၁၂. ရဇ္ဇုမာလာဝိမာနဝတ္ထု

၈၂၆. ‘‘အဘိက္ကန္တေန ဝဏ္ဏေန၊ ယာ တွံ တိဋ္ဌသိ ဒေဝတေ၊

ဟတ္ထပါဒေ စ ဝိဂ္ဂယှ၊ နစ္စသိ သုပ္ပဝါဒိတေ.

၈၂၇. ‘‘တဿာ တေ နစ္စမာနာယ၊ အင်္ဂမင်္ဂေဟိ သဗ္ဗသော၊

ဒိဗ္ဗာ သဒ္ဒါ နိစ္ဆရန္တိ၊ သဝနီယာ မနောရမာ.

၈၂၈. ‘‘တဿာ တေ နစ္စမာနာယ၊ အင်္ဂမင်္ဂေဟိ သဗ္ဗသော၊

ဒိဗ္ဗာ ဂန္ဓာ ပဝါယန္တိ၊ သုစိဂန္ဓာ မနောရမာ.

၈၂၉. ‘‘ဝိဝတ္တမာနာ ကာယေန၊ ယာ ဝေဏီသု ပိဠန္ဓနာ၊

တေသံ သုယျတိ နိဂ္ဃေါသော၊ တုရိယေ ပဉ္စင်္ဂိကေ ယထာ.

၈၃၀. ‘‘ဝဋံသကာ ဝါတဓုတာ၊ ဝါတေန သမ္ပကမ္ပိတာ၊

တေသံ သုယျတိ နိဂ္ဃေါသော၊ တုရိယေ ပဉ္စင်္ဂိကေ ယထာ.

၈၃၁. ‘‘ယာပိ တေ သိရသ္မိံ မာလာ၊ သုစိဂန္ဓာ မနောရမာ၊

ဝါတိ ဂန္ဓော ဒိသာ သဗ္ဗာ၊ ရုက္ခော မဉ္ဇူသကော ယထာ.

၈၃၂. ‘‘ဃာယသေ တံ သုစိဂန္ဓံ၊ ရူပံ ပဿသိ အမာနုသံ၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ.

၈၃၃. ‘‘ဒါသီ အဟံ ပုရေ အာသိံ၊ ဂယာယံ ဗြာဟ္မဏဿဟံ၊

အပ္ပပုညာ အလက္ခိကာ၊ ရဇ္ဇုမာလာတိ မံ ဝိဒုံ [ဝိဒူ (သျာ. ပီ. က.)].

၈၃၄. ‘‘အက္ကောသာနံ ဝဓာနဉ္စ၊ တဇ္ဇနာယ စ ဥဂ္ဂတာ [ဥက္ကတာ (သီ. သျာ.)]၊

ကုဋံ ဂဟေတွာ နိက္ခမ္မ၊ အဂဉ္ဆိံ [အာဂစ္ဆိံ (သျာ. က.)၊ အဂစ္ဆိံ (ပီ.)၊ ဂစ္ဆိံ (သီ.)] ဥဒဟာရိယာ [ဥဒကဟာရိယာ (သီ.)].

၈၃၅. ‘‘ဝိပထေ ကုဋံ နိက္ခိပိတွာ၊ ဝနသဏ္ဍံ ဥပါဂမိံ၊

ဣဓေဝါဟံ မရိဿာမိ၊ ကော အတ္ထော [ကွတ္ထောသိ (က.)၊ ကီဝတ္ထောပိ (သျာ.)] ဇီဝိတေန မေ.

၈၃၆. ‘‘ဒဠှံ ပါသံ ကရိတွာန၊ အာသုမ္ဘိတွာန ပါဒပေ၊

တတော ဒိသာ ဝိလောကေသိံ၊ကော နု ခေါ ဝနမဿိတော.

၈၃၇. ‘‘တတ္ထဒ္ဒသာသိံ သမ္ဗုဒ္ဓံ၊ သဗ္ဗလောကဟိတံ မုနိံ၊

နိသိန္နံ ရုက္ခမူလသ္မိံ၊ ဈာယန္တံ အကုတောဘယံ.

၈၃၈. ‘‘တဿာ မေ အဟု သံဝေဂေါ၊ အဗ္ဘုတော လောမဟံသနော၊

ကော နု ခေါ ဝနမဿိတော၊ မနုဿော ဥဒါဟု ဒေဝတာ.

၈၃၉. ‘‘ပါသာဒိကံ ပသာဒနီယံ၊ ဝနာ နိဗ္ဗနမာဂတံ၊

ဒိသွာ မနော မေ ပသီဒိ၊ နာယံ ယာဒိသကီဒိသော.

၈၄၀. ‘‘ဂုတ္တိန္ဒြိယော ဈာနရတော၊ အဗဟိဂ္ဂတမာနသော၊

ဟိတော သဗ္ဗဿ လောကဿ၊ ဗုဒ္ဓေါ အယံ [သောယံ (သီ.)] ဘဝိဿတိ.

၈၄၁. ‘‘ဘယဘေရဝေါ ဒုရာသဒေါ၊ သီဟောဝ ဂုဟမဿိတော၊

ဒုလ္လဘာယံ ဒဿနာယ၊ ပုပ္ဖံ ဩဒုမ္ဗရံ ယထာ.

၈၄၂. ‘‘သော မံ မုဒူဟိ ဝါစာဟိ၊ အာလပိတွာ တထာဂတော၊

ရဇ္ဇုမာလေတိ မံဝေါစ၊ သရဏံ ဂစ္ဆ တထာဂတံ.

