၅. အဟိံသကသုတ္တံ

၁၉၁. သာဝတ္ထိနိဒါနံ. အထ ခေါ အဟိံသကဘာရဒွါဇော ဗြာဟ္မဏော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝတာ သဒ္ဓိံ သမ္မောဒိ. သမ္မောဒနီယံ ကထံ သာရဏီယံ ဝီတိသာရေတွာ ဧကမန္တံ နိသီဒိ. ဧကမန္တံ နိသိန္နော ခေါ အဟိံသကဘာရဒွါဇော ဗြာဟ္မဏော ဘဂဝန္တံ ဧတဒဝေါစ – ‘‘အဟိံသကာဟံ၊ ဘော ဂေါတမ၊ အဟိံသကာဟံ၊ ဘော ဂေါတမာ’’တိ.

‘‘ယထာ နာမံ တထာ စဿ၊ သိယာ ခေါ တွံ အဟိံသကော၊

ယော စ ကာယေန ဝါစာယ၊ မနသာ စ န ဟိံသတိ၊

သ ဝေ အဟိံသကော ဟောတိ၊ ယော ပရံ န ဝိဟိံသတီ’’တိ.

ဧဝံ ဝုတ္တေ၊ အဟိံသကဘာရဒွါဇော ဗြာဟ္မဏော ဘဂဝန္တံ ဧတဒဝေါစ – ‘‘အဘိက္ကန္တံ၊ ဘော ဂေါတမ။ပေ။ အဗ္ဘညာသိ. အညတရော စ ပနာယသ္မာ အဟိံသကဘာရဒွါဇော အရဟတံ အဟောသီ’’တိ.