၂. သက္ကနာမသုတ္တံ

၂၃၆. ဧကံ သမယံ ဘဂဝါ ရာဇဂဟေ ဝိဟရတိ ဂိဇ္ဈကူဋေ ပဗ္ဗတေ. အထ ခေါ သက္ကနာမကော ယက္ခော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ ဂါထာယ အဇ္ဈဘာသိ –

‘‘သဗ္ဗဂန္ထပ္ပဟီနဿ၊ ဝိပ္ပမုတ္တဿ တေ သတော၊

သမဏဿ န တံ သာဓု၊ ယဒညမနုသာသသီ’’တိ [ယဒညမနုသာသတီတိ (သီ. သျာ. ကံ. ပီ.)].

‘‘ယေန ကေနစိ ဝဏ္ဏေန၊ သံဝါသော သက္က ဇာယတိ၊

န တံ အရဟတိ သပ္ပညော၊ မနသာ အနုကမ္ပိတုံ.

‘‘မနသာ စေ ပသန္နေန၊ ယဒညမနုသာသတိ၊

န တေန ဟောတိ သံယုတ္တော၊ ယာနုကမ္ပာ [သာနုကမ္ပာ (သီ. ပီ.)] အနုဒ္ဒယာ’’တိ.