၃. သကလိကသုတ္တံ

၁၄၉. ဧဝံ မေ သုတံ – ဧကံ သမယံ ဘဂဝါ ရာဇဂဟေ ဝိဟရတိ မဒ္ဒကုစ္ဆိသ္မိံ မိဂဒါယေ. တေန ခေါ ပန သမယေန ဘဂဝတော ပါဒေါ သကလိကာယ ခတော ဟောတိ၊ ဘုသာ သုဒံ ဘဂဝတော ဝေဒနာ ဝတ္တန္တိ သာရီရိကာ ဒုက္ခာ တိဗ္ဗာ ခရာ ကဋုကာ အသာတာ အမနာပါ. တာ သုဒံ ဘဂဝါ သတော သမ္ပဇာနော အဓိဝါသေတိ အဝိဟညမာနော. အထ ခေါ ဘဂဝါ စတုဂ္ဂုဏံ သင်္ဃာဋိံ ပညပေတွာ ဒက္ခိဏေန ပဿေန သီဟသေယျံ ကပ္ပေသိ ပါဒေ ပါဒံ အစ္စာဓာယ သတော သမ္ပဇာနော. အထ ခေါ မာရော ပါပိမာ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ ဂါထာယ အဇ္ဈဘာသိ –

‘‘မန္ဒိယာ နု ခေါ သေသိ ဥဒါဟု ကာဝေယျမတ္တော၊

အတ္ထာ နု တေ သမ္ပစုရာ န သန္တိ၊

ဧကော ဝိဝိတ္တေ သယနာသနမှိ၊

နိဒ္ဒါမုခေါ ကိမိဒံ သောပ္ပသေ ဝါ’’တိ.

‘‘န မန္ဒိယာ သယာမိ နာပိ ကာဝေယျမတ္တော၊

အတ္ထံ သမေစ္စာဟမပေတသောကော၊

ဧကော ဝိဝိတ္တေ သယနာသနမှိ၊

သယာမဟံ သဗ္ဗဘူတာနုကမ္ပီ.

‘‘ယေသမ္ပိ သလ္လံ ဥရသိ ပဝိဋ္ဌံ၊

မုဟုံ မုဟုံ ဟဒယံ ဝေဓမာနံ၊

တေပီဓ သောပ္ပံ လဘရေ သသလ္လာ၊

တသ္မာ အဟံ န သုပေ ဝီတသလ္လော.

‘‘ဇဂ္ဂံ န သင်္ကေ နပိ ဘေမိ သောတ္တုံ၊

ရတ္တိန္ဒိဝါ နာနုတပန္တိ မာမံ၊

ဟာနိံ န ပဿာမိ ကုဟိဉ္စိ လောကေ၊

တသ္မာ သုပေ သဗ္ဗဘူတာနုကမ္ပီ’’တိ.

အထ ခေါ မာရော ပါပိမာ ‘‘ဇာနာတိ မံ ဘဂဝါ၊ ဇာနာတိ မံ သုဂတော’’တိ ဒုက္ခီ ဒုမ္မနော တတ္ထေဝန္တရဓာယီတိ.