၂. ဥစ္ဆုဒါယိကာဝိမာနဝတ္ထု

၂၉၆. ‘‘ဩဘာသယိတွာ ပထဝိံ [ပဌဝိံ (သီ. သျာ.)] သဒေဝကံ၊ အတိရောစသိ စန္ဒိမသူရိယာ ဝိယ၊

သိရိယာ စ ဝဏ္ဏေန ယသေန တေဇသာ၊ ဗြဟ္မာဝ ဒေဝေ တိဒသေ သဟိန္ဒကေ [သဣန္ဒကေ (သီ.)].

၂၉၇. ‘‘ပုစ္ဆာမိ တံ ဥပ္ပလမာလဓာရိနီ၊ အာဝေဠိနီ ကဉ္စနသန္နိဘတ္တစေ၊

အလင်္ကတေ ဥတ္တမဝတ္ထဓာရိနီ၊ ကာ တွံ သုဘေ ဒေဝတေ ဝန္ဒသေ မမံ.

၂၉၈. ‘‘ကိံ တွံ ပုရေ ကမ္မမကာသိ အတ္တနာ၊ မနုဿဘူတာ ပုရိမာယ ဇာတိယာ၊

ဒါနံ သုစိဏ္ဏံ အထ သီလသံယမံ [သညမံ (သီ.)]၊ ကေနူပပန္နာ သုဂတိံ ယသဿိနီ၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ.

၂၉၉. ‘‘ဣဒါနိ ဘန္တေ ဣမမေဝ ဂါမံ [ဂါမေ (သျာ. က.)]၊ ပိဏ္ဍာယ အမှာကံ ဃရံ ဥပါဂမိ၊

တတော တေ ဥစ္ဆုဿ အဒါသိ ခဏ္ဍိကံ၊ ပသန္နစိတ္တာ အတုလာယ ပီတိယာ.

၃၀၀. ‘‘သဿု စ ပစ္ဆာ အနုယုဉ္ဇတေ မမံ၊ ကဟံ [ကဟံ မေ (ပီ.)] နု ဥစ္ဆုံ ဝဓုကေ အဝါကိရိ [အဝါကရိ (သျာ. က.)]၊

န ဆဍ္ဍိတံ နော ပန ခါဒိတံ မယာ၊ သန္တဿ ဘိက္ခုဿ သယံ အဒါသဟံ.

၃၀၁. ‘‘တုယှံနွိဒံ [တုယှံ နု ဣဒံ (သျာ.)] ဣဿရိယံ အထော မမ၊ ဣတိဿာ သဿု ပရိဘာသတေ မမံ၊

ပီဌံ ဂဟေတွာ ပဟာရံ အဒါသိ မေ၊ တတော စုတာ ကာလကတာမှိ ဒေဝတာ.

၃၀၂. ‘‘တဒေဝ ကမ္မံ ကုသလံ ကတံ မယာ၊ သုခဉ္စ ကမ္မံ အနုဘောမိ အတ္တနာ၊

ဒေဝေဟိ သဒ္ဓိံ ပရိစာရယာမဟံ၊ မောဒါမဟံ ကာမဂုဏေဟိ ပဉ္စဟိ.

၃၀၃. ‘‘တဒေဝ ကမ္မံ ကုသလံ ကတံ မယာ၊ သုခဉ္စ ကမ္မံ အနုဘောမိ အတ္တနာ၊

ဒေဝိန္ဒဂုတ္တာ တိဒသေဟိ ရက္ခိတာ၊ သမပ္ပိတာ ကာမဂုဏေဟိ ပဉ္စဟိ.

၃၀၄. ‘‘ဧတာဒိသံ ပုညဖလံ အနပ္ပကံ၊ မဟာဝိပါကာ မမ ဥစ္ဆုဒက္ခိဏာ၊

ဒေဝေဟိ သဒ္ဓိံ ပရိစာရယာမဟံ၊ မောဒါမဟံ ကာမဂုဏေဟိ ပဉ္စဟိ.

၃၀၅. ‘‘ဧတာဒိသံ ပုညဖလံ အနပ္ပကံ၊ မဟာဇုတိကာ မမ ဥစ္ဆုဒက္ခိဏာ၊

ဒေဝိန္ဒဂုတ္တာ တိဒသေဟိ ရက္ခိတာ၊ သဟဿနေတ္တောရိဝ နန္ဒနေ ဝနေ.

၃၀၆. ‘‘တုဝဉ္စ ဘန္တေ အနုကမ္ပကံ ဝိဒုံ၊ ဥပေစ္စ ဝန္ဒိံ ကုသလဉ္စ ပုစ္ဆိသံ၊

တတော တေ ဥစ္ဆုဿ အဒါသိ ခဏ္ဍိကံ၊ ပသန္နစိတာ အတုလာယ ပီတိယာ’’တိ.

ဥစ္ဆုဒါယိကာဝိမာနံ ဒုတိယံ.