၁၂. တတိယနာဂဝိမာနဝတ္ထု

၉၇၆. ‘‘ကော နု ဒိဗ္ဗေန ယာနေန၊ သဗ္ဗသေတေန ဟတ္ထိနာ၊

တုရိယတာဠိတနိဂ္ဃေါသော၊ အန္တလိက္ခေ မဟီယတိ.

၉၇၇. ‘‘ဒေဝတာ နုသိ ဂန္ဓဗ္ဗော၊ အဒု [အာဒု (သီ. သျာ.)] သက္ကော ပုရိန္ဒဒေါ၊

အဇာနန္တာ တံ ပုစ္ဆာမ၊ ကထံ ဇာနေမု တံ မယ’’န္တိ.

၉၇၈. ‘‘နမှိ ဒေဝေါ န ဂန္ဓဗ္ဗော၊ နာပိ [နာမှိ (က.)] သက္ကော ပုရိန္ဒဒေါ၊

သုဓမ္မာ နာမ ယေ ဒေဝါ၊ တေသံ အညတရော အဟ’’န္တိ.

၉၇၉. ‘‘ပုစ္ဆာမ ဒေဝံ သုဓမ္မံ [ဒေဝ သုဓမ္မ (သျာ.)၊ ဒေဝ သုဓမ္မံ (က.)]၊ ပုထုံ ကတွာန အဉ္ဇလိံ၊

ကိံ ကတွာ မာနုသေ ကမ္မံ၊ သုဓမ္မံ ဥပပဇ္ဇတီ’’တိ.

၉၈၀. ‘‘ဥစ္ဆာဂါရံ တိဏာဂါရံ၊ ဝတ္ထာဂါရဉ္စ ယော ဒဒေ၊

တိဏ္ဏံ အညတရံ ဒတွာ၊ သုဓမ္မံ ဥပပဇ္ဇတီ’’တိ.

တတိယနာဂဝိမာနံ ဒွါဒသမံ.