၁၆. သိရိမာဝိမာနဝတ္ထု

၁၃၇. ‘‘ယုတ္တာ စ တေ ပရမအလင်္ကတာ ဟယာ၊ အဓောမုခါ အဃသိဂမာ ဗလီ ဇဝါ၊

အဘိနိမ္မိတာ ပဉ္စရထာသတာ စ တေ၊ အနွေန္တိ တံ သာရထိစောဒိတာ ဟယာ.

၁၃၈. ‘‘သာ တိဋ္ဌသိ ရထဝရေ အလင်္ကတာ၊ ဩဘာသယံ ဇလမိဝ ဇောတိ ပါဝကော၊

ပုစ္ဆာမိ တံ ဝရတနု [ဝရစာရု (ကတ္ထစိ)] အနောမဒဿနေ၊ ကသ္မာ နု ကာယာ အနဓိဝရံ ဥပါဂမိ.

၁၃၉. ‘‘ကာမဂ္ဂပတ္တာနံ ယမာဟုနုတ္တရံ [။ နုတ္တရာ (က.)၊ အနုတ္တရာ (သျာ.)]၊ နိမ္မာယ နိမ္မာယ ရမန္တိ ဒေဝတာ၊

တသ္မာ ကာယာ အစ္ဆရာ ကာမဝဏ္ဏိနီ၊ ဣဓာဂတာ အနဓိဝရံ နမဿိတုံ.

၁၄၀. ‘‘ကိံ တွံ ပုရေ သုစရိတမာစရီဓ [သုစရိတံ အစာရိဓ (ပီ.)]၊

ကေနစ္ဆသိ တွံ အမိတယသာ သုခေဓိတာ၊

ဣဒ္ဓီ စ တေ အနဓိဝရာ ဝိဟင်္ဂမာ၊

ဝဏ္ဏော စ တေ ဒသ ဒိသာ ဝိရောစတိ.

၁၄၁. ‘‘ဒေဝေဟိ တွံ ပရိဝုတာ သက္ကတာ စသိ၊

ကုတော စုတာ သုဂတိဂတာသိ ဒေဝတေ၊

ကဿ ဝါ တွံ ဝစနကရာနုသာသနိံ၊

အာစိက္ခ မေ တွံ ယဒိ ဗုဒ္ဓသာဝိကာ’’တိ.

၁၄၂. ‘‘နဂန္တရေ နဂရဝရေ သုမာပိတေ၊ ပရိစာရိကာ ရာဇဝရဿ သိရိမတော၊

နစ္စေ ဂီတေ ပရမသုသိက္ခိတာ အဟုံ၊ သိရိမာတိ မံ ရာဇဂဟေ အဝေဒိံသု [အဝေဒိသုံ (?)].

၁၄၃. ‘‘ဗုဒ္ဓေါ စ မေ ဣသိနိသဘော ဝိနာယကော၊ အဒေသယီ သမုဒယဒုက္ခနိစ္စတံ၊

အသင်္ခတံ ဒုက္ခနိရောဓသဿတံ၊ မဂ္ဂဉ္စိမံ အကုဋိလမဉ္ဇသံ သိဝံ.

၁၄၄. ‘‘သုတွာနဟံ အမတပဒံ အသင်္ခတံ၊ တထာဂတဿနဓိဝရဿ သာသနံ၊

သီလေသွဟံ ပရမသုသံဝုတာ အဟုံ၊ ဓမ္မေ ဌိတာ နရဝရဗုဒ္ဓဒေသိတေ [ဘာသိတေ (သီ.)].

၁၄၅. ‘‘ဉတွာနဟံ ဝိရဇပဒံ အသင်္ခတံ၊ တထာဂတေနနဓိဝရေန ဒေသိတံ၊

တတ္ထေဝဟံ သမထသမာဓိမာဖုသိံ၊ သာယေဝ မေ ပရမနိယာမတာ အဟု.

၁၄၆. ‘‘လဒ္ဓါနဟံ အမတဝရံ ဝိသေသနံ၊ ဧကံသိကာ အဘိသမယေ ဝိသေသိယ၊

အသံသယာ ဗဟုဇနပူဇိတာ အဟံ၊ ခိဍ္ဍာရတိံ [ခိဍ္ဍံ ရတိံ (သျာ. ပီ.)] ပစ္စနုဘောမနပ္ပကံ.

၁၄၇. ‘‘ဧဝံ အဟံ အမတဒသမှိ [အမတရသမှိ (က.)] ဒေဝတာ၊ တထာဂတဿနဓိဝရဿ သာဝိကာ၊

ဓမ္မဒ္ဒသာ ပဌမဖလေ ပတိဋ္ဌိတာ၊ သောတာပန္နာ န စ ပန မတ္ထိ ဒုဂ္ဂတိ.

၁၄၈. ‘‘သာ ဝန္ဒိတုံ အနဓိဝရံ ဥပါဂမိံ၊ ပါသာဒိကေ ကုသလရတေ စ ဘိက္ခဝေါ၊

နမဿိတုံ သမဏသမာဂမံ သိဝံ၊ သဂါရဝါ သိရိမတော ဓမ္မရာဇိနော.

၁၄၉. ‘‘ဒိသွာ မုနိံ မုဒိတမနမှိ ပီဏိတာ၊ တထာဂတံ နရဝရဒမ္မသာရထိံ၊

တဏှစ္ဆိဒံ ကုသလရတံ ဝိနာယကံ၊ ဝန္ဒာမဟံ ပရမဟိတာနုကမ္ပက’’န္တိ.

သိရိမာဝိမာနံ သောဠသမံ.