၉. ဝိသာလက္ခိဝိမာနဝတ္ထု

၆၆၆. ‘‘ကာ နာမ တွံ ဝိသာလက္ခိ [ဝိသာလက္ခီ (သျာ.)]၊ ရမ္မေ စိတ္တလတာဝနေ၊

သမန္တာ အနုပရိယာသိ၊ နာရီဂဏပုရက္ခတာ [ပုရက္ခိတာ (သျာ. က.)].

၆၆၇. ‘‘ယဒါ ဒေဝါ တာဝတိံသာ၊ ပဝိသန္တိ ဣမံ ဝနံ၊

သယောဂ္ဂါ သရထာ သဗ္ဗေ၊ စိတြာ ဟောန္တိ ဣဓာဂတာ.

၆၆၈. ‘‘တုယှဉ္စ ဣဓ ပတ္တာယ၊ ဥယျာနေ ဝိစရန္တိယာ၊

ကာယေ န ဒိဿတီ စိတ္တံ၊ ကေန ရူပံ တဝေဒိသံ၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ.

၆၆၉. ‘‘ယေန ကမ္မေန ဒေဝိန္ဒ၊ ရူပံ မယှံ ဂတီ စ မေ၊

ဣဒ္ဓိ စ အာနုဘာဝေါ စ၊ တံ သုဏောဟိ ပုရိန္ဒဒ.

၆၇၀. ‘‘အဟံ ရာဇဂဟေ ရမ္မေ၊ သုနန္ဒာ နာမုပါသိကာ၊

သဒ္ဓါ သီလေန သမ္ပန္နာ၊ သံဝိဘာဂရတာ သဒါ.

၆၇၁. ‘‘အစ္ဆာဒနဉ္စ ဘတ္တဉ္စ၊ သေနာသနံ ပဒီပိယံ၊

အဒါသိံ ဥဇုဘူတေသု၊ ဝိပ္ပသန္နေန စေတသာ.

၆၇၂. ‘‘စာတုဒ္ဒသိံ [စတုဒ္ဒသိံ (ပီ. က.)] ပဉ္စဒသိံ၊ ယာ စ ပက္ခဿ အဋ္ဌမီ၊

ပါဋိဟာရိယပက္ခဉ္စ၊ အဋ္ဌင်္ဂသုသမာဂတံ.

၆၇၃. ‘‘ဥပေါသထံ ဥပဝသိဿံ၊ သဒါ သီလေသု သံဝုတာ၊

သညမာ သံဝိဘာဂါ စ၊ ဝိမာနံ အာဝသာမဟံ.

၆၇၄. ‘‘ပါဏာတိပါတာ ဝိရတာ၊ မုသာဝါဒါ စ သညတာ၊

ထေယျာ စ အတိစာရာ စ၊ မဇ္ဇပါနာ စ အာရကာ.

၆၇၅. ‘‘ပဉ္စသိက္ခာပဒေ ရတာ၊ အရိယသစ္စာန ကောဝိဒါ၊

ဥပါသိကာ စက္ခုမတော၊ ဂေါတမဿ ယသဿိနော.

၆၇၆. ‘‘တဿာ မေ ဉာတိကုလာ ဒါသီ [ဉာတိကုလံ အာသီ (သျာ. က.)]၊ သဒါ မာလာဘိဟာရတိ၊

တာဟံ ဘဂဝတော ထူပေ၊ သဗ္ဗမေဝါဘိရောပယိံ.

၆၇၇. ‘‘ဥပေါသထေ စဟံ ဂန္တွာ၊ မာလာဂန္ဓဝိလေပနံ၊

ထူပသ္မိံ အဘိရောပေသိံ၊ ပသန္နာ သေဟိ ပါဏိဘိ.

၆၇၈. ‘‘တေန ကမ္မေန ဒေဝိန္ဒ၊ ရူပံ မယှံ ဂတီ စ မေ၊

ဣဒ္ဓီ စ အာနုဘာဝေါ စ၊ ယံ မာလံ အဘိရောပယိံ.

၆၇၉. ‘‘ယဉ္စ သီလဝတီ အာသိံ၊ န တံ တာဝ ဝိပစ္စတိ၊

အာသာ စ ပန မေ ဒေဝိန္ဒ၊ သကဒါဂါမိနီ သိယ’’န္တိ.

ဝိသာလက္ခိဝိမာနံ နဝမံ.