၂. စိတ္တလတာဝဂ္ဂေါ

၁. ဒါသိဝိမာနဝတ္ထု

၁၅၇. ‘‘အပိ သက္ကောဝ ဒေဝိန္ဒော၊ ရမ္မေ စိတ္တလတာဝနေ၊

သမန္တာ အနုပရိယာသိ၊ နာရီဂဏပုရက္ခတာ၊

ဩဘာသေန္တီ ဒိသာ သဗ္ဗာ၊ ဩသဓီ ဝိယ တာရကာ.

၁၅၈. ‘‘ကေန တေတာဒိသော ဝဏ္ဏော၊ ကေန တေ ဣဓ မိဇ္ဈတိ၊

ဥပ္ပဇ္ဇန္တိ စ တေ ဘောဂါ၊ ယေ ကေစိ မနသော ပိယာ.

၁၅၉. ‘‘ပုစ္ဆာမိ တံ ဒေဝိ မဟာနုဘာဝေ၊ မနုဿဘူတာ ကိမကာသိ ပုညံ၊

ကေနာသိ ဧဝံ ဇလိတာနုဘာဝါ၊ ဝဏ္ဏော စ တေ သဗ္ဗဒိသာ ပဘာသတီ’’တိ.

၁၆၀. သာ ဒေဝတာ အတ္တမနာ၊ မောဂ္ဂလ္လာနေန ပုစ္ဆိတာ၊

ပဉှံ ပုဋ္ဌာ ဝိယာကာသိ၊ ယဿ ကမ္မဿိဒံ ဖလံ.

၁၆၁. ‘‘အဟံ မနုဿေသု မနုဿဘူတာ၊ ဒါသီ အဟောသိံ ပရပေဿိယာ [ပရပေသိယာ (က.)] ကုလေ.

၁၆၂. ‘‘ဥပါသိကာ စက္ခုမတော၊ ဂေါတမဿ ယသဿိနော၊

တဿာ မေ နိက္ကမော အာသိ၊ သာသနေ တဿ တာဒိနော.

၁၆၃. ‘‘ကာမံ ဘိဇ္ဇတုယံ ကာယော၊ နေဝ အတ္ထေတ္ထ သဏ္ဌနံ [သန္ထနံ (သီ. သျာ. ပီ.)]၊

သိက္ခာပဒါနံ ပဉ္စန္နံ၊ မဂ္ဂေါ သောဝတ္ထိကော သိဝေါ.

၁၆၄. ‘‘အကဏ္ဋကော အဂဟနော၊ ဥဇု သဗ္ဘိ ပဝေဒိတော၊

နိက္ကမဿ ဖလံ ပဿ၊ ယထိဒံ ပါပုဏိတ္ထိကာ.

၁၆၅. ‘‘အာမန္တနိကာ ရညောမှိ၊ သက္ကဿ ဝသဝတ္တိနော၊

သဋ္ဌိ တုရိယ [တုရိယ (သီ. သျာ. ပီ.)] သဟဿာနိ၊ ပဋိဗောဓံ ကရောန္တိ မေ.

၁၆၆. ‘‘အာလမ္ဗော ဂဂ္ဂရော [ဂဂ္ဂမော (သျာ.)၊ ဘဂ္ဂရော (က.)] ဘီမော [ဘိမ္မော (က.)]၊ သာဓုဝါဒီ စ သံသယော၊

ပေါက္ခရော စ သုဖဿော စ၊ ဝိဏာမောက္ခာ [ဝိလာမောက္ခာ (က.)] စ နာရိယော.

၁၆၇. ‘‘နန္ဒာ စေဝ သုနန္ဒာ စ၊ သောဏဒိန္နာ သုစိမှိတာ [သုစိမ္ဘိကာ (သျာ.)]၊

အလမ္ဗုသာ မိဿကေသီ စ၊ ပုဏ္ဍရီကာတိ ဒါရုဏီ.

