၁. ပဉ္စသတမတ္တာထေရီဂါထာ

၁၂၇. ‘‘ယဿ မဂ္ဂံ န ဇာနာသိ၊ အာဂတဿ ဂတဿ ဝါ၊

တံ ကုတော စာဂတံ သတ္တံ [သန္တံ (သီ.)၊ ပုတ္တံ (သျာ.)]၊ ‘မမ ပုတ္တော’တိ ရောဒသိ.

၁၂၈. ‘‘မဂ္ဂဉ္စ ခေါဿ [ခေါ’ထ (သျာ. က.)] ဇာနာသိ၊ အာဂတဿ ဂတဿ ဝါ၊

န နံ သမနုသောစေသိ၊ ဧဝံဓမ္မာ ဟိ ပါဏိနော.

၁၂၉. ‘‘အယာစိတော တတာဂစ္ဆိ၊ နာနုညာတော [အနနုညာတော (သီ. သျာ.)] ဣတော ဂတော၊

ကုတောစိ နူန အာဂန္တွာ၊ ဝသိတွာ ကတိပါဟကံ၊

ဣတောပိ အညေန ဂတော၊ တတောပညေန ဂစ္ဆတိ.

၁၃၀. ‘‘ပေတော မနုဿရူပေန၊ သံသရန္တော ဂမိဿတိ၊

ယထာဂတော တထာ ဂတော၊ ကာ တတ္ထ ပရိဒေဝနာ’’.

၁၃၁. ‘‘အဗ္ဗဟီ [အဗ္ဗုယှံ (သျာ.)] ဝတ မေ သလ္လံ၊ ဒုဒ္ဒသံ ဟဒယဿိတံ၊

ယာ မေ သောကပရေတာယ၊ ပုတ္တသောကံ ဗျပါနုဒိ.

၁၃၂. ‘‘သာဇ္ဇ အဗ္ဗူဠှသလ္လာဟံ၊ နိစ္ဆာတာ ပရိနိဗ္ဗုတာ၊

ဗုဒ္ဓံ ဓမ္မဉ္စ သံဃဉ္စ၊ ဥပေမိ သရဏံ မုနိံ’’.

ဣတ္ထံ သုဒံ ပဉ္စသတမတ္တာ ထေရီ ဘိက္ခုနိယော။ပေ။.