၇. ပေသဝတီဝိမာနဝတ္ထု

၆၄၆. ‘‘ဖလိကရဇတဟေမဇာလဆန္နံ၊ ဝိဝိဓစိတြတလမဒ္ဒသံ သုရမ္မံ၊

ဗျမှံ သုနိမ္မိတံ တောရဏူပပန္နံ၊ ရုစကုပကိဏ္ဏမိဒံ သုဘံ ဝိမာနံ.

၆၄၇. ‘‘ဘာတိ စ ဒသ ဒိသာ နဘေဝ သုရိယော၊ သရဒေ တမောနုဒေါ သဟဿရံသီ၊

တထာ တပတိမိဒံ တဝ ဝိမာနံ၊ ဇလမိဝ ဓူမသိခေါ နိသေ နဘဂ္ဂေ.

၆၄၈. ‘‘မုသတီဝ နယနံ သတေရတာဝ [သတေရိတာဝ (သျာ. က.)]၊ အာကာသေ ဌပိတမိဒံ မနုညံ၊

ဝီဏာမုရဇသမ္မတာဠဃုဋ္ဌံ၊ ဣဒ္ဓံ ဣန္ဒပုရံ ယထာ တဝေဒံ.

၆၄၉. ‘‘ပဒုမကုမုဒုပ္ပလကုဝလယံ၊ ယောဓိက [ယူဓိက (သီ.)] ဗန္ဓုကနောဇကာ [ယောထိကာ ဘဏ္ဍိကာ နောဇကာ (သျာ.)] စ သန္တိ၊

သာလကုသုမိတပုပ္ဖိတာ အသောကာ၊ ဝိဝိဓဒုမဂ္ဂသုဂန္ဓသေဝိတမိဒံ.

၆၅၀. ‘‘သဠလလဗုဇဘုဇက [သုဇက (သီ. သျာ.)] သံယုတ္တာ [သညတာ (သီ.)]၊ ကုသကသုဖုလ္လိတလတာဝလမ္ဗိနီဟိ၊

မဏိဇာလသဒိသာ ယသဿိနီ၊ ရမ္မာ ပေါက္ခရဏီ ဥပဋ္ဌိတာ တေ.

၆၅၁. ‘‘ဥဒကရုဟာ စ ယေတ္ထိ ပုပ္ဖဇာတာ၊ ထလဇာ ယေ စ သန္တိ ရုက္ခဇာတာ၊

မာနုသကာမာနုဿကာ စ ဒိဗ္ဗာ၊ သဗ္ဗေ တုယှံ နိဝေသနမှိ ဇာတာ.

၆၅၂. ‘‘ကိဿ သံယမဒမဿယံ ဝိပါကော၊ ကေနာသိ ကမ္မဖလေနိဓူပပန္နာ၊

ယထာ စ တေ အဓိဂတမိဒံ ဝိမာနံ၊ တဒနုပဒံ အဝစာသိဠာရပမှေ’’တိ [ပခုမေတိ (သီ.)].

၆၅၃. ‘‘ယထာ စ မေ အဓိဂတမိဒံ ဝိမာနံ၊ ကောဉ္စမယူရစကောရ [စင်္ကောရ (က.)] သံဃစရိတံ၊

ဒိဗျ [ဒိဗ္ဗ (သီ. ပီ.)] ပိလဝဟံသရာဇစိဏ္ဏံ၊ ဒိဇကာရဏ္ဍဝကောကိလာဘိနဒိတံ.

၆၅၄. ‘‘နာနာသန္တာနကပုပ္ဖရုက္ခဝိဝိဓာ၊ ပါဋလိဇမ္ဗုအသောကရုက္ခဝန္တံ၊

ယထာ စ မေ အဓိဂတမိဒံ ဝိမာနံ၊ တံ တေ ပဝေဒယာမိ [ပဝဒိဿာမိ (သီ.)၊ ပဝေဒိဿာမိ (ပီ.)] သုဏောဟိ ဘန္တေ.

၆၅၅. ‘‘မဂဓဝရပုရတ္ထိမေန၊ နာဠကဂါမော နာမ အတ္ထိ ဘန္တေ၊

တတ္ထ အဟောသိံ ပုရေ သုဏိသာ၊ ပေသဝတီတိ [သေသဝတီတိ (သီ. သျာ.)] တတ္ထ ဇာနိံသု မမံ.

၆၅၆. ‘‘သာဟမပစိတတ္ထဓမ္မကုသလံ၊ ဒေဝမနုဿပူဇိတံ မဟန္တံ၊

ဥပတိဿံ နိဗ္ဗုတမပ္ပမေယျံ၊ မုဒိတမနာ ကုသုမေဟိ အဗ္ဘုကိရိံ [အဗ္ဘောကိရိံ (သီ. သျာ. ပီ. က.)].

၆၅၇. ‘‘ပရမဂတိဂတဉ္စ ပူဇယိတွာ၊ အန္တိမဒေဟဓရံ ဣသိံ ဥဠာရံ၊

ပဟာယ မာနုသကံ သမုဿယံ၊ တိဒသဂတာ ဣဓ မာဝသာမိ ဌာန’’န္တိ.

ပေသဝတီဝိမာနံ သတ္တမံ.