၁၁. ပဌမပတိဗ္ဗတာဝိမာနဝတ္ထု

၉၃. ‘‘ကောဉ္စာ မယူရာ ဒိဝိယာ စ ဟံသာ၊ ဝဂ္ဂုဿရာ ကောကိလာ သမ္ပတန္တိ၊

ပုပ္ဖါဘိကိဏ္ဏံ ရမ္မမိဒံ ဝိမာနံ၊ အနေကစိတ္တံ နရနာရိသေဝိတံ [နရနာရီဘိ သေဝိတံ (က.)].

၉၄. ‘‘တတ္ထစ္ဆသိ ဒေဝိ မဟာနုဘာဝေ၊ ဣဒ္ဓီ ဝိကုဗ္ဗန္တိ အနေကရူပါ၊

ဣမာ စ တေ အစ္ဆရာယော သမန္တတော၊ နစ္စန္တိ ဂါယန္တိ ပမောဒယန္တိ စ.

၉၅. ‘‘ဒေဝိဒ္ဓိပတ္တာသိ မဟာနုဘာဝေ၊ မနုဿဘူတာ ကိမကာသိ ပုညံ၊

ကေနာသိ ဧဝံ ဇလိတာနုဘာဝါ၊ ဝဏ္ဏော စ တေ သဗ္ဗဒိသာ ပဘာသတီ’’တိ.

၉၆. သာ ဒေဝတာ အတ္တမနာ၊ မောဂ္ဂလ္လာနေန ပုစ္ဆိတာ၊

ပဉှံ ပုဋ္ဌာ ဝိယာကာသိ၊ ယဿ ကမ္မဿိဒံ ဖလံ.

၉၇. ‘‘အဟံ မနုဿေသု မနုဿဘူတာ၊ ပတိဗ္ဗတာနညမနာ အဟောသိံ၊

မာတာဝ ပုတ္တံ အနုရက္ခမာနာ၊ ကုဒ္ဓါပိဟံ [ကုဒ္ဓါပဟံ (သီ.)] နပ္ဖရုသံ အဝေါစံ.

၉၈. ‘‘သစ္စေ ဌိတာ မောသဝဇ္ဇံ ပဟာယ၊ ဒါနေ ရတာ သင်္ဂဟိတတ္တဘာဝါ၊

အန္နဉ္စ ပါနဉ္စ ပသန္နစိတ္တာ၊ သက္ကစ္စ ဒါနံ ဝိပုလံ အဒါသိံ.

၉၉. ‘‘တေန မေတာဒိသော ဝဏ္ဏော၊ တေန မေ ဣဓ မိဇ္ဈတိ၊

ဥပ္ပဇ္ဇန္တိ စ မေ ဘောဂါ၊ ယေ ကေစိ မနသော ပိယာ.

၁၀၀. ‘‘အက္ခာမိ တေ ဘိက္ခု မဟာနုဘာဝ၊ မနုဿဘူတာ ယမကာသိ ပုညံ၊

တေနမှိ ဧဝံ ဇလိတာနုဘာဝါ၊ ဝဏ္ဏော စ မေ သဗ္ဗဒိသာ ပဘာသတီ’’တိ.

ပဌမပတိဗ္ဗတာဝိမာနံ ဧကာဒသမံ.