၈. မလ္လိကာဝိမာနဝတ္ထု

၆၅၈. ‘‘ပီတဝတ္ထေ ပီတဓဇေ၊ ပီတာလင်္ကာရဘူသိတေ၊

ပီတန္တရာဟိ ဝဂ္ဂူဟိ၊ အပိဠန္ဓာဝ သောဘသိ.

၆၅၉. ‘‘ကာ ကမ္ဗုကာယူရဓရေ [ကကမ္ဗုကာယုရဓရေ (သျာ.)]၊ ကဉ္စနာဝေဠဘူသိတေ၊

ဟေမဇာလကသဉ္ဆန္နေ [ပစ္ဆန္နေ (သီ.)]၊ နာနာရတနမာလိနီ.

၆၆၀. ‘‘သောဝဏ္ဏမယာ လောဟိတင်္ဂမယာ [လောဟိတင်္ကမယာ (သီ. သျာ.)] စ၊ မုတ္တာမယာ ဝေဠုရိယမယာ စ၊

မသာရဂလ္လာ သဟလောဟိတင်္ဂါ [သဟလောဟိတင်္ကာ (သီ.)၊ သဟလောဟိတကာ (သျာ.)]၊ ပါရေဝတက္ခီဟိ မဏီဟိ စိတ္တတာ.

၆၆၁. ‘‘ကောစိ ကောစိ ဧတ္ထ မယူရသုဿရော၊ ဟံသဿ ရညော ကရဝီကသုဿရော၊

တေသံ သရော သုယျတိ ဝဂ္ဂုရူပေါ၊ ပဉ္စင်္ဂိကံ တူရိယမိဝပ္ပဝါဒိတံ.

၆၆၂. ‘‘ရထော စ တေ သုဘော ဝဂ္ဂု [ဝဂ္ဂူ (သျာ.)]၊ နာနာရတနစိတ္တိတော [နာနာရတနစိတ္တင်္ဂေါ (သျာ.)]၊

နာနာဝဏ္ဏာဟိ ဓာတူဟိ၊ သုဝိဘတ္တောဝ သောဘတိ.

၆၆၃. ‘‘တသ္မိံ ရထေ ကဉ္စနဗိမ္ဗဝဏ္ဏေ၊ ယာ တွံ [ယတ္ထ (က. သီ. သျာ. က.)] ဌိတာ ဘာသသိ မံ ပဒေသံ၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ.

၆၆၄. ‘‘သောဝဏ္ဏဇာလံ မဏိသောဏ္ဏစိတ္တိတံ [ဝိစိတ္တံ (က.)၊ စိတ္တံ (သီ. သျာ.)]၊ မုတ္တာစိတံ ဟေမဇာလေန ဆန္နံ [သဉ္ဆန္နံ (က.)]၊

ပရိနိဗ္ဗုတေ ဂေါတမေ အပ္ပမေယျေ၊ ပသန္နစိတ္တာ အဟမာဘိရောပယိံ.

၆၆၅. ‘‘တာဟံ ကမ္မံ ကရိတွာန၊ ကုသလံ ဗုဒ္ဓဝဏ္ဏိတံ၊

အပေတသောကာ သုခိတာ၊ သမ္ပမောဒါမနာမယာ’’တိ.

မလ္လိကာဝိမာနံ အဋ္ဌမံ.