၁၁. ဒုတိယနာဂဝိမာနဝတ္ထု

၉၆၈. ‘‘မဟန္တံ နာဂံ အဘိရုယှ၊ သဗ္ဗသေတံ ဂဇုတ္တမံ၊

ဝနာ ဝနံ အနုပရိယာသိ၊ နာရီဂဏပုရက္ခတော၊

ဩဘာသေန္တော ဒိသာ သဗ္ဗာ၊ ဩသဓီ ဝိယ တာရကာ.

၉၆၉. ‘‘ကေန တေတာဒိသော ဝဏ္ဏော။ပေ။ဝဏ္ဏော စ တေ သဗ္ဗဒိသာ ပဘာသတီ’’တိ.

၉၇၁. သော ဒေဝပုတ္တော အတ္တမနော၊ ဝင်္ဂီသေနေဝ ပုစ္ဆိတော၊

ပဉှံ ပုဋ္ဌော ဝိယာကာသိ၊ ယဿ ကမ္မဿိဒံ ဖလံ.

၉၇၂. ‘‘အဟံ မနုဿေသု မနုဿဘူတော၊ ဥပါသကော စက္ခုမတော အဟောသိံ၊

ပါဏာတိပါတာ ဝိရတော အဟောသိံ၊ လောကေ အဒိန္နံ ပရိဝဇ္ဇယိဿံ.

၉၇၃. ‘‘အမဇ္ဇပေါ နော စ မုသာ အဘာဏိံ [အဘာသိံ (သီ. က.)]၊ သကေန ဒါရေန စ တုဋ္ဌော အဟောသိံ၊

အန္နဉ္စ ပါနဉ္စ ပသန္နစိတ္တော၊ သက္ကစ္စ ဒါနံ ဝိပုလံ အဒါသိံ.

၉၇၄. ‘‘တေန မေတာဒိသော ဝဏ္ဏော။ပေ။ဝဏ္ဏော စ မေ သဗ္ဗဒိသာ ပဘာသတီ’’တိ.

ဒုတိယနာဂဝိမာနံ ဧကာဒသမံ.