၁၆၈. ‘‘ဧဏီဖဿာ သုဖဿာ စ၊ သုဘဒ္ဒါ မုဒုဝါဒိနီ၊

ဧတာ စညာ စ သေယျာသေ၊ အစ္ဆရာနံ ပဗောဓိကာ.

၁၆၉. ‘‘တာ မံ ကာလေနုပါဂန္တွာ၊ အဘိဘာသန္တိ ဒေဝတာ၊

ဟန္ဒ နစ္စာမ ဂါယာမ၊ ဟန္ဒ တံ ရမယာမသေ.

၁၇၀. ‘‘နယိဒံ အကတပုညာနံ၊ ကတပုညာနမေဝိဒံ၊

အသောကံ နန္ဒနံ ရမ္မံ၊ တိဒသာနံ မဟာဝနံ.

၁၇၁. ‘‘သုခံ အကတပုညာနံ၊ ဣဓ နတ္ထိ ပရတ္ထ စ၊

သုခဉ္စ ကတပုညာနံ၊ ဣဓ စေဝ ပရတ္ထ စ.

၁၇၂. ‘‘တေသံ သဟဗျကာမာနံ၊ ကတ္တဗ္ဗံ ကုသလံ ဗဟုံ၊

ကတပုညာ ဟိ မောဒန္တိ၊ သဂ္ဂေ ဘောဂသမင်္ဂိနော’’တိ.

ဒါသိဝိမာနံ ပဌမံ.

၂. လခုမာဝိမာနဝတ္ထု

၁၇၃. ‘‘အဘိက္ကန္တေန ဝဏ္ဏေန၊ ယာ တွံ တိဋ္ဌသိ ဒေဝတေ၊

ဩဘာသေန္တီ ဒိသာ သဗ္ဗာ၊ ဩသဓီ ဝိယ တာရကာ.

၁၇၄. ‘‘ကေန တေတာဒိသော ဝဏ္ဏော၊ ကေန တေ ဣဓ မိဇ္ဈတိ၊

ဥပ္ပဇ္ဇန္တိ စ တေ ဘောဂါ၊ ယေ ကေစိ မနသော ပိယာ.

၁၇၅. ‘‘ပုစ္ဆာမိ တံ ဒေဝိ မဟာနုဘာဝေ၊ မနုဿဘူတာ ကိမကာသိ ပုညံ၊

ကေနာသိ ဧဝံ ဇလိတာနုဘာဝါ၊ ဝဏ္ဏော စ တေ သဗ္ဗဒိသာ ပဘာသတီ’’တိ.

၁၇၆. သာ ဒေဝတာ အတ္တမနာ၊ မောဂ္ဂလ္လာနေန ပုစ္ဆိတာ၊

ပဉှံ ပုဋ္ဌာ ဝိယာကာသိ၊ ယဿ ကမ္မဿိဒံ ဖလံ.

၁၇၇. ‘‘ကေဝဋ္ဋဒွါရာ နိက္ခမ္မ၊ အဟု မယှံ နိဝေသနံ၊

တတ္ထ သဉ္စရမာနာနံ၊ သာဝကာနံ မဟေသိနံ.

၁၇၈. ‘‘ဩဒနံ ကုမ္မာသံ [သာကံ (သီ.)] ဍာကံ၊ လောဏသောဝီရကဉ္စဟံ၊

အဒါသိံ ဥဇုဘူတေသု၊ ဝိပ္ပသန္နေန စေတသာ.

၁၇၉. ‘‘စာတုဒ္ဒသိံ ပဉ္စဒသိံ၊ ယာ စ ပက္ခဿ အဋ္ဌမီ၊

ပါဋိဟာရိယပက္ခဉ္စ၊ အဋ္ဌင်္ဂသုသမာဂတံ.

၁၈၀. ‘‘ဥပေါသထံ ဥပဝသိဿံ၊ သဒါ သီလေသု သံဝုတာ၊

သညမာ သံဝိဘာဂါ စ၊ ဝိမာနံ အာဝသာမဟံ.

