၇. ပုနဗ္ဗသုသုတ္တံ

၂၄၁. ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန ဘဂဝါ ဘိက္ခူ နိဗ္ဗာနပဋိသံယုတ္တာယ ဓမ္မိယာ ကထာယ သန္ဒဿေတိ သမာဒပေတိ သမုတ္တေဇေတိ သမ္ပဟံသေတိ. တေ စ ဘိက္ခူ အဋ္ဌိံ ကတွာ မနသိ ကတွာ သဗ္ဗစေတသာ သမန္နာဟရိတွာ ဩဟိတသောတာ ဓမ္မံ သုဏန္တိ. အထ ခေါ ပုနဗ္ဗသုမာတာ ယက္ခိနီ ပုတ္တကေ ဧဝံ တောသေသိ –

‘‘တုဏှီ ဥတ္တရိကေ ဟောဟိ၊ တုဏှီ ဟောဟိ ပုနဗ္ဗသု၊

ယာဝါဟံ ဗုဒ္ဓသေဋ္ဌဿ၊ ဓမ္မံ သောဿာမိ သတ္ထုနော.

‘‘နိဗ္ဗာနံ ဘဂဝါ အာဟ၊ သဗ္ဗဂန္ထပ္ပမောစနံ၊

အတိဝေလာ စ မေ ဟောတိ၊ အသ္မိံ ဓမ္မေ ပိယာယနာ.

‘‘ပိယော လောကေ သကော ပုတ္တော၊ ပိယော လောကေ သကော ပတိ၊

တတော ပိယတရာ မယှံ၊ အဿ ဓမ္မဿ မဂ္ဂနာ.

‘‘န ဟိ ပုတ္တော ပတိ ဝါပိ၊ ပိယော ဒုက္ခာ ပမောစယေ၊

ယထာ သဒ္ဓမ္မဿဝနံ၊ ဒုက္ခာ မောစေတိ ပါဏိနံ.

‘‘လောကေ ဒုက္ခပရေတသ္မိံ၊ ဇရာမရဏသံယုတေ၊

ဇရာမရဏမောက္ခာယ၊ ယံ ဓမ္မံ အဘိသမ္ဗုဓံ၊

တံ ဓမ္မံ သောတုမိစ္ဆာမိ၊ တုဏှီ ဟောဟိ ပုနဗ္ဗသူ’’တိ.

‘‘အမ္မာ န ဗျာဟရိဿာမိ၊ တုဏှီဘူတာယမုတ္တရာ၊

ဓမ္မမေဝ နိသာမေဟိ၊ သဒ္ဓမ္မဿဝနံ သုခံ၊

သဒ္ဓမ္မဿ အနညာယ၊ အမ္မာ ဒုက္ခံ စရာမသေ.

‘‘ဧသ ဒေဝမနုဿာနံ၊ သမ္မူဠှာနံ ပဘင်္ကရော၊

ဗုဒ္ဓေါ အန္တိမသာရီရော၊ ဓမ္မံ ဒေသေတိ စက္ခုမာ’’တိ.

‘‘သာဓု ခေါ ပဏ္ဍိတော နာမ၊ ပုတ္တော ဇာတော ဥရေသယော၊

ပုတ္တော မေ ဗုဒ္ဓသေဋ္ဌဿ၊ ဓမ္မံ သုဒ္ဓံ ပိယာယတိ.

‘‘ပုနဗ္ဗသု သုခီ ဟောဟိ၊ အဇ္ဇာဟမှိ သမုဂ္ဂတာ၊

ဒိဋ္ဌာနိ အရိယသစ္စာနိ၊ ဥတ္တရာပိ သုဏာတု မေ’’တိ.