၄. လတာဝိမာနဝတ္ထု

၃၁၆. လတာ စ သဇ္ဇာ ပဝရာ စ ဒေဝတာ၊ အစ္စိမတီ [အစ္စိမုခီ (သီ.)၊ အစ္ဆိမတီ (ပီ. က.) အစ္ဆိမုတီ (သျာ.)] ရာဇဝရဿ သိရီမတော၊

သုတာ စ ရညော ဝေဿဝဏဿ ဓီတာ၊ ရာဇီမတီ ဓမ္မဂုဏေဟိ သောဘထ.

၃၁၇. ပဉ္စေတ္ထ နာရိယော အာဂမံသု နှာယိတုံ၊ သီတောဒကံ ဥပ္ပလိနိံ သိဝံ နဒိံ၊

တာ တတ္ထ နှာယိတွာ ရမေတွာ ဒေဝတာ၊ နစ္စိတွာ ဂါယိတွာ သုတာ လတံ ဗြဝိ [ဗြုဝီ (သီ.)].

၃၁၈. ‘‘ပုစ္ဆာမိ တံ ဥပ္ပလမာလဓာရိနိ၊ အာဝေဠိနိ ကဉ္စနသန္နိဘတ္တစေ၊

တိမိရတမ္ဗက္ခိ နဘေဝ သောဘနေ၊ ဒီဃာယုကီ ကေန ကတော ယသော တဝ.

၃၁၉. ‘‘ကေနာသိ ဘဒ္ဒေ ပတိနော ပိယတရာ၊ ဝိသိဋ္ဌကလျာဏိတရဿု ရူပတော၊

ပဒက္ခိဏာ နစ္စဂီတဝါဒိတေ၊ အာစိက္ခ နော တွံ နရနာရိပုစ္ဆိတာ’’တိ.

၃၂၀. ‘‘အဟံ မနုဿေသု မနုဿဘူတာ၊ ဥဠာရဘောဂေ ကုလေ သုဏိသာ အဟောသိံ၊

အက္ကောဓနာ ဘတ္တုဝသာနုဝတ္တိနီ၊ ဥပေါသထေ အပ္ပမတ္တာ အဟောသိံ.

၃၂၁. ‘‘မနုဿဘူတာ ဒဟရာ အပါပိကာ [ဒဟရာသ’ပါပိကာ (သီ.)]၊ ပသန္နစိတ္တာ ပတိမာဘိရာဓယိံ၊

သဒေဝရံ သဿသုရံ သဒါသကံ၊ အဘိရာဓယိံ တမှိ ကတော ယသော မမ.

၃၂၂. ‘‘သာဟံ တေန ကုသလေန ကမ္မုနာ၊ စတုဗ္ဘိ ဌာနေဟိ ဝိသေသမဇ္ဈဂါ၊

အာယုဉ္စ ဝဏ္ဏဉ္စ သုခံ ဗလဉ္စ၊ ခိဍ္ဍာရတိံ ပစ္စနုဘောမနပ္ပကံ.

၃၂၃. ‘‘သုတံ နု တံ ဘာသတိ ယံ အယံ လတာ၊ ယံ နော အပုစ္ဆိမှ အကိတ္တယီ နော၊

ပတိနော ကိရမှာကံ ဝိသိဋ္ဌ နာရီနံ၊ ဂတီ စ တာသံ ပဝရာ စ ဒေဝတာ.

၃၂၄. ‘‘ပတီသု ဓမ္မံ ပစရာမ သဗ္ဗာ၊ ပတိဗ္ဗတာ ယတ္ထ ဘဝန္တိ ဣတ္ထိယော၊

ပတီသု ဓမ္မံ ပစရိတွ [ပစရိတွာန (က.)] သဗ္ဗာ၊ လစ္ဆာမသေ ဘာသတိ ယံ အယံ လတာ.

၃၂၅. ‘‘သီဟော ယထာ ပဗ္ဗတသာနုဂေါစရော၊ မဟိန္ဓရံ ပဗ္ဗတမာဝသိတွာ၊

ပသယှ ဟန္တွာ ဣတရေ စတုပ္ပဒေ၊ ခုဒ္ဒေ မိဂေ ခါဒတိ မံသဘောဇနော.

၃၂၆. ‘‘တထေဝ သဒ္ဓါ ဣဓ အရိယသာဝိကာ၊ ဘတ္တာရံ နိဿာယ ပတိံ အနုဗ္ဗတာ၊

ကောဓံ ဝဓိတွာ အဘိဘုယျ မစ္ဆရံ၊ သဂ္ဂမှိ သာ မောဒတိ ဓမ္မစာရိနီ’’တိ.

လတာဝိမာနံ စတုတ္ထံ.