၁၈၁. ‘‘ပါဏာတိပါတာ ဝိရတာ၊ မုသာဝါဒါ စ သညတာ၊

ထေယျာ စ အတိစာရာ စ၊ မဇ္ဇပါနာ စ အာရကာ.

၁၈၂. ‘‘ပဉ္စသိက္ခာပဒေ ရတာ၊ အရိယသစ္စာန ကောဝိဒါ၊

ဥပါသိကာ စက္ခုမတော၊ ဂေါတမဿ ယသဿိနော.

၁၈၃. ‘‘တေန မေတာဒိသော ဝဏ္ဏော။ပေ။ ဝဏ္ဏော စ မေ သဗ္ဗဒိသာ ပဘာသတီတိ.

‘‘မမ စ၊ ဘန္တေ၊ ဝစနေန ဘဂဝတော ပါဒေ သိရသာ ဝန္ဒေယျာသိ – ‘လခုမာ နာမ၊ဘန္တေ၊ဥပါသိကာ ဘဂဝတော ပါဒေ သိရသာ ဝန္ဒတီ’တိ. အနစ္ဆရိယံ ခေါ ပနေတံ၊ ဘန္တေ၊ ယံ မံ ဘဂဝါ အညတရသ္မိံ သာမညဖလေ ဗျာကရေယျ [ဗျာကရေယျာတိ (?)]. တံ ဘဂဝါ သကဒါဂါမိဖလေ ဗျာကာသီ’’တိ.

လခုမာဝိမာနံ ဒုတိယံ.

၃. အာစာမဒါယိကာဝိမာနဝတ္ထု

၁၈၅. ‘‘ပိဏ္ဍာယ တေ စရန္တဿ၊ တုဏှီဘူတဿ တိဋ္ဌတော၊

ဒလိဒ္ဒါ ကပဏာ နာရီ၊ ပရာဂါရံ အပဿိတာ [အဝဿိတာ (သီ.)].

၁၈၆. ‘‘ယာ တေ အဒါသိ အာစာမံ၊ ပသန္နာ သေဟိ ပါဏိဘိ၊

သာ ဟိတွာ မာနုသံ ဒေဟံ၊ ကံ နု သာ ဒိသတံ ဂတာ’’တိ.

၁၈၇. ‘‘ပိဏ္ဍာယ မေ စရန္တဿ၊ တုဏှီဘူတဿ တိဋ္ဌတော၊

ဒလိဒ္ဒါ ကပဏာ နာရီ၊ ပရာဂါရံ အပဿိတာ.

၁၈၈. ‘‘ယာ မေ အဒါသိ အာစာမံ၊ ပသန္နာ သေဟိ ပါဏိဘိ၊

သာ ဟိတွာ မာနုသံ ဒေဟံ၊ ဝိပ္ပမုတ္တာ ဣတော စုတာ.

၁၈၉. ‘‘နိမ္မာနရတိနော နာမ၊ သန္တိ ဒေဝါ မဟိဒ္ဓိကာ၊

တတ္ထ သာ သုခိတာ နာရီ၊ မောဒတာစာမဒါယိကာ’’တိ.

၁၉၀. ‘‘အဟော ဒါနံ ဝရာကိယာ၊ ကဿပေ သုပ္ပတိဋ္ဌိတံ၊

ပရာဘတေန ဒါနေန၊ ဣဇ္ဈိတ္ထ ဝတ ဒက္ခိဏာ.

၁၉၁. ‘‘ယာ မဟေသိတ္တံ ကာရေယျ၊ စက္ကဝတ္တိဿ ရာဇိနော၊

နာရီ သဗ္ဗင်္ဂကလျာဏီ၊ ဘတ္တု စာနောမဒဿိကာ၊

ဧတဿာစာမဒါနဿ၊ ကလံ နာဂ္ဃတိ သောဠသိံ.

