၁၇. ကေသကာရီဝိမာနဝတ္ထု

၁၅၀. ‘‘ဣဒံ ဝိမာနံ ရုစိရံ ပဘဿရံ၊ ဝေဠုရိယထမ္ဘံ သတတံ သုနိမ္မိတံ၊

သုဝဏ္ဏရုက္ခေဟိ သမန္တမောတ္ထတံ၊ ဌာနံ မမံ ကမ္မဝိပါကသမ္ဘဝံ.

၁၅၁. ‘‘တတြူပပန္နာ ပုရိမစ္ဆရာ ဣမာ၊ သတံ သဟဿာနိ သကေန ကမ္မုနာ၊

တုဝံသိ အဇ္ဈုပဂတာ ယသဿိနီ၊ ဩဘာသယံ တိဋ္ဌသိ ပုဗ္ဗဒေဝတာ.

၁၅၂. ‘‘သသီ အဓိဂ္ဂယှ ယထာ ဝိရောစတိ၊ နက္ခတ္တရာဇာရိဝ တာရကာဂဏံ၊

တထေဝ တွံ အစ္ဆရာသင်္ဂဏံ [အစ္ဆရာသင်္ဂမံ (သီ.)] ဣမံ၊ ဒဒ္ဒလ္လမာနာ ယသသာ ဝိရောစသိ.

၁၅၃. ‘‘ကုတော နု အာဂမ္မ အနောမဒဿနေ၊ ဥပပန္နာ တွံ ဘဝနံ မမံ ဣဒံ၊

ဗြဟ္မံဝ ဒေဝါ တိဒသာ သဟိန္ဒကာ၊ သဗ္ဗေ န တပ္ပါမသေ ဒဿနေန တ’’န္တိ.

၁၅၄. ‘‘ယမေတံ သက္က အနုပုစ္ဆသေ မမံ၊ ‘ကုတော စုတာ တွံ ဣဓ အာဂတာ’တိ [ကုတော စုတာ ဣဓ အာဂတာ တုဝံ (သျာ.)၊ ကုတော စုတာယ အာဂတိ တဝ (ပီ.)]၊

ဗာရာဏသီ နာမ ပုရတ္ထိ ကာသိနံ၊ တတ္ထ အဟောသိံ ပုရေ ကေသကာရိကာ.

၁၅၅. ‘‘ဗုဒ္ဓေ စ ဓမ္မေ စ ပသန္နမာနသာ၊ သံဃေ စ ဧကန္တဂတာ အသံသယာ၊

အခဏ္ဍသိက္ခာပဒါ အာဂတပ္ဖလာ၊ သမ္ဗောဓိဓမ္မေ နိယတာ အနာမယာ’’တိ.

၁၅၆. ‘‘တန္တျာဘိနန္ဒာမသေ သွာဂတဉ္စ [သာဂတဉ္စ (သီ.)] တေ၊ ဓမ္မေန စ တွံ ယသသာ ဝိရောစသိ၊

ဗုဒ္ဓေ စ ဓမ္မေ စ ပသန္နမာနသေ၊ သံဃေ စ ဧကန္တဂတေ အသံသယေ၊

အခဏ္ဍသိက္ခာပဒေ အာဂတပ္ဖလေ၊ သမ္ဗောဓိဓမ္မေ နိယတေ အနာမယေ’’တိ.

ကေသကာရီဝိမာနံ သတ္တရသမံ.

ပီဌဝဂ္ဂေါ ပဌမော နိဋ္ဌိတော.

တဿုဒ္ဒါနံ –

ပဉ္စ ပီဌာ တယော နာဝါ၊ ဒီပတိလဒက္ခိဏာ ဒွေ၊

ပတိ ဒွေ သုဏိသာ ဥတ္တရာ၊ သိရိမာ ကေသကာရိကာ၊

ဝဂ္ဂေါ တေန ပဝုစ္စတီတိ.