံယောဇနာနံ သန္ဓာဝတံ သံသရတံ. သေယျထာပိ၊ ဘိက္ခဝေ၊ ဒဏ္ဍော ဥပရိဝေဟာသံ ခိတ္တော သကိမ္ပိ မူလေန နိပတတိ၊ သကိမ္ပိ မဇ္ဈေန နိပတတိ၊ သကိမ္ပိ အန္တေန နိပတတိ၊ ဧဝမေဝ ခေါ၊ ဘိက္ခဝေ၊ အဝိဇ္ဇာနီဝရဏာ သတ္တာ တဏှာသံယောဇနာ သန္ဓာဝန္တာ သံသရန္တာ သကိမ္ပိ အသ္မာ လောကာ ပရံ လောကံ ဂစ္ဆန္တိ၊ သကိမ္ပိ ပရသ္မာ လောကာ ဣမံ လောကံ အာဂစ္ဆန္တိ. တံ ကိဿ ဟေတု? အနမတဂ္ဂေါယံ၊ ဘိက္ခဝေ၊ သံသာရော။ပေ။ အလံ ဝိမုစ္စိတု’’န္တိ. နဝမံ.