၁၀. ပါရိစ္ဆတ္တကဝိမာနဝတ္ထု

၆၈၀. ‘‘ပါရိစ္ဆတ္တကေ ကောဝိဠာရေ၊ ရမဏီယေ မနောရမေ၊

ဒိဗ္ဗမာလံ ဂန္ထမာနာ၊ ဂါယန္တီ သမ္ပမောဒသိ.

၆၈၁. ‘‘တဿာ တေ နစ္စမာနာယ၊ အင်္ဂမင်္ဂေဟိ သဗ္ဗသော၊

ဒိဗ္ဗာ သဒ္ဒါ နိစ္ဆရန္တိ၊ သဝနီယာ မနောရမာ.

၆၈၂. ‘‘တဿာ တေ နစ္စမာနာယ၊ အင်္ဂမင်္ဂေဟိ သဗ္ဗသော၊

ဒိဗ္ဗာ ဂန္ဓာ ပဝါယန္တိ၊ သုစိဂန္ဓာ မနောရမာ.

၆၈၃. ‘‘ဝိဝတ္တမာနာ ကာယေန၊ ယာ ဝေဏီသု ပိဠန္ဓနာ.

တေသံ သုယျတိ နိဂ္ဃေါသော၊ တူရိယေ ပဉ္စင်္ဂိကေ ယထာ.

၆၈၄. ‘‘ဝဋံသကာ ဝါတဓုတာ [ဝါတဓူတာ (သီ. သျာ.)]၊ ဝါတေန သမ္ပကမ္ပိတာ၊

တေသံ သုယျတိ နိဂ္ဃေါသော၊ တူရိယေ ပဉ္စင်္ဂိကေ ယထာ.

၆၈၅. ‘‘ယာပိ တေ သိရသ္မိံ မာလာ၊ သုစိဂန္ဓာ မနောရမာ၊

ဝါတိ ဂန္ဓော ဒိသာ သဗ္ဗာ၊ ရုက္ခော မဉ္ဇူသကော ယထာ.

၆၈၆. ‘‘ဃာယသေ တံ သုစိဂန္ဓံ [သုစိံ ဂန္ဓံ (သီ.)]၊ ရူပံ ပဿသိ အမာနုသံ [မာနုသံ (ပီ.)]၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ.

၆၈၇. ‘‘ပဘဿရံ အစ္စိမန္တံ၊ ဝဏ္ဏဂန္ဓေန သံယုတံ၊

အသောကပုပ္ဖမာလာဟံ၊ ဗုဒ္ဓဿ ဥပနာမယိံ.

၆၈၈. ‘‘တာဟံ ကမ္မံ ကရိတွာန၊ ကုသလံ ဗုဒ္ဓဝဏ္ဏိတံ၊

အပေတသောကာ သုခိတာ၊ သမ္ပမောဒါမနာမယာ’’တိ.

ပါရိစ္ဆတ္တကဝိမာနံ ဒသမံ.

ပါရိစ္ဆတ္တကဝဂ္ဂေါ တတိယော နိဋ္ဌိတော.

တဿုဒ္ဒါနံ –

ဥဠာရော ဥစ္ဆု ပလ္လင်္ကော၊ လတာ စ ဂုတ္တိလေန စ၊

ဒဒ္ဒလ္လပေသမလ္လိကာ၊ ဝိသာလက္ခိ ပါရိစ္ဆတ္တကော၊

ဝဂ္ဂေါ တေန ပဝုစ္စတီတိ.