၆. ဒဒ္ဒလ္လဝိမာနဝတ္ထု

၆၁၉. ‘‘ဒဒ္ဒလ္လမာနာ [ဒဒ္ဒဠှမာနာ (က.)] ဝဏ္ဏေန၊ ယသသာ စ ယသဿိနီ၊

သဗ္ဗေ ဒေဝေ တာဝတိံသေ၊ ဝဏ္ဏေန အတိရောစသိ.

၆၂၀. ‘‘ဒဿနံ နာဘိဇာနာမိ၊ ဣဒံ ပဌမဒဿနံ၊

ကသ္မာ ကာယာ နု အာဂမ္မ၊ နာမေန ဘာသသေ မမ’’န္တိ.

၆၂၁. ‘‘အဟံ ဘဒ္ဒေ သုဘဒ္ဒါသိံ၊ ပုဗ္ဗေ မာနုသကေ ဘဝေ၊

သဟဘရိယာ စ တေ အာသိံ၊ ဘဂိနီ စ ကနိဋ္ဌိကာ.

၆၂၂. ‘‘သာ အဟံ ကာယဿ ဘေဒါ၊ ဝိပ္ပမုတ္တာ တတော စုတာ၊

နိမ္မာနရတီနံ ဒေဝါနံ၊ ဥပပန္နာ သဟဗျတ’’န္တိ.

၆၂၃. ‘‘ပဟူတကတကလျာဏာ၊ တေ ဒေဝေ ယန္တိ ပါဏိနော၊

ယေသံ တွံ ကိတ္တယိဿသိ၊ သုဘဒ္ဒေ ဇာတိမတ္တနော.

၆၂၄. ‘‘အထ [ကထံ (သီ. သျာ.)] တွံ ကေန ဝဏ္ဏေန၊ ကေန ဝါ အနုသာသိတာ၊

ကီဒိသေနေဝ ဒါနေန၊ သုဗ္ဗတေန ယသဿိနီ.

၆၂၅. ‘‘ယသံ ဧတာဒိသံ ပတ္တာ၊ ဝိသေသံ ဝိပုလမဇ္ဈဂါ၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ.

၆၂၆. ‘‘အဋ္ဌေဝ ပိဏ္ဍပါတာနိ၊ ယံ ဒါနံ အဒဒံ ပုရေ၊

ဒက္ခိဏေယျဿ သံဃဿ၊ ပသန္နာ သေဟိ ပါဏိဘိ.

၆၂၇. ‘‘တေန မေတာဒိသော ဝဏ္ဏော။ပေ။ဝဏ္ဏော စ မေ သဗ္ဗဒိသာ ပဘာသတီ’’တိ.

၆၂၉. ‘‘အဟံ တယာ ဗဟုတရေ ဘိက္ခူ၊ သညတေ ဗြဟ္မစာရယော [ဗြဟ္မစရိနော (သျာ.)၊ ဗြဟ္မစာရိယေ (ပီ. က.)]၊

တပ္ပေသိံ အန္နပါနေန၊ ပသန္နာ သေဟိ ပါဏိဘိ.

၆၃၀. ‘‘တယာ ဗဟုတရံ ဒတွာ၊ ဟီနကာယူပဂါ အဟံ [အဟုံ (က. သီ.)]၊

ကထံ တွံ အပ္ပတရံ ဒတွာ၊ ဝိသေသံ ဝိပုလမဇ္ဈဂါ၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ.

၆၃၁. ‘‘မနောဘာဝနီယော ဘိက္ခု၊ သန္ဒိဋ္ဌော မေ ပုရေ အဟု၊

တာဟံ ဘတ္တေန [ဘဒ္ဒေ (က.)] နိမန္တေသိံ၊ ရေဝတံ အတ္တနဋ္ဌမံ.

၆၃၂. ‘‘သော မေ အတ္ထပုရေက္ခာရော၊ အနုကမ္ပာယ ရေဝတော၊

သံဃေ ဒေဟီတိ မံဝေါစ၊ တဿာဟံ ဝစနံ ကရိံ.

၆၃၃. ‘‘သာ ဒက္ခိဏာ သံဃဂတာ၊ အပ္ပမေယျေ ပတိဋ္ဌိတာ၊

ပုဂ္ဂလေသု တယာ ဒိန္နံ၊ န တံ တဝ မဟပ္ဖလ’’န္တိ.

၆၃၄. ‘‘ဣဒါနေဝါဟံ ဇာနာမိ၊ သံဃေ ဒိန္နံ မဟပ္ဖလံ၊

သာဟံ ဂန္တွာ မနုဿတ္တံ၊ ဝဒညူ ဝီတမစ္ဆရာ၊

သံဃေ ဒါနာနိ ဒဿာမိ [သံဃေ ဒါနံ ဒဿာမိဟံ (သျာ.)]၊ အပ္ပမတ္တာ ပုနပ္ပုန’’န္တိ.

