၉. ကဿကသုတ္တံ

၁၅၅. သာဝတ္ထိနိဒါနံ. တေန ခေါ ပန သမယေန ဘဂဝါ ဘိက္ခူနံ နိဗ္ဗာနပဋိသံယုတ္တာယ ဓမ္မိယာ ကထာယ သန္ဒဿေတိ သမာဒပေတိ သမုတ္တေဇေတိ သမ္ပဟံသေတိ. တေ စ ဘိက္ခူ အဋ္ဌိံ ကတွာ မနသိ ကတွာ သဗ္ဗစေတသာ သမန္နာဟရိတွာ ဩဟိတသောတာ ဓမ္မံ သုဏန္တိ.

အထ ခေါ မာရဿ ပါပိမတော ဧတဒဟောသိ – ‘‘အယံ ခေါ သမဏော ဂေါတမော ဘိက္ခူနံ နိဗ္ဗာနပဋိသံယုတ္တာယ ဓမ္မိယာ ကထာယ။ပေ။ ယံနူနာဟံ ယေန သမဏော ဂေါတမော တေနုပသင်္ကမေယျံ ဝိစက္ခုကမ္မာယာ’’တိ. အထ ခေါ မာရော ပါပိမာ ကဿကဝဏ္ဏံ အဘိနိမ္မိနိတွာ မဟန္တံ နင်္ဂလံ ခန္ဓေ ကရိတွာ ဒီဃပါစနယဋ္ဌိံ ဂဟေတွာ ဟဋဟဋကေသော သာဏသာဋိနိဝတ္ထော ကဒ္ဒမမက္ခိတေဟိ ပါဒေဟိ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ ဧတဒဝေါစ – ‘‘အပိ၊ သမဏ၊ ဗလီဗဒ္ဒေ အဒ္ဒသာ’’တိ? ‘‘ကိံ ပန၊ ပါပိမ၊ တေ ဗလီဗဒ္ဒေဟီ’’တိ? ‘‘မမေဝ၊ သမဏ၊ စက္ခု၊ မမ ရူပါ၊ မမ စက္ခုသမ္ဖဿဝိညာဏာယတနံ. ကုဟိံ မေ၊ သမဏ၊ ဂန္တွာ မောက္ခသိ? မမေဝ၊ သမဏ၊ သောတံ၊ မမ သဒ္ဒါ။ပေ။ မမေဝ၊ သမဏ၊ ဃာနံ၊ မမ ဂန္ဓာ၊ မမေဝ၊ သမဏ၊ ဇိဝှါ၊ မမ ရသာ၊ မမေဝ၊ သမဏ၊ ကာယော၊ မမ ဖောဋ္ဌဗ္ဗာ၊ မမေဝ၊ သမဏ၊ မနော၊ မမ ဓမ္မာ၊ မမ မနောသမ္ဖဿဝိညာဏာယတနံ. ကုဟိံ မေ၊ သမဏ၊ ဂန္တွာ မောက္ခသီ’’တိ?

‘‘တဝေဝ၊ ပါပိမ၊ စက္ခု၊ တဝ ရူပါ၊ တဝ စက္ခုသမ္ဖဿဝိညာဏာယတနံ. ယတ္ထ စ ခေါ၊ ပါပိမ၊ နတ္ထိ စက္ခု၊ နတ္ထိ ရူပါ၊ နတ္ထိ စက္ခုသမ္ဖဿဝိညာဏာယတနံ၊ အဂတိ တဝ တတ္ထ၊ ပါပိမ. တဝေဝ၊ ပါပိမ၊ သောတံ၊ တဝ သဒ္ဒါ၊ တဝ သောတသမ္ဖဿဝိညာဏာယတနံ. ယတ္ထ စ ခေါ၊ ပါပိမ၊ နတ္ထိ သောတံ၊ နတ္ထိ သဒ္ဒါ၊ နတ္ထိ သောတသမ္ဖဿဝိညာဏာယတနံ၊ အဂတိ တဝ တတ္ထ၊ ပါပိမ. တဝေဝ၊ ပါပိမ၊ ဃာနံ၊ တဝ ဂန္ဓာ၊ တဝ ဃာနသမ္ဖဿဝိညာဏာယတနံ. ယတ္ထ စ ခေါ၊ ပါပိမ၊ နတ္ထိ ဃာနံ၊ နတ္ထိ ဂန္ဓာ၊ နတ္ထိ ဃာနသမ္ဖဿဝိညာဏာယတနံ၊ အဂတိ တဝ တတ္ထ၊ ပါပိမ. တဝေဝ၊ ပါပိမ၊ ဇိဝှါ၊ တဝ ရသာ၊ တဝ ဇိဝှါသမ္ဖဿဝိညာဏာယတနံ။ပေ။ တဝေဝ၊ ပါပိမ၊ ကာယော၊ တဝ ဖောဋ္ဌဗ္ဗာ၊ တဝ ကာယသမ္ဖဿဝိညာဏာယတနံ။ပေ။ တဝေဝ၊ ပါပိမ၊ မနော၊ တဝ ဓမ္မာ၊ တဝ မနောသမ္ဖဿဝိညာဏာယတနံ. ယတ္ထ စ ခေါ၊ ပါပိမ၊ နတ္ထိ မနော၊ နတ္ထိ ဓမ္မာ၊ နတ္ထိ မနောသမ္ဖဿဝိညာဏာယတနံ၊ အဂတိ တဝ တတ္ထ၊ ပါပိမာ’’တိ.

‘‘ယံ ဝဒန္တိ မမ ယိဒန္တိ၊ ယေ ဝဒန္တိ မမန္တိ စ၊

ဧတ္ထ စေ တေ မနော အတ္ထိ၊ န မေ သမဏ မောက္ခသီ’’တိ.

‘‘ယံ ဝဒန္တိ န တံ မယှံ၊ ယေ ဝဒန္တိ န တေ အဟံ၊

ဧဝံ ပါပိမ ဇာနာဟိ၊ န မေ မဂ္ဂမ္ပိ ဒက္ခသီ’’တိ.

အထ ခေါ မာရော ပါပိမာ။ပေ။ တတ္ထေဝန္တရဓာယီတိ.