၁၉၂. ‘‘သတံ နိက္ခာ သတံ အဿာ၊ သတံ အဿတရီရထာ၊

သတံ ကညာသဟဿာနိ၊ အာမုတ္တမဏိကုဏ္ဍလာ၊

ဧတဿာစာမဒါနဿ၊ ကလံ နာဂ္ဃန္တိ သောဠသိံ.

၁၉၃. ‘‘သတံ ဟေမဝတာ နာဂါ၊ ဤသာဒန္တာ ဥရူဠှဝါ၊

သုဝဏ္ဏကစ္ဆာ မာတင်္ဂါ၊ ဟေမကပ္ပနဝါသသာ [ဟေမကပ္ပနိဝါသသာ (သျာ. က.)]၊

ဧတဿာစာမဒါနဿ၊ ကလံ နာဂ္ဃတိ သောဠသိံ.

၁၉၄. ‘‘စတုန္နမပိ ဒီပါနံ၊ ဣဿရံ ယောဓ ကာရယေ၊

ဧတဿာစာမဒါနဿ၊ ကလံ နာဂ္ဃတိ သောဠသိ’’န္တိ.

အာစာမဒါယိကာဝိမာနံ တတိယံ.

၄. စဏ္ဍာလိဝိမာနဝတ္ထု

၁၉၅. ‘‘စဏ္ဍာလိ ဝန္ဒ ပါဒါနိ၊ ဂေါတမဿ ယသဿိနော၊

တမေဝ [တဝေဝ (သီ.)] အနုကမ္ပာယ၊ အဋ္ဌာသိ ဣသိသတ္တမော [ဣသိသုတ္တမော (သီ.)].

၁၉၆. ‘‘အဘိပ္ပသာဒေဟိ မနံ၊ အရဟန္တမှိ တာဒိနိ [တာဒိနေ (သျာ. က.)]၊

ခိပ္ပံ ပဉ္ဇလိကာ ဝန္ဒ၊ ပရိတ္တံ တဝ ဇီဝိတ’’န္တိ.

၁၉၇. စောဒိတာ ဘာဝိတတ္တေန၊ သရီရန္တိမဓာရိနာ၊

စဏ္ဍာလီ ဝန္ဒိ ပါဒါနိ၊ ဂေါတမဿ ယသဿိနော.

၁၉၈. တမေနံ အဝဓီ ဂါဝီ၊ စဏ္ဍာလိံ ပဉ္ဇလိံ ဌိတံ၊

နမဿမာနံ သမ္ဗုဒ္ဓံ၊ အန္ဓကာရေ ပဘင်္ကရန္တိ.

၁၉၉. ‘‘ခီဏာသဝံ ဝိဂတရဇံ အနေဇံ၊ ဧကံ အရညမှိ ရဟော နိသိန္နံ၊

ဒေဝိဒ္ဓိပတ္တာ ဥပသင်္ကမိတွာ၊ ဝန္ဒာမိ တံ ဝီရ မဟာနုဘာဝ’’န္တိ.

၂၀၀. ‘‘သုဝဏ္ဏဝဏ္ဏာ ဇလိတာ မဟာယသာ၊ ဝိမာနမောရုယှ အနေကစိတ္တာ၊

ပရိဝါရိတာ အစ္ဆရာသင်္ဂဏေန [အစ္ဆရာနံ ဂဏေန (သီ.)]၊ ကာ တွံ သုဘေ ဒေဝတေ ဝန္ဒသေ မမ’’န္တိ.

၂၀၁. ‘‘အဟံ ဘဒ္ဒန္တေ စဏ္ဍာလီ၊ တယာ ဝီရေန [ထေရေန (က.)] ပေသိတာ၊

ဝန္ဒိံ အရဟတော ပါဒေ၊ ဂေါတမဿ ယသဿိနော.

