၁၂. ဒုတိယပတိဗ္ဗတာဝိမာနဝတ္ထု

၁၀၁. ‘‘ဝေဠုရိယထမ္ဘံ ရုစိရံ ပဘဿရံ၊ ဝိမာနမာရုယှ အနေကစိတ္တံ၊

တတ္ထစ္ဆသိ ဒေဝိ မဟာနုဘာဝေ၊ ဥစ္စာဝစာ ဣဒ္ဓိ ဝိကုဗ္ဗမာနာ၊

ဣမာ စ တေ အစ္ဆရာယော သမန္တတော၊ နစ္စန္တိ ဂါယန္တိ ပမောဒယန္တိ စ.

၁၀၂. ‘‘ဒေဝိဒ္ဓိပတ္တာသိ မဟာနုဘာဝေ၊ မနုဿဘူတာ ကိမကာသိ ပုညံ၊

ကေနာသိ ဧဝံ ဇလိတာနုဘာဝါ၊ ဝဏ္ဏော စ တေ သဗ္ဗဒိသာ ပဘာသတီ’’တိ.

၁၀၃. သာ ဒေဝတာ အတ္တမနာ၊ မောဂ္ဂလ္လာနေန ပုစ္ဆိတာ၊

ပဉှံ ပုဋ္ဌာ ဝိယာကာသိ၊ ယဿ ကမ္မဿိဒံ ဖလံ.

၁၀၄. ‘‘အဟံ မနုဿေသု မနုဿဘူတာ၊ ဥပါသိကာ စက္ခုမတော အဟောသိံ၊

ပါဏာတိပါတာ ဝိရတာ အဟောသိံ၊ လောကေ အဒိန္နံ ပရိဝဇ္ဇယိဿံ.

၁၀၅. ‘‘အမဇ္ဇပါ နော စ [နာပိ (သျာ.)] မုသာ အဘာဏိံ [အဘာသိံ (က.)]၊ သကေန သာမိနာ [သာမိနာဝ (သီ.)] အဟောသိံ တုဋ္ဌာ၊

အန္နဉ္စ ပါနဉ္စ ပသန္နစိတ္တာ၊ သက္ကစ္စ ဒါနံ ဝိပုလံ အဒါသိံ.

၁၀၆. ‘‘တေန မေတာဒိသော ဝဏ္ဏော၊ တေန မေ ဣဓ မိဇ္ဈတိ၊

ဥပ္ပဇ္ဇန္တိ စ မေ ဘောဂါ၊ ယေ ကေစိ မနသော ပိယာ.

၁၀၇. ‘‘အက္ခာမိ တေ ဘိက္ခု မဟာနုဘာဝ၊ မနုဿဘူတာ ယမကာသိ ပုညံ၊

တေနမှိ ဧဝံ ဇလိတာနုဘာဝါ၊ ဝဏ္ဏော စ မေ သဗ္ဗဒိသာ ပဘာသတီ’’တိ.

ဒုတိယပတိဗ္ဗတာဝိမာနံ ဒွါဒသမံ.