၃. ခေမာထေရီဂါထာ

၁၃၉. ‘‘ဒဟရာ တွံ ရူပဝတီ၊ အဟမ္ပိ ဒဟရော ယုဝါ၊

ပဉ္စင်္ဂိကေန တုရိယေန [တူရေန (က.)]၊ ဧဟိ ခေမေ ရမာမသေ’’.

၁၄၀. ‘‘ဣမိနာ ပူတိကာယေန၊ အာတုရေန ပဘင်္ဂုနာ၊

အဋ္ဋိယာမိ ဟရာယာမိ၊ ကာမတဏှာ သမူဟတာ.

၁၄၁. ‘‘သတ္တိသူလူပမာ ကာမာ၊ ခန္ဓာသံ အဓိကုဋ္ဋနာ၊

ယံ ‘တွံ ကာမရတိံ’ ဗြူသိ၊ ‘အရတီ’ ဒါနိ သာ မမ.

၁၄၂. ‘‘သဗ္ဗတ္ထ ဝိဟတာ နန္ဒီ၊ တမောခန္ဓော ပဒါလိတော၊

ဧဝံ ဇာနာဟိ ပါပိမ၊ နိဟတော တွမသိ အန္တက.

၁၄၃. ‘‘နက္ခတ္တာနိ နမဿန္တာ၊ အဂ္ဂိံ ပရိစရံ ဝနေ၊

ယထာဘုစ္စမဇာနန္တာ၊ ဗာလာ သုဒ္ဓိမမညထ.

၁၄၄. ‘‘အဟဉ္စ ခေါ နမဿန္တီ၊ သမ္ဗုဒ္ဓံ ပုရိသုတ္တမံ၊

ပမုတ္တာ [ပရိမုတ္တာ (သီ. သျာ.)] သဗ္ဗဒုက္ခေဟိ၊ သတ္ထုသာသနကာရိကာ’’တိ.

။ ခေမာ ထေရီ။.