၅. ပဗ္ဗတသုတ္တံ

၁၂၈. သာဝတ္ထိယံ ဝိဟရတိ။ပေ။ အာရာမေ. အထ ခေါ အညတရော ဘိက္ခု ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ သော ဘိက္ခု ဘဂဝန္တံ ဧတဒဝေါစ – ‘‘ကီဝဒီဃော နု ခေါ၊ ဘန္တေ၊ ကပ္ပေါ’’တိ? ‘‘ဒီဃော ခေါ၊ ဘိက္ခု၊ ကပ္ပေါ. သော န သုကရော သင်္ခါတုံ ဧတ္တကာနိ ဝဿာနိ ဣတိ ဝါ၊ ဧတ္တကာနိ ဝဿသတာနိ ဣတိ ဝါ၊ ဧတ္တကာနိ ဝဿသဟဿာနိ ဣတိ ဝါ၊ ဧတ္တကာနိ ဝဿသတသဟဿာနိ ဣတိ ဝါ’’တိ.

‘‘သက္ကာ ပန၊ ဘန္တေ၊ ဥပမံ ကာတု’’န္တိ? ‘‘သက္ကာ၊ ဘိက္ခူ’’တိ ဘဂဝါ အဝေါစ. ‘‘သေယျထာပိ၊ ဘိက္ခု၊ မဟာသေလော ပဗ္ဗတော ယောဇနံ အာယာမေန ယောဇနံ ဝိတ္ထာရေန ယောဇနံ ဥဗ္ဗေဓေန အစ္ဆိန္နော အသုသိရော ဧကဂ္ဃနော. တမေနံ ပုရိသော ဝဿသတဿ ဝဿသတဿ အစ္စယေန ကာသိကေန ဝတ္ထေန သကိံ သကိံ ပရိမဇ္ဇေယျ. ခိပ္ပတရံ ခေါ သော၊ ဘိက္ခု၊ မဟာသေလော ပဗ္ဗတော ဣမိနာ ဥပက္ကမေန ပရိက္ခယံ ပရိယာဒါနံ ဂစ္ဆေယျ၊ န တွေဝ ကပ္ပေါ. ဧဝံ ဒီဃော၊ ဘိက္ခု၊ ကပ္ပေါ. ဧဝံ ဒီဃာနံ ခေါ၊ ဘိက္ခု၊ ကပ္ပါနံ နေကော ကပ္ပေါ သံသိတော၊ နေကံ ကပ္ပသတံ သံသိတံ၊ နေကံ ကပ္ပသဟဿံ သံသိတံ၊ နေကံ ကပ္ပသတသဟဿံ သံသိတံ. တံ ကိဿ ဟေတု? အနမတဂ္ဂေါယံ၊ ဘိက္ခု၊ သံသာရော. ပုဗ္ဗာ ကောဋိ။ပေ။ ယာဝဉ္စိဒံ၊ ဘိက္ခု၊ အလမေဝ သဗ္ဗသင်္ခါရေသု နိဗ္ဗိန္ဒိတုံ၊ အလံ ဝိရဇ္ဇိတုံ၊ အလံ ဝိမုစ္စိတု’’န္တိ. ပဉ္စမံ.