၁. နဠဝဂ္ဂေါ

၁. ဩဃတရဏသုတ္တံ

၁. ဧဝံ မေ သုတံ – ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. အထ ခေါ အညတရာ ဒေဝတာ အဘိက္ကန္တာယ ရတ္တိယာ အဘိက္ကန္တဝဏ္ဏာ ကေဝလကပ္ပံ ဇေတဝနံ ဩဘာသေတွာ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ အဋ္ဌာသိ. ဧကမန္တံ ဌိတာ ခေါ သာ ဒေဝတာ ဘဂဝန္တံ ဧတဒဝေါစ – ‘‘‘ကထံ နု တွံ၊ မာရိသ၊ ဩဃမတရီ’တိ? ‘အပ္ပတိဋ္ဌံ ခွာဟံ၊ အာဝုသော၊ အနာယူဟံ ဩဃမတရိ’န္တိ. ‘ယထာ ကထံ ပန တွံ၊ မာရိသ၊ အပ္ပတိဋ္ဌံ အနာယူဟံ ဩဃမတရီ’တိ? ‘ယဒါခွာဟံ၊ အာဝုသော၊ သန္တိဋ္ဌာမိ တဒါဿု သံသီဒါမိ၊ ယဒါခွာဟံ၊ အာဝုသော၊ အာယူဟာမိ တဒါဿု နိဗ္ဗုယှာမိ [နိဝုယှာမိ (သျာ. ကံ. က.)]. ဧဝံ ခွာဟံ၊ အာဝုသော၊ အပ္ပတိဋ္ဌံ အနာယူဟံ ဩဃမတရိ’’’န္တိ.

‘‘စိရဿံ ဝတ ပဿာမိ၊ ဗြာဟ္မဏံ ပရိနိဗ္ဗုတံ၊

အပ္ပတိဋ္ဌံ အနာယူဟံ၊ တိဏ္ဏံ လောကေ ဝိသတ္တိက’’န္တိ. –

ဣဒမဝေါစ သာ ဒေဝတာ. သမနုညော သတ္ထာ အဟောသိ. အထ ခေါ သာ ဒေဝတာ – ‘‘သမနုညော မေ သတ္ထာ’’တိ ဘဂဝန္တံ အဘိဝါဒေတွာ ပဒက္ခိဏံ ကတွာ တတ္ထေဝန္တရဓာယီတိ.

၂. နိမောက္ခသုတ္တံ

၂. သာဝတ္ထိနိဒါနံ. အထ ခေါ အညတရာ ဒေဝတာ အဘိက္ကန္တာယ ရတ္တိယာ အဘိက္ကန္တဝဏ္ဏာ ကေဝလကပ္ပံ ဇေတဝနံ ဩဘာသေတွာ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ အဋ္ဌာသိ. ဧကမန္တံ ဌိတာ ခေါ သာ ဒေဝတာ ဘဂဝန္တံ ဧတဒဝေါစ –

‘‘ဇာနာသိ နော တွံ၊ မာရိသ၊ သတ္တာနံ နိမောက္ခံ ပမောက္ခံ ဝိဝေက’’န္တိ?

‘‘ဇာနာမိ ခွာဟံ၊ အာဝုသော၊ သတ္တာနံ နိမောက္ခံ ပမောက္ခံ ဝိဝေက’’န္တိ.

‘‘ယထာ ကထံ ပန တွံ၊ မာရိသ၊ ဇာနာသိ သတ္တာနံ နိမောက္ခံ ပမောက္ခံ ဝိဝေက’’န္တိ?

‘‘နန္ဒီဘဝပရိက္ခယာ [နန္ဒိဘဝပရိက္ခယာ (သျာ. ကံ.)]၊ သညာဝိညာဏသင်္ခယာ၊ ဝေဒနာနံ နိရောဓာ ဥပသမာ – ဧဝံ ခွာဟံ၊ အာဝုသော၊ ဇာနာမိ သတ္တာနံ နိမောက္ခံ ပမောက္ခံ ဝိဝေက’’န္တိ.