၆၃၅. ‘‘ကာ ဧသာ ဒေဝတာ ဘဒ္ဒေ၊ တယာ မန္တယတေ သဟ၊

သဗ္ဗေ ဒေဝေ တာဝတိံသေ၊ ဝဏ္ဏေန အတိရောစတီ’’တိ.

၆၃၆. ‘‘မနုဿဘူတာ ဒေဝိန္ဒ၊ ပုဗ္ဗေ မာနုသကေ ဘဝေ၊

သဟဘရိယာ စ မေ အာသိ၊ ဘဂိနီ စ ကနိဋ္ဌိကာ၊

သံဃေ ဒါနာနိ ဒတွာန၊ ကတပုညာ ဝိရောစတီ’’တိ.

၆၃၇. ‘‘ဓမ္မေန ပုဗ္ဗေ ဘဂိနီ၊ တယာ ဘဒ္ဒေ ဝိရောစတိ၊

ယံ သံဃမှိ အပ္ပမေယျေ၊ ပတိဋ္ဌာပေသိ ဒက္ခိဏံ.

၆၃၈. ‘‘ပုစ္ဆိတော ဟိ မယာ ဗုဒ္ဓေါ၊ ဂိဇ္ဈကူဋမှိ ပဗ္ဗတေ၊

ဝိပါကံ သံဝိဘာဂဿ၊ ယတ္ထ ဒိန္နံ မဟပ္ဖလံ.

၆၃၉. ‘‘ယဇမာနာနံ မနုဿာနံ၊ ပုညပေက္ခာန ပါဏိနံ၊

ကရောတံ ဩပဓိကံ ပုညံ၊ ယတ္ထ ဒိန္နံ မဟပ္ဖလံ.

၆၄၀. ‘‘တံ မေ ဗုဒ္ဓေါ ဝိယာကာသိ၊ ဇာနံ ကမ္မဖလံ သကံ၊

ဝိပါကံ သံဝိဘာဂဿ၊ ယတ္ထ ဒိန္နံ မဟပ္ဖလံ.

၆၄၁. [ဝိ. ဝ. ၇၅၀၊ ကထာ. ၇၉၈] ‘‘စတ္တာရော စ ပဋိပန္နာ၊ စတ္တာရော စ ဖလေ ဌိတာ၊

ဧသ သံဃော ဥဇုဘူတော၊ ပညာသီလသမာဟိတော.

၆၄၂. [ဝိ. ဝ. ၇၅၁၊ ကထာ. ၇၉၈] ‘‘ယဇမာနာနံ မနုဿာနံ၊ ပုညပေက္ခာန ပါဏိနံ၊

ကရောတံ ဩပဓိကံ ပုညံ၊ သံဃေ ဒိန္နံ မဟပ္ဖလံ.

၆၄၃. [ဝိ. ဝ. ၇၅၂၊ ကထာ. ၇၉၈] ‘‘ဧသော ဟိ သံဃော ဝိပုလော မဟဂ္ဂတော၊ ဧသပ္ပမေယျော ဥဒဓီဝ သာဂရော၊

ဧတေ ဟိ သေဋ္ဌာ နရဝီရသာဝကာ၊ ပဘင်္ကရာ ဓမ္မမုဒီရယန္တိ [ဓမ္မကထံ ဥဒီရယန္တိ (သျာ.)].

၆၄၄. [ဝိ. ဝ. ၇၅၃၊ ကထာ. ၇၉၈] ‘‘တေသံ သုဒိန္နံ သုဟုတံ သုယိဋ္ဌံ၊ ယေ သံဃမုဒ္ဒိဿ ဒဒန္တိ ဒါနံ၊

သာ ဒက္ခိဏာ သံဃဂတာ ပတိဋ္ဌိတာ၊ မဟပ္ဖလာ လောကဝိဒူန [လောကဝိဒူဟိ (သျာ. က.)] ဝဏ္ဏိတာ.

၆၄၅. [ဝိ. ဝ. ၇၅၄၊ ကထာ. ၇၉၈] ‘‘ဧတာဒိသံ ယညမနုဿရန္တာ [ပုညမနုဿရန္တာ (သျာ. က.)]၊ ယေ ဝေဒဇာတာ ဝိစရန္တိ လောကေ၊

ဝိနေယျ မစ္ဆေရမလံ သမူလံ၊ အနိန္ဒိတာ သဂ္ဂမုပေန္တိ ဌာန’’န္တိ.

ဒဒ္ဒလ္လဝိမာနံ [ဒဒ္ဒဠှဝိမာနံ (က.)] ဆဋ္ဌံ.