၉. ပဌမသုက္ကာသုတ္တံ

၂၄၃. ဧကံ သမယံ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ. တေန ခေါ ပန သမယေန သုက္ကာ ဘိက္ခုနီ မဟတိယာ ပရိသာယ ပရိဝုတာ ဓမ္မံ ဒေသေတိ. အထ ခေါ သုက္ကာယ ဘိက္ခုနိယာ အဘိပ္ပသန္နော ယက္ခော ရာဇဂဟေ ရထိကာယ ရထိကံ သိင်္ဃာဋကေန သိင်္ဃာဋကံ ဥပသင်္ကမိတွာ တာယံ ဝေလာယံ ဣမာ ဂါထာယော အဘာသိ –

‘‘ကိံ မေ ကတာ ရာဇဂဟေ မနုဿာ၊ မဓုပီတာဝ သေယရေ၊

ယေ သုက္ကံ န ပယိရုပါသန္တိ၊ ဒေသေန္တိံ အမတံ ပဒံ.

‘‘တဉ္စ ပန အပ္ပဋိဝါနီယံ၊ အသေစနကမောဇဝံ၊

ပိဝန္တိ မညေ သပ္ပညာ၊ ဝလာဟကမိဝ ပန္ထဂူ’’တိ [ဝလာဟကမိဝဒ္ဓဂူတိ (သီ.)].