၂၀၂. ‘‘သာဟံ ဝန္ဒိတွာ [ဝန္ဒိတွ (သီ.)] ပါဒါနိ၊ စုတာ စဏ္ဍာလယောနိယာ၊

ဝိမာနံ သဗ္ဗတော ဘဒ္ဒံ၊ ဥပပန္နမှိ နန္ဒနေ.

၂၀၃. ‘‘အစ္ဆရာနံ သတသဟဿံ၊ ပုရက္ခတွာန [ပုရက္ခိတွာ မံ (သျာ. က.)] တိဋ္ဌတိ၊

တာသာဟံ ပဝရာ သေဋ္ဌာ၊ ဝဏ္ဏေန ယသသာယုနာ.

၂၀၄. ‘‘ပဟူတကတကလျာဏာ၊ သမ္ပဇာနာ ပဋိဿတာ [ပတိဿတာ (သီ. သျာ.)]၊

မုနိံ ကာရုဏိကံ လောကေ၊ တံ ဘန္တေ ဝန္ဒိတုမာဂတာ’’တိ.

၂၀၅. ဣဒံ ဝတွာန စဏ္ဍာလီ၊ ကတညူ ကတဝေဒိနီ၊

ဝန္ဒိတွာ အရဟတော ပါဒေ၊ တတ္ထေဝန္တရဓာယထာတိ [တတ္ထေဝန္တရဓာယတီတိ (သျာ. က.)].

စဏ္ဍာလိဝိမာနံ စတုတ္ထံ.

၅. ဘဒ္ဒိတ္ထိဝိမာနဝတ္ထု

၂၀၆. ‘‘နီလာ ပီတာ စ ကာဠာ စ၊ မဉ္ဇိဋ္ဌာ [မဉ္ဇေဋ္ဌာ (သီ.)၊ မဉ္ဇဋ္ဌာ (ပီ.)] အထ လောဟိတာ၊

ဥစ္စာဝစာနံ ဝဏ္ဏာနံ၊ ကိဉ္ဇက္ခပရိဝါရိတာ.

၂၀၇. ‘‘မန္ဒာရဝါနံ ပုပ္ဖါနံ၊ မာလံ ဓာရေသိ မုဒ္ဓနိ၊

နယိမေ အညေသု ကာယေသု၊ ရုက္ခာ သန္တိ သုမေဓသေ.

၂၀၈. ‘‘ကေန ကာယံ ဥပပန္နာ၊ တာဝတိံသံ ယသဿိနီ၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ.

၂၀၉. ‘‘ဘဒ္ဒိတ္ထိကာတိ [ဘဒ္ဒိတ္ထီတိ (သီ.)] မံ အညံသု၊ ကိမိလာယံ ဥပါသိကာ၊

သဒ္ဓါ သီလေန သမ္ပန္နာ၊ သံဝိဘာဂရတာ သဒါ.

၂၁၀. ‘‘အစ္ဆာဒနဉ္စ ဘတ္တဉ္စ၊ သေနာသနံ ပဒီပိယံ၊

အဒါသိံ ဥဇုဘူတေသု၊ ဝိပ္ပသန္နေန စေတသာ.

၂၁၁. ‘‘စာတုဒ္ဒသိံ ပဉ္စဒသိံ၊ ယာ စ ပက္ခဿ အဋ္ဌမီ၊

ပါဋိဟာရိယပက္ခဉ္စ၊ အဋ္ဌင်္ဂသုသမာဂတံ.

၂၁၂. ‘‘ဥပေါသထံ ဥပဝသိဿံ၊ သဒါ သီလေသု သံဝုတာ၊

သညမာ သံဝိဘာဂါ စ၊ ဝိမာနံ အာဝသာမဟံ.

၂၁၃. ‘‘ပါဏာတိပါတာ ဝိရတာ၊ မုသာဝါဒါ စ သညတာ၊

ထေယျာ စ အတိစာရာ စ၊ မဇ္ဇပါနာ စ အာရကာ.

