၁. ဥဠာရဝိမာနဝတ္ထု

၂၈၆. ‘‘ဥဠာရော တေ ယသော ဝဏ္ဏော၊ သဗ္ဗာ ဩဘာသတေ ဒိသာ၊

နာရိယော နစ္စန္တိ ဂါယန္တိ၊ ဒေဝပုတ္တာ အလင်္ကတာ.

၂၈၇. ‘‘မောဒေန္တိ ပရိဝါရေန္တိ၊ တဝ ပူဇာယ ဒေဝတေ၊

သောဝဏ္ဏာနိ ဝိမာနာနိ၊ တဝိမာနိ သုဒဿနေ.

၂၈၈. ‘‘တုဝံသိ ဣဿရာ တေသံ၊ သဗ္ဗကာမသမိဒ္ဓိနီ၊

အဘိဇာတာ မဟန္တာသိ၊ ဒေဝကာယေ ပမောဒသိ၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ.

၂၈၉. ‘‘အဟံ မနုဿေသု မနုဿဘူတာ၊ ပုရိမာယ ဇာတိယာ မနုဿလောကေ၊

ဒုဿီလကုလေ သုဏိသာ အဟောသိံ၊ အဿဒ္ဓေသု ကဒရိယေသု အဟံ.

၂၉၀. ‘‘သဒ္ဓါ သီလေန သမ္ပန္နာ၊ သံဝိဘာဂရတာ သဒါ၊

ပိဏ္ဍာယ စရမာနဿ၊ အပူဝံ တေ အဒါသဟံ.

၂၉၁. ‘‘တဒါဟံ သဿုယာစိက္ခိံ၊ သမဏော အာဂတော ဣဓ၊

တဿ အဒါသဟံ ပူဝံ၊ ပသန္နာ သေဟိ ပါဏိဘိ.

၂၉၂. ‘‘ဣတိဿာ သဿု ပရိဘာသိ၊ အဝိနီတာသိ တွံ [အဝိနီတာ တုဝံ (သီ.)] ဝဓု၊

န မံ သမ္ပုစ္ဆိတုံ ဣစ္ဆိ၊ သမဏဿ ဒဒါမဟံ.

၂၉၃. ‘‘တတော မေ သဿု ကုပိတာ၊ ပဟာသိ မုသလေန မံ၊

ကူဋင်္ဂစ္ဆိ အဝဓိ မံ၊ နာသက္ခိံ ဇီဝိတုံ စိရံ.

၂၉၄. ‘‘သာ အဟံ ကာယဿ ဘေဒါ၊ ဝိပ္ပမုတ္တာ တတော စုတာ၊

ဒေဝါနံ တာဝတိံသာနံ၊ ဥပပန္နာ သဟဗျတံ.

၂၉၅. ‘‘တေန မေတာဒိသော ဝဏ္ဏော။ပေ။ဝဏ္ဏော စ မေ သဗ္ဗဒိသာ ပဘာသတီ’’တိ.

ဥဠာရဝိမာနံ ပဌမံ.