၆. မိတ္တာကာဠီထေရီဂါထာ

၉၂. ‘‘သဒ္ဓါယ ပဗ္ဗဇိတွာန၊ အဂါရသ္မာနဂါရိယံ၊

ဝိစရိံဟံ တေန တေန၊ လာဘသက္ကာရဥဿုကာ.

၉၃. ‘‘ရိဉ္စိတွာ ပရမံ အတ္ထံ၊ ဟီနမတ္ထံ အသေဝိဟံ၊

ကိလေသာနံ ဝသံ ဂန္တွာ၊ သာမညတ္ထံ န ဗုဇ္ဈိဟံ.

၉၄. ‘‘တဿာ မေ အဟု သံဝေဂေါ၊ နိသိန္နာယ ဝိဟာရကေ၊

ဥမ္မဂ္ဂပဋိပန္နာမှိ၊ တဏှာယ ဝသမာဂတာ.

၉၅. ‘‘အပ္ပကံ ဇီဝိတံ မယှံ၊ ဇရာ ဗျာဓိ စ မဒ္ဒတိ၊

ပုရာယံ ဘိဇ္ဇတိ [ဇရာယ ဘိဇ္ဇတေ (သီ.)] ကာယော၊ န မေ ကာလော ပမဇ္ဇိတုံ.

၉၆. ‘‘ယထာဘူတမဝေက္ခန္တီ၊ ခန္ဓာနံ ဥဒယဗ္ဗယံ၊

ဝိမုတ္တစိတ္တာ ဥဋ္ဌာသိံ၊ ကတံ ဗုဒ္ဓဿ သာသန’’န္တိ.

။ မိတ္တာ ကာဠီ ထေရီ။.