၃. ဥပနီယသုတ္တံ

၃. သာဝတ္ထိနိဒါနံ. ဧကမန္တံ ဌိတာ ခေါ သာ ဒေဝတာ ဘဂဝတော သန္တိကေ ဣမံ ဂါထံ အဘာသိ –

‘‘ဥပနီယတိ ဇီဝိတမပ္ပမာယု၊

ဇရူပနီတဿ န သန္တိ တာဏာ၊

ဧတံ ဘယံ မရဏေ ပေက္ခမာနော၊

ပုညာနိ ကယိရာထ သုခါဝဟာနီ’’တိ.

‘‘ဥပနီယတိ ဇီဝိတမပ္ပမာယု၊

ဇရူပနီတဿ န သန္တိ တာဏာ၊

ဧတံ ဘယံ မရဏေ ပေက္ခမာနော၊

လောကာမိသံ ပဇဟေ သန္တိပေက္ခော’’တိ.

၄. အစ္စေန္တိသုတ္တံ

၄. သာဝတ္ထိနိဒါနံ. ဧကမန္တံ ဌိတာ ခေါ သာ ဒေဝတာ ဘဂဝတော သန္တိကေ ဣမံ ဂါထံ အဘာသိ –

‘‘အစ္စေန္တိ ကာလာ တရယန္တိ ရတ္တိယော၊

ဝယောဂုဏာ အနုပုဗ္ဗံ ဇဟန္တိ၊

ဧတံ ဘယံ မရဏေ ပေက္ခမာနော၊

ပုညာနိ ကယိရာထ သုခါဝဟာနီ’’တိ.

‘‘အစ္စေန္တိ ကာလာ တရယန္တိ ရတ္တိယော၊

ဝယောဂုဏာ အနုပုဗ္ဗံ ဇဟန္တိ၊

ဧတံ ဘယံ မရဏေ ပေက္ခမာနော၊

လောကာမိသံ ပဇဟေ သန္တိပေက္ခော’’တိ.

၅. ကတိဆိန္ဒသုတ္တံ

၅. သာဝတ္ထိနိဒါနံ. ဧကမန္တံ ဌိတာ ခေါ သာ ဒေဝတာ ဘဂဝတော သန္တိကေ ဣမံ ဂါထံ အဘာသိ –

‘‘ကတိ ဆိန္ဒေ ကတိ ဇဟေ၊ ကတိ စုတ္တရိ ဘာဝယေ၊

ကတိ သင်္ဂါတိဂေါ ဘိက္ခု၊ ဩဃတိဏ္ဏောတိ ဝုစ္စတီ’’တိ.

‘‘ပဉ္စ ဆိန္ဒေ ပဉ္စ ဇဟေ၊ ပဉ္စ စုတ္တရိ ဘာဝယေ၊

ပဉ္စ သင်္ဂါတိဂေါ ဘိက္ခု၊ ဩဃတိဏ္ဏောတိ ဝုစ္စတီ’’တိ.

၆. ဇာဂရသုတ္တံ

၆. သာဝတ္ထိနိဒါနံ. ဧကမန္တံ ဌိတာ ခေါ သာ ဒေဝတာ ဘဂဝတော သန္တိကေ ဣမံ ဂါထံ အဘာသိ –

‘‘ကတိ ဇာဂရတံ သုတ္တာ၊ ကတိ သုတ္တေသု ဇာဂရာ၊

ကတိဘိ [ကတီဟိ (သီ.)] ရဇမာဒေတိ၊ ကတိဘိ [ကတီဟိ (သီ.)] ပရိသုဇ္ဈတီ’’တိ.

‘‘ပဉ္စ ဇာဂရတံ သုတ္တာ၊ ပဉ္စ သုတ္တေသု ဇာဂရာ၊

ပဉ္စဘိ [ပဉ္စဟိ (သီ.)] ရဇမာဒေတိ၊ ပဉ္စဘိ [ပဉ္စဟိ (သီ.)] ပရိသုဇ္ဈတီ’’တိ.

