၃. ပလ္လင်္ကဝိမာနဝတ္ထု

၃၀၇. ‘‘ပလ္လင်္ကသေဋ္ဌေ မဏိသောဏ္ဏစိတ္တေ၊ ပုပ္ဖါဘိကိဏ္ဏေ သယနေ ဥဠာရေ၊

တတ္ထစ္ဆသိ ဒေဝိ မဟာနုဘာဝေ၊ ဥစ္စာဝစာ ဣဒ္ဓိ ဝိကုဗ္ဗမာနာ.

၃၀၈. ‘‘ဣမာ စ တေ အစ္ဆရာယော သမန္တတော၊ နစ္စန္တိ ဂါယန္တိ ပမောဒယန္တိ၊

ဒေဝိဒ္ဓိပတ္တာသိ မဟာနုဘာဝေ၊ မနုဿဘူတာ ကိမကာသိ ပုညံ၊

ကေနာသိ ဧဝံ ဇလိတာနုဘာဝါ၊ ဝဏ္ဏော စ တေ သဗ္ဗဒိသာ ပဘာသတီ’’တိ.

၃၀၉. ‘‘အဟံ မနုဿေသု မနုဿဘူတာ၊ အဍ္ဎေ ကုလေ သုဏိသာ အဟောသိံ၊

အက္ကောဓနာ ဘတ္တုဝသာနုဝတ္တိနီ၊ ဥပေါသထေ အပ္ပမတ္တာ အဟောသိံ [အပ္ပမတ္တာ ဥပေါသထေ (သျာ. က.)].

၃၁၀. ‘‘မနုဿဘူတာ ဒဟရာ အပါပိကာ [ဒဟရာသ’ပါပိကာ (သီ.)]၊ ပသန္နစိတ္တာ ပတိမာဘိရာဓယိံ၊

ဒိဝါ စ ရတ္တော စ မနာပစာရိနီ၊ အဟံ ပုရေ သီလဝတီ အဟောသိံ.

၃၁၁. ‘‘ပါဏာတိပါတာ ဝိရတာ အစောရိကာ၊ သံသုဒ္ဓကာယာ သုစိဗြဟ္မစာရိနီ၊

အမဇ္ဇပါ နော စ မုသာ အဘာဏိံ၊ သိက္ခာပဒေသု ပရိပူရကာရိနီ.

၃၁၂. ‘‘စာတုဒ္ဒသိံ ပဉ္စဒသိံ၊ ယာ စ ပက္ခဿ အဋ္ဌမီ၊

ပါဋိဟာရိယပက္ခဉ္စ၊ ပသန္နမာနသာ အဟံ [အတိပသန္နမာနသာ (က.)].

၃၁၃. ‘‘အဋ္ဌင်္ဂုပေတံ အနုဓမ္မစာရိနီ၊ ဥပေါသထံ ပီတိမနာ ဥပါဝသိံ၊

ဣမဉ္စ အရိယံ အဋ္ဌင်္ဂဝရေဟုပေတံ၊ သမာဒိယိတွာ ကုသလံ သုခုဒြယံ၊

ပတိမှိ ကလျာဏီ ဝသာနုဝတ္တိနီ၊ အဟောသိံ ပုဗ္ဗေ သုဂတဿ သာဝိကာ.

၃၁၄. ‘‘ဧတာဒိသံ ကုသလံ ဇီဝလောကေ၊ ကမ္မံ ကရိတွာန ဝိသေသဘာဂိနီ၊

ကာယဿ ဘေဒါ အဘိသမ္ပရာယံ၊ ဒေဝိဒ္ဓိပတ္တာ သုဂတိမှိ အာဂတာ.

၃၁၅. ‘‘ဝိမာနပါသာဒဝရေ မနောရမေ၊ ပရိဝါရိတာ အစ္ဆရာသင်္ဂဏေန၊

သယံပဘာ ဒေဝဂဏာ ရမေန္တိ မံ၊ ဒီဃာယုကိံ ဒေဝဝိမာနမာဂတ’’န္တိ၊

ပလ္လင်္ကဝိမာနံ တတိယံ.