၅. အရဟန္တသုတ္တံ

၂၅. ‘‘ယော ဟောတိ ဘိက္ခု အရဟံ ကတာဝီ၊

ခီဏာသဝေါ အန္တိမဒေဟဓာရီ၊

အဟံ ဝဒါမီတိပိ သော ဝဒေယျ၊

မမံ ဝဒန္တီတိပိ သော ဝဒေယျာ’’တိ.

‘‘ယော ဟောတိ ဘိက္ခု အရဟံ ကတာဝီ၊

ခီဏာသဝေါ အန္တိမဒေဟဓာရီ၊

အဟံ ဝဒါမီတိပိ သော ဝဒေယျ၊

မမံ ဝဒန္တီတိပိ သော ဝဒေယျ၊

လောကေ သမညံ ကုသလော ဝိဒိတွာ၊

ဝေါဟာရမတ္တေန သော [သ (?)] ဝေါဟရေယျာ’’တိ.

‘‘ယော ဟောတိ ဘိက္ခု အရဟံ ကတာဝီ၊

ခီဏာသဝေါ အန္တိမဒေဟဓာရီ၊

မာနံ နု ခေါ သော ဥပဂမ္မ ဘိက္ခု၊

အဟံ ဝဒါမီတိပိ သော ဝဒေယျ၊

မမံ ဝဒန္တီတိပိ သော ဝဒေယျာ’’တိ.

‘‘ပဟီနမာနဿ န သန္တိ ဂန္ထာ၊

ဝိဓူပိတာ မာနဂန္ထဿ သဗ္ဗေ၊

သ ဝီတိဝတ္တော မညတံ [မာနနံ (သီ.)၊ မညီတံ (?)] သုမေဓော၊

အဟံ ဝဒါမီတိပိ သော ဝဒေယျ.

‘‘မမံ ဝဒန္တီတိပိ သော ဝဒေယျ၊

လောကေ သမညံ ကုသလော ဝိဒိတွာ၊

ဝေါဟာရမတ္တေန သော ဝေါဟရေယျာ’’တိ.