၈၄၃. ‘‘တာဟံ ဂိရံ သုဏိတွာန၊ နေလံ အတ္ထဝတိံ သုစိံ၊

သဏှံ မုဒုဉ္စ ဝဂ္ဂုဉ္စ၊ သဗ္ဗသောကာပနူဒနံ.

၈၄၄. ‘‘ကလ္လစိတ္တဉ္စ မံ ဉတွာ၊ ပသန္နံ သုဒ္ဓမာနသံ၊

ဟိတော သဗ္ဗဿ လောကဿ၊ အနုသာသိ တထာဂတော.

၈၄၅. ‘‘ဣဒံ ဒုက္ခန္တိ မံဝေါစ၊ အယံ ဒုက္ခဿ သမ္ဘဝေါ၊

ဒုက္ခ [အယံ (သီ. သျာ. ပီ.)] နိရောဓော မဂ္ဂေါ စ [ဒုက္ခနိရောဓော စ (သျာ.)]၊ အဉ္ဇသော အမတောဂဓော.

၈၄၆. ‘‘အနုကမ္ပကဿ ကုသလဿ၊ ဩဝါဒမှိ အဟံ ဌိတာ၊

အဇ္ဈဂါ အမတံ သန္တိံ၊ နိဗ္ဗာနံ ပဒမစ္စုတံ.

၈၄၇. ‘‘သာဟံ အဝဋ္ဌိတာပေမာ၊ ဒဿနေ အဝိကမ္ပိနီ၊

မူလဇာတာယ သဒ္ဓါယ၊ ဓီတာ ဗုဒ္ဓဿ ဩရသာ.

၈၄၈. ‘‘သာဟံ ရမာမိ ကီဠာမိ၊ မောဒါမိ အကုတောဘယာ၊

ဒိဗ္ဗမာလံ ဓာရယာမိ၊ ပိဝါမိ မဓုမဒ္ဒဝံ.

၈၄၉. ‘‘သဋ္ဌိတုရိယသဟဿာနိ၊ ပဋိဗောဓံ ကရောန္တိ မေ၊

အာဠမ္ဗော ဂဂ္ဂရော ဘီမော၊ သာဓုဝါဒီ စ သံသယော.

၈၅၀. ‘‘ပေါက္ခရော စ သုဖဿော စ၊ ဝီဏာမောက္ခာ စ နာရိယော၊

နန္ဒာ စေဝ သုနန္ဒာ စ၊ သောဏဒိန္နာ သုစိမှိတာ.

၈၅၁. ‘‘အလမ္ဗုသာ မိဿကေသီ စ၊ ပုဏ္ဍရီကာတိဒါရုဏီ [။ တိစာရုဏီ (သီ.)]၊

ဧဏီဖဿာ သုဖဿာ [သုပဿာ (သျာ. ပီ. က.)] စ၊ သုဘဒ္ဒါ [သံဘဒ္ဒါ (က.)] မုဒုဝါဒိနီ.

၈၅၂. ‘‘ဧတာ စညာ စ သေယျာသေ၊ အစ္ဆရာနံ ပဗောဓိကာ၊

တာ မံ ကာလေနုပါဂန္တွာ၊ အဘိဘာသန္တိ ဒေဝတာ.

၈၅၃. ‘‘ဟန္ဒ နစ္စာမ ဂါယာမ၊ ဟန္ဒ တံ ရမယာမသေ၊

နယိဒံ အကတပုညာနံ၊ ကတပုညာနမေဝိဒံ.

၈၅၄. ‘‘အသောကံ နန္ဒနံ ရမ္မံ၊ တိဒသာနံ မဟာဝနံ၊

သုခံ အကတပုညာနံ၊ ဣဓ နတ္ထိ ပရတ္ထ စ.

၈၅၅. ‘‘သုခဉ္စ ကတပုညာနံ၊ ဣဓ စေဝ ပရတ္ထ စ၊

တေသံ သဟဗျကာမာနံ၊ ကတ္တဗ္ဗံ ကုသလံ ဗဟုံ၊

ကတပုညာ ဟိ မောဒန္တိ၊ သဂ္ဂေ ဘောဂသမင်္ဂိနော.

၈၅၆. ‘‘ဗဟူနံ ဝတ အတ္ထာယ၊ ဥပ္ပဇ္ဇန္တိ တထာဂတာ၊

ဒက္ခိဏေယျာ မနုဿာနံ၊ ပုညခေတ္တာနမာကရာ၊

ယတ္ထ ကာရံ ကရိတွာန၊ သဂ္ဂေ မောဒန္တိ ဒါယကာ’’တိ.

ရဇ္ဇုမာလာဝိမာနံ ဒွါဒသမံ.

မဉ္ဇိဋ္ဌကဝဂ္ဂေါ စတုတ္ထော နိဋ္ဌိတော.

တဿုဒ္ဒါနံ –

မဉ္ဇိဋ္ဌာ ပဘဿရာ နာဂါ၊ အလောမာကဉ္ဇိကဒါယိကာ၊

ဝိဟာရစတုရိတ္ထမ္ဗာ၊ ပီတာ ဥစ္ဆုဝန္ဒနရဇ္ဇုမာလာ စ၊

ဝဂ္ဂေါ တေန ပဝုစ္စတီတိ.

ဣတ္ထိဝိမာနံ သမတ္တံ.