၇. အပ္ပဋိဝိဒိတသုတ္တံ

၇. သာဝတ္ထိနိဒါနံ. ဧကမန္တံ ဌိတာ ခေါ သာ ဒေဝတာ ဘဂဝတော သန္တိကေ ဣမံ ဂါထံ အဘာသိ –

‘‘ယေသံ ဓမ္မာ အပ္ပဋိဝိဒိတာ၊ ပရဝါဒေသု နီယရေ [နိယျရေ (က.)]၊

သုတ္တာ တေ နပ္ပဗုဇ္ဈန္တိ၊ ကာလော တေသံ ပဗုဇ္ဈိတု’’န္တိ.

‘‘ယေသံ ဓမ္မာ သုပ္ပဋိဝိဒိတာ၊ ပရဝါဒေသု န နီယရေ၊

တေ သမ္ဗုဒ္ဓါ သမ္မဒညာ၊ စရန္တိ ဝိသမေ သမ’’န္တိ.

၈. သုသမ္မုဋ္ဌသုတ္တံ

၈. သာဝတ္ထိနိဒါနံ. ဧကမန္တံ ဌိတာ ခေါ သာ ဒေဝတာ ဘဂဝတော သန္တိကေ ဣမံ ဂါထံ အဘာသိ –

‘‘ယေသံ ဓမ္မာ သုသမ္မုဋ္ဌာ၊ ပရဝါဒေသု နီယရေ၊

သုတ္တာ တေ နပ္ပဗုဇ္ဈန္တိ၊ ကာလော တေသံ ပဗုဇ္ဈိတု’’န္တိ.

‘‘ယေသံ ဓမ္မာ အသမ္မုဋ္ဌာ၊ ပရဝါဒေသု န နီယရေ၊

တေ သမ္ဗုဒ္ဓါ သမ္မဒညာ၊ စရန္တိ ဝိသမေ သမ’’န္တိ.

၉. မာနကာမသုတ္တံ

၉. သာဝတ္ထိနိဒါနံ. ဧကမန္တံ ဌိတာ ခေါ သာ ဒေဝတာ ဘဂဝတော သန္တိကေ ဣမံ ဂါထံ အဘာသိ –

‘‘န မာနကာမဿ ဒမော ဣဓတ္ထိ၊

န မောနမတ္ထိ အသမာဟိတဿ၊

ဧကော အရညေ ဝိဟရံ ပမတ္တော၊

န မစ္စုဓေယျဿ တရေယျ ပါရ’’န္တိ.

‘‘မာနံ ပဟာယ သုသမာဟိတတ္တော၊

သုစေတသော သဗ္ဗဓိ ဝိပ္ပမုတ္တော၊

ဧကော အရညေ ဝိဟရံ အပ္ပမတ္တော၊

သ မစ္စုဓေယျဿ တရေယျ ပါရ’’န္တိ.

၁၀. အရညသုတ္တံ

၁၀. သာဝတ္ထိနိဒါနံ. ဧကမန္တံ ဌိတာ ခေါ သာ ဒေဝတာ ဘဂဝန္တံ ဂါထာယ အဇ္ဈဘာသိ –

‘‘အရညေ ဝိဟရန္တာနံ၊ သန္တာနံ ဗြဟ္မစာရိနံ၊

ဧကဘတ္တံ ဘုဉ္ဇမာနာနံ၊ ကေန ဝဏ္ဏော ပသီဒတီ’’တိ.

‘‘အတီတံ နာနုသောစန္တိ၊ နပ္ပဇပ္ပန္တိ နာဂတံ၊

ပစ္စုပ္ပန္နေန ယာပေန္တိ၊ တေန ဝဏ္ဏော ပသီဒတိ’’.

‘‘အနာဂတပ္ပဇပ္ပါယ၊ အတီတဿာနုသောစနာ၊

ဧတေန ဗာလာ သုဿန္တိ၊ နဠောဝ ဟရိတော လုတော’’တိ.

နဠဝဂ္ဂေါ ပဌမော.

တဿုဒ္ဒါနံ –

ဩဃံ နိမောက္ခံ ဥပနေယျံ၊ အစ္စေန္တိ ကတိဆိန္ဒိ စ၊

ဇာဂရံ အပ္ပဋိဝိဒိတာ၊ သုသမ္မုဋ္ဌာ မာနကာမိနာ၊

အရညေ ဒသမော ဝုတ္တော၊ ဝဂ္ဂေါ တေန ပဝုစ္စတိ.