၂၁၄. ‘‘ပဉ္စသိက္ခာပဒေ ရတာ၊ အရိယသစ္စာန ကောဝိဒါ၊

ဥပါသိကာ စက္ခုမတော၊ အပ္ပမာဒဝိဟာရိနီ.

ကတာဝါသာ ကတကုသလာ တတော စုတာ [ကတာဝကာသာ ကတကုသလာ (က.)]၊

သယံ ပဘာ အနုဝိစရာမိ နန္ဒနံ.

၂၁၅. ‘‘ဘိက္ခူ စာဟံ ပရမဟိတာနုကမ္ပကေ၊ အဘောဇယိံ တပဿိယုဂံ မဟာမုနိံ၊

ကတာဝါသာ ကတကုသလာ တတော စုတာ [ကတာဝကာသာ ကတကုသလာ (က.)]၊ သယံ ပဘာ အနုဝိစရာမိ နန္ဒနံ.

၂၁၆. ‘‘အဋ္ဌင်္ဂိကံ အပရိမိတံ သုခါဝဟံ၊ ဥပေါသထံ သတတမုပါဝသိံ အဟံ၊

ကတာဝါသာ ကတကုသလာ တတော စုတာ [ကတာဝကာသာ ကတကုသလာ (က.)]၊ သယံ ပဘာ အနုဝိစရာမိ နန္ဒန’’န္တိ.

ဘဒ္ဒိတ္ထိဝိမာနံ [ဘဒ္ဒိတ္ထိကာဝိမာနံ (သျာ.)] ပဉ္စမံ.

၆. သောဏဒိန္နာဝိမာနဝတ္ထု

၂၁၇. ‘‘အဘိက္ကန္တေန ဝဏ္ဏေန၊ ယာ တွံ တိဋ္ဌသိ ဒေဝတေ၊

ဩဘာသေန္တီ ဒိသာ သဗ္ဗာ၊ ဩသဓီ ဝိယ တာရကာ.

၂၁၈. ‘‘ကေန တေတာဒိသော ဝဏ္ဏော၊ ကေန တေ ဣဓ မိဇ္ဈတိ၊

ဥပ္ပဇ္ဇန္တိ စ တေ ဘောဂါ၊ ယေ ကေစိ မနသော ပိယာ.

၂၁၉. ‘‘ပုစ္ဆာမိ တံ ဒေဝိ မဟာနုဘာဝေ၊ မနုဿဘူတာ ကိမကာသိ ပုညံ၊

ကေနာသိ ဧဝံ ဇလိတာနုဘာဝါ၊ ဝဏ္ဏော စ တေ သဗ္ဗဒိသာ ပဘာသတီ’’တိ.

၂၂၀. သာ ဒေဝတာ အတ္တမနာ၊ မောဂ္ဂလ္လာနေန ပုစ္ဆိတာ၊

ပဉှံ ပုဋ္ဌာ ဝိယာကာသိ၊ ယဿ ကမ္မဿိဒံ ဖလံ.

၂၂၁. ‘‘သောဏဒိန္နာတိ မံ အညံသု၊ နာဠန္ဒာယံ ဥပါသိကာ၊

သဒ္ဓါ သီလေန သမ္ပန္နာ၊ သံဝိဘာဂရတာ သဒါ.

၂၂၂. ‘‘အစ္ဆာဒနဉ္စ ဘတ္တဉ္စ၊ သေနာသနံ ပဒီပိယံ၊

အဒါသိံ ဥဇုဘူတေသု၊ ဝိပ္ပသန္နေန စေတသာ.

၂၂၃. ‘‘စာတုဒ္ဒသိံ ပဉ္စဒသိံ၊ ယာ စ ပက္ခဿ အဋ္ဌမီ၊

ပါဋိဟာရိယပက္ခဉ္စ၊ အဋ္ဌင်္ဂသုသမာဂတံ.

၂၂၄. ‘‘ဥပေါသထံ ဥပဝသိဿံ၊ သဒါ သီလေသု သံဝုတာ၊