၄. မဏိဘဒ္ဒသုတ္တံ

၂၃၈. ဧကံ သမယံ ဘဂဝါ မဂဓေသု ဝိဟရတိ မဏိမာလိကေ စေတိယေ မဏိဘဒ္ဒဿ ယက္ခဿ ဘဝနေ. အထ ခေါ မဏိဘဒ္ဒေါ ယက္ခော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝတော သန္တိကေ ဣမံ ဂါထံ အဘာသိ –

‘‘သတီမတော သဒါ ဘဒ္ဒံ၊ သတိမာ သုခမေဓတိ၊

သတီမတော သုဝေ သေယျော၊ ဝေရာ စ ပရိမုစ္စတီ’’တိ.

‘‘သတီမတော သဒါ ဘဒ္ဒံ၊ သတိမာ သုခမေဓတိ၊

သတီမတော သုဝေ သေယျော၊ ဝေရာ န ပရိမုစ္စတိ.

‘‘ယဿ သဗ္ဗမဟောရတ္တံ [ရတ္တိံ (သျာ. ကံ. က.)]၊ အဟိံသာယ ရတော မနော၊

မေတ္တံ သော သဗ္ဗဘူတေသု၊ ဝေရံ တဿ န ကေနစီ’’တိ.