၁၅. ဥတ္တရာဝိမာနဝတ္ထု

၁၂၄. ‘‘အဘိက္ကန္တေန ဝဏ္ဏေန၊ ယာ တွံ တိဋ္ဌသိ ဒေဝတေ၊

ဩဘာသေန္တီ ဒိသာ သဗ္ဗာ၊ ဩသဓီ ဝိယ တာရကာ.

၁၂၅. ‘‘ကေန တေတာဒိသော ဝဏ္ဏော၊ ကေန တေ ဣဓ မိဇ္ဈတိ၊

ဥပ္ပဇ္ဇန္တိ စ တေ ဘောဂါ၊ ယေ ကေစိ မနသော ပိယာ.

၁၂၆. ‘‘ပုစ္ဆာမိ တံ ဒေဝိ မဟာနုဘာဝေ၊ မနုဿဘူတာ ကိမကာသိ ပုညံ၊

ကေနာသိ ဧဝံ ဇလိတာနုဘာဝါ၊ ဝဏ္ဏော စ တေ သဗ္ဗဒိသာ ပဘာသတီ’’တိ.

၁၂၇. သာ ဒေဝတာ အတ္တမနာ၊ မောဂ္ဂလ္လာနေန ပုစ္ဆိတာ၊

ပဉှံ ပုဋ္ဌာ ဝိယာကာသိ၊ ယဿ ကမ္မဿိဒံ ဖလံ.

၁၂၈. ‘‘ဣဿာ စ မစ္ဆေရမထော [မစ္ဆရိယမထော စ (က.)] ပဠာသော၊ နာဟောသိ မယှံ ဃရမာဝသန္တိယာ၊

အက္ကောဓနာ ဘတ္တုဝသာနုဝတ္တိနီ၊ ဥပေါသထေ နိစ္စဟမပ္ပမတ္တာ.

၁၂၉. ‘‘စာတုဒ္ဒသိံ ပဉ္စဒသိံ၊ ယာ စ [ယာဝ (သီ. အဋ္ဌ.၊ က. အဋ္ဌ.) ထေရီဂါထာအဋ္ဌကထာ ပဿိတဗ္ဗာ] ပက္ခဿ အဋ္ဌမီ၊

ပါဋိဟာရိယပက္ခဉ္စ၊ အဋ္ဌင်္ဂသုသမာဂတံ.

၁၃၀. ‘‘ဥပေါသထံ ဥပဝသိဿံ၊ သဒါ သီလေသု သံဝုတာ၊

သညမာ သံဝိဘာဂါ စ၊ ဝိမာနံ အာဝသာမဟံ [အာဝသာမိမံ (သီ. အဋ္ဌ.၊ က.) ပရတော ပန သဗ္ဗတ္ထပိ ‘‘အာဝသာမဟံ’’ ဣစ္စေဝ ဒိဿတိ].

၁၃၁. ‘‘ပါဏာတိပါတာ ဝိရတာ၊ မုသာဝါဒါ စ သညတာ၊

ထေယျာ စ အတိစာရာ စ၊ မဇ္ဇပါနာ စ အာရကာ [အာရတာ (?)].

၁၃၂. ‘‘ပဉ္စသိက္ခာပဒေ ရတာ၊ အရိယသစ္စာန ကောဝိဒါ၊

ဥပါသိကာ စက္ခုမတော၊ ဂေါတမဿ ယသဿိနော.

၁၃၃. ‘‘သာဟံ သကေန သီလေန၊ ယသသာ စ ယသဿိနီ၊

အနုဘောမိ သကံ ပုညံ၊ သုခိတာ စမှိနာမယာ.

၁၃၄. ‘‘တေန မေတာဒိသော ဝဏ္ဏော၊ တေန မေ ဣဓ မိဇ္ဈတိ၊

ဥပ္ပဇ္ဇန္တိ စ မေ ဘောဂါ၊ ယေ ကေစိ မနသော ပိယာ.

၁၃၅. ‘‘အက္ခာမိ တေ ဘိက္ခု မဟာနုဘာဝ၊ မနုဿဘူတာ ယမဟံ အကာသိံ၊

တေနမှိ ဧဝံ ဇလိတာနုဘာဝါ၊ ဝဏ္ဏော စ မေ သဗ္ဗဒိသာ ပဘာသတီတိ.

၁၃၆. ‘‘မမ စ၊ ဘန္တေ၊ ဝစနေန ဘဂဝတော ပါဒေ သိရသာ ဝန္ဒေယျာသိ – ‘ဥတ္တရာ နာမ၊ ဘန္တေ၊ ဥပါသိကာ ဘဂဝတော ပါဒေ သိရသာ ဝန္ဒတီ’တိ. အနစ္ဆရိယံ ခေါ ပနေတံ၊ ဘန္တေ၊ ယံ မံ ဘဂဝါ အညတရသ္မိံ သာမညဖလေ ဗျာကရေယျ [ဗျာကရေယျာတိ (?)]၊ တံ ဘဂဝါ သကဒါဂါမိဖလေ ဗျာကာသီ’’တိ.

ဥတ္တရာဝိမာနံ ပန